Wa Sarabyin Francis a ( 45 ) lang ngu na sasana hkrun lam rai nga ai Asia Mungdan mali de sa du kawan ai hkrun lam hpe September praw ( 2 ) ya shani Roma gindai ahkying ( 5: 32 ) aten Roma Fiumicino nbungli pa kaw nna rawt wa nhtawm hkying hkum ( 13 ) na ai hpang September shata ( 3 ) ya shani Indonesia mungdan Jakarta nbungli daru de du shang wa sai rai nga ai.
Jakarta nbungli daru de du shang wa ai Wa Sarabyin Francis hpe kabu gara hkap tau hkalum la ai lamang hpe galaw lai wa ma ai. Indonesia mungdan a gumsan magam Joko Widodo kaw nna mung Jakarta mare na gumsan magam htingu hta Wa Sarabyin Francis hpe Indonesia mungdan de sa du kawan ai lam kabu gara hkap tau hkalum la ai lamang hpe galaw nna tara shang hkap tau la ai shagrau laika hta ta masat lekmat htu ai hpe galaw ai.
Wa Sarabyin Francis a Asia mungdan mali de sa du kawan na sasana hkrun lam ni hta na shawng nnan Indonesia mungdan kaw sa du kawan sai rai nga ai. Indonesia mungdan de du ai hpang kade nna yang tsin yam hkrum masha ni rai nga ai dum nta nlu ai bu htawt hkawm amsha ni, shingbyi shara tam hkawm nga ai tsin yam hkrum masha ni hte chyahkrai ma ni n kau mi hte hkrum shaga nna n’gun jaw kawan katsan lam galaw lai wa ai. Dai tsin yam hkrum masha ni gaw Jesuit jau uhpung ni, Dominican mama uhpung ni hte Indonesia mungdan na Kahtawlik shinggyim garum kahtau hpung ni kaw nna yu mada lakawn da ai re hpe chye lu ai.
Indonesia mungdan kaw du nga ai Wa Sarabyin Francis gaw tau nau hkyen lajang da sai lamang hte maren makam masham ningbaw ningla ni, mungdan ningbaw ningla ni hte hkrum shaga ai lamang ni hpe mung matut manoi galaw mat wa ai.
Indonesia mungdan masha jahpan wan ( 280 ) nga ai hta na Kahtawlik nawku hpung masha gaw tsa shadang ( 3 % ) sha nga ai rai nna hpunau Muslim ni malawng nga ai mungdan langai rai nga ai.
Wa Sarabyin Francis gaw Indonesia mungdan hta September 3 – 6 ya shani du hkra nga na rai nna, September 6 – 9 ya shani du hkra Papua Niu Guinea mungdan de matut sa du kawan na, September 9 – 11 ya laman sinpraw Temor de sa du kawan nna, September 11 – 13 ya shani du hkra Singapore mungdan de sa du kawan hkawm na rai nga ai majaw shiga madat nu wa hpu nau ni mung Wa Sarabyin a sasana hkrun lam angwi apyaw sha hkawm sa lu na matu akyu hpyi garum ya nga ga.
Wa Sarabyin Francis gaw lai wa sai 2017 ning hta Myanmar Mungdan de mung sa du kawan lai wa yu sai rai nna ndai hkrun lam gaw asak ( 87 ) ning rai sai Wa Sarabyin Franscis a matu ( 45 ) lang ngu na sasana hkrun lam rai nga ai hte nhtoi galu dik ai hkrun lam mung rai nga ai.
