15th Ordinary Sunday (HOMILY)
Hkristu hta tsawra ai nu/wa hpu nau ni e, ndai laban gaw pran wan ladaw hta shaning B a (15) ngu na laban rai nga ai. Ndai bat na chyum mungga daw langai hta gaw “Myihtoi Amos a shaga la ai” lam hpe na la lu na rai nga ai. Chyum mungga daw lahkawng hta gaw “anhte hpe karai kasang lata la ai, anhte hpe lata la ai gaw shi a hpung shingkang a matu rai nga ai” ngu ai San Paulu a shadum ai ga hpe na la lu na rai nga ai. Kabu gara shiga hta “Madu Yesu gaw shi a kasa ni Karai munga hkaw tsun sakse hkam ai shaloi hkan sa ra ai tara lam ni hpe sharin shaga ya ai” lam hpe na la lu na rai nga ai. Dai ni e anhte yawng hpe mung Karai Kasang a mungga hpe hkaw tsun sakse hkam na matu Myihtoi Amos hpe shaga la ai zawn shaga taw nga ai. Dai majaw Karai Kasang a mungga hkaw tsun sakse hkam ai shaloi Madu Yesu jaw da sai hkan sa ra ai lam (3) hpe myit sumru sa wa ga. Shawng ningnan e dai lam (3) hte bung ai maumwi (short story) gadun hpe tsun dan mayu ai.
Moi Kalang mi hta manang lahkawng bum lung ai. Bum lung ai gaw majoi lung ai nre. Bum ntsa de du yang akyu hpyi na re ngu ai yaw shada da ai lam rai nga ai. Shan lahkawng gaw bum lung ai hkrun lam hta ra ai arung arai ni law law bawn gun ma ai. Hkying hkum lahkawng ram sha naw lung shi yang, ba dum wa ai majaw shanhte gun sa ai arung arai ni hpe kabai mayu wa ai. Dai majaw shan lahkawng jahkring mi dung nna arung arai kabai na matu jahkum bawng ban ma ai. Dai hta e shanhte a matu ahkrat nre ai arung arai ni hpe tawn da nna bum bai matut lung ai. Bai na yi hkying hkum mali daram bai bum lung ngut ai shaloi shan jahkring mi bai hkring sa dung nna bai bawng ban ma ai. “Hkau e, an lahkawng ndai hku sha naw matut lung yang gaw an lahkawng bum ntsa de du na nre” ngu tsun hkat ai. Shaloi, manang langai wa mung “re ai, an lahkawng hka hte dawhkrawng lawm yang jau jau du na re” ngu nna bai htan tsun ai. Dai majaw shan lahkawng gaw arung arai mahkra tawn da nna, hka hte sumdoi lang let bum ntsa de matut lung ai..hpang jahtum bum ntsa de jau jau du ai hte shan lahkawng yaw shada ai lam hpe atsawm sha galaw lu mat ai rai nga ai. Anhte mung Madu Yesu sharin ya ai hpe hkan nang ai rai yang gaw teng sha lamu mungdan de shang lu na rai nga ai. Dai majaw Madu Yesu gaw anjte hpe Christian hpung masha langai hku na gara hku sak hkrung hkawm sa ra ai lam hpe ndai bat na kabu gara shiga hta tsun da ai rai nga ai.
Main Themes: “We are the witnesses of the Gospel”
(i) Carry The Walking Stick! (Christian prat hpe dingman dinghpring ai hku hkawm lu na matu Hkristu ngu ai dawhkrawng lang ra ai.)
Madu Yesu gaw shi a sape ni hpe tsun ai shaloi “dawhkrawng hta kaga, hkrun lam a matu, muk mung, htingpa mung, shingkyit hta dingsen mung hkum lang” ngu ai rai nga ai. Shanhte lang ra ai gaw “dawhkrawng” sha rai nga ai. Anhte karai mungga hkaw tsun sakse hkam ai shaloi lang ra ai dawhkrawng nga ai. Dai dawhkrawng gaw hpa rai ta? Anhte hkawm ai Christian hkum lam gaw bum lung taw nga ai hkum lam hte bung nga ai. Dai majaw hkristu ngu ai dawhkrawng hpe lang nan lang ra ai rai nga ai. Dai dawhkrawng gaw Karai Kasang a makawp maga ai lam hpe kam hpa ai (Believe in Divine Providence) lam hku na shadum ya ai rai nga ai. Anhte gaw Karai Kasang a atsam hpe kam ra ai. Kalang lang gaw Karai Kasang ahkaw ahkang jaw ai (permissive will) majaw anhte hta yak hkrat ai lam ni byin wa ai. Kalang lang gaw Karai Kasang anhte hpe dingman ai lam de sharin shaga (Corrective will) mayu ai majaw byin wa ai lam ni mung nga ai. Kalang lang gaw anhte galaw ai lam ni hpe Karai Kasang shagrin (affirmative will) mayu ai majaw byin wa ai lam ni mung nga ai rai nga ai. Anhte a prat hta lama mi byin wa ting, byin wa ai ningpawt ngu ai gaw nga ai. Anhte hpe Karai Kasang sa shangun mayu ai; byin shangun mayu ai; chye shangun mayu ai lam ni hpe chye gin hka na matu dawhkrawng ra ai. Dai dawhkrawng gaw anhte hpe lam woi madun ya na rai nga ai.
