Du wa na September shata hta Asia mungdan ni de sa du kawan lam galaw na Wa Sarabyin Francis a sasana hkrun lam hte seng nna, Vatican shiga dap hte hkrum shaga san htai lam galaw ai hta, “Asia mungdan ni de Wa Sarabyin Francis sa du kawan ai lam gaw anhte a makam masham lam hpe n gun nnan bai ban ya ai lam tai wa na re” nga nna Federation of Asian Bishops’ Conferences ngu ai Asia saradaw ni a rapdaw ningbaw rai nga ai Myanmar mungdan na Cardinal Charles Bo kaw nna tsun dat ai rai nga ai.
Cardinal Charles Bo tsun ai hta, “Asia mungdan ni de sa du kawan lam galaw na Wa Sarabyin Francis a sasana hkrun lam gaw, anhte a makam masham lam hpe myit bai jasu ya ai, n gun nnan bai ban ya ai lam tai wa na re, hpa majaw nga yang Asia mungdan ni de Wa Sarabyin Francis sa du kawan ai lam gaw, anhte Asia mungdan masha ni hpe Wa Sarabyin shi a myit masin salum hta grai ni htep ai hku nna bang da nga ai, myit dum nga ai ngu ai lam hpe shaleng madun ya ai lam nan rai nga ai. Asia masha ni malawng maga gaw Wa Sarabyin Francis hpe shing gan hta myi man chyaw mu yu ai n rai ma ai, Internet shiga ni hkan sha mu mada yu ai rai ma ai, ndai lang Wa Sarabyin Francis hku nna Asia mungdan law law ni de sa du kawan na re majaw, shi hpe myi man chyaw shinggan hta mu hkrum lu na re nga nna Asia masha ni law law myit katu shajang nga ma ai, shanhte hku nna Wa Sarabyin Francis hpe myi man chyaw mu hkrum lu na ahkaw ahkang lu la na sha n ga, shanhte a makam masham lam hpe n gun nnan bai ban shangang shakang ya ai lam hpe mung lu la shajang na rai ma ai hpe kam ai” nga nna Cardinal Charles Bo tsun dat nga ai lamVatican shaiga dap kaw nna shana dat nga ma ai.
Du wa na September shata praw 2 kaw nna 13 ya du hkra sa du kawan lam galaw na Wa sarabyin Francis a Asia hkrun lam hta, Indonesia, Singapore, Timor-Leste, hte Papua New Guinea mungdan ni de du sa gawan na re nga nna Vatican kaw nna ndau shana lam galaw da sai rai nga ai.
Lai wa sai 2017 ning November shata 26 ya kaw nna 30 ya du hkra Myanmar mungdan de mung Wa Sarabyinb Francis sa du ka’wan lam galaw lai wa yu sai rai nga ai.