(ii) Wear Sandals! (Christian prat hpe kangka ai hte hkawm lu na matu kyepdin din ra ai)
Kyepdin din ai gaw Mungkan ga kaw asak hkrung ai lam a kumla rai nga ai. Kyepdin din ai a lachyum langai mi gaw “Readiness” ngu ai; shara mi de hkawm na matu jin jin re ai lam rai nga ai. Kasa laika (12:8) hta lamu kasa gaw Petru hpe “shingkyit kyit nna, kyepdin din u” ngu nna tsun lai wa ai. Lamu kasa tsun ai hte maren Petru galaw ai majaw ahkrut htawng (jail) kaw nna lawt lu ai hte Madu Yesu a kabu gara shi hpe bai hkaw tsun lu ai rai nga ai. Anhte gaw Mungkan ga kaw bu hkawm ai masha ni rai nga ai. Anhte ni kyepdin din ai ngu ai gaw Karai Kasang a kashu kasha rai nga ai hpe mung shadum ya ai rai nga ai. Luka laika (15: 20-24) hta “kawa gaw myit malai lu nna nta de bai wa ai kasha hpe plawng bai bu hpun ai, ta chyawp bai chyawp ya ai, hte kyepdin bai shadin shangun ai” rai nga ai. Dai ni yawng gaw “Kawa a kasha rai nga ai” hpe shagrin la ai lam rai nga ai. Anhte Mungkan ga kaw sak hkrung nga ai aten hta “Karai Kasang a kasha ni rai nga ai hpe masha ni chye na matu hkawm sa ra ai” lam hpe mung shadum, sharin ya ai lam re ngu nna mung myit la lu ai.
(iii) Travel Two By Two! (Karai Kasang mungdan de du lu na matu manang lawm ra ai.)
“Tinang du mayu ai shara de lawan du mayu yang gaw, langa sha hkawm u; tinang sa na hkum lam galu ai rai yang gaw manang hte hkawm u” ngu ai myan ga malai langai nga ai. Teng sha rai nga ai. Tinang hkrai sha sa ai rai yang gaw shara law law de lawan du na rai nga ai. Raitimung, anhte a Christian prat hkum lam gaw langai sha hkawm ai hkum lam nrai nga ai. Manang ni hte rau hkawm ai hkum lam rai nga ai. Dai majaw Madu Yesu gaw shi a sape ni hpe lahkawng hkawng sa shangun ai rai nga ai. Mahte lakai (10: 16) hta Madu Yesu gaw “Yu mu, chyahkyawn ni a ka-ang de sagu hpe zawn, ngai nanhte hpe shangun dat made ai” ngu nna tsun da ai rai nga ai. Madu Yesu a hpang hkan nang ai anhte Christian ni gaw anhte hpe dingban dingna jaw ai, anhte hpe jahtan sharun ai lam ni, yahk hkrat jam jau ai lam ni law law hkum na gaw ten sha rai nga ai. Anhte langai sha dai jam jau lam ni hpe tawk lai na matu shakut ai rai yang gaw myit daw wa chye ai. Dai lam ni hpe chye ai majaw Madu Yesu gaw lahkawng hkawng shangun dat ai mung rai nga ai. Manang tai na matu sha shangun dat ai n rai nga ai yahk hkrat jam jau lam ni hkum wa shaloi mung shada da bawng bang, ningun jaw hkrat na matu mung rai nga ai. Jau, Mama prat hku hkawm taw nga ai ni mung manang kaja ra ai. Hkun dinghku prat hta hkawm taw nga ai ni mung tinang a madu wa/ madu jan a matu kaja dik ai manang tai ya ra ai. Dai zawn sha re, ramma prat hta nga taw nga ai ramma ni mung tinang a manaw manang ni a matu kasi kaja madun lu ai, kaja ai lam de woi awn ya lu ai manang tai lu na matu shahkut ra ai. Dai majaw tinang hte ni nawn ai masha ni hpe nang ngai gara hku mu nga a ta? Tinang a manaw manang a matu/ tinang a madu wa/ madu jan a matu ngai kaja ai bu hkawm manang tai ya nga sa ni? Anhte a Christian prat gaw shada da ta gindun let, yak hkrat jam jau ai lam ni hpe tawk lai nna Karai Kasang ndat da ai mungdan de rau bu hkawm ai prat rai nga ai. San Augustine tsun ai ga langai mi nga ai. “Anhte langai hkai sha sumsing mungdan chying hka de du yang; San Petru gaw anhte hpe sumsing mungdan chying hka hta anhte hpe jahkring nna, “na a kahpu/kana/ kanau ni gaw kanang ta?” ngu nna san na ra ai ngu nna San Augustine shadum da ai ga hpe myit dum la nga ga..
Conclusion
Hpang jahtum hku nna, yu maya masha rai nga ai Amos hpe Karai Kasang gaw Myihtoi htoi na matu shaga ai. Nga rim sha ai, ahkum hkanse hta sha ai masha ni hpe Madu Yesu gaw shi a sape ni tai na matu shaga lai wa ai. Dai zawn sha re, anhte hpe mung anhte lu da ai makam masham hpe masha ni hpe garan jaw na matu shaga nga ai rai nga ai. Anhte lu da ai makam masham hpe kyem da na matu n rai nga ai.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta. ..shimanga.. ngu na lanban rai nga ai hti ang ai ja chyum mungga ni gaw chyum mungga daw langai ..Langai ngu na..Amo a laika 7: 12-15 .chyum mungga daw lahkawng Ephesu hpung masha ni hpang de san paulu shagun dat ai laika 3:1-14.. kabu gara shiga Marku 6: 7-13.
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law
