Pranwan Ladaw – 24 ( Year B )
Hkristu hta tsawra hkungga ai nu wa hpu nau ni ndai laban gaw shaning B a pran wan ladaw 24 rai nga ai.
Shawng nnan mabyin lam langai mi hpe tsun dan mayu ai. Moi kalang mi hta masha lahkawng rau hkrun lam hkawm sa nga yang a kajawng sha shan a lapran hta tsap langai pru wa ai, shaloi shan lahkawng gaw kajawng ai hte gat hprawng ma ai dai hta langai wa gaw a lawan sha lam makau na hpun hta gat lung mat wa ai langai wa bai rai yang gaw lam ntsa e a lawan gat galeng nna si masu taw nga ai. Dai masha wa hpang de tsap gaw sa nna hkan manam ai shaloi dai masha wa mung nsa sa dik dik rai shamu ai lam kachyi mi mung n nga ai sha zim rai nga taw ai majaw tsap shi shadu la ai gaw masha ndai si sai ngu nna laga shara de bai hkawm pru mat wa ai.. Tawng marang mi na ai ten hpun ntsa e nga taw ai masha wa yu wa nna lam ntsa e si masu taw ai manang wa hpang de sa nna ga san san hpang ai manang wa e tsap gaw na a na makau kaw sa nna hpa ni tsun mat wa a ta ngu nna san ai shaloi dai manang wa bai htan tsun dat ai gaw tsap tsun ai nga yang gaw hkrit tsang hpa lam ni hte hkrum katut ai wa ten tinang hkrai hprawng pru mat wa chye ai manang hte galoi mung rau hkrun lam hkum hkawm nga nna htet tsun da lai wa ai nga nna bai htan tsun dat ai.
Ndai mau mwi mabyin gaw ndai bat na anhte na la na kabu gara shiga hte grai htuk manu nga ai.Tsawra ai nu wa hpu nau ni udang gaw anhte shinggyim masha ni Madu Yesu a ntsa tawn da ai tsawra myit hte hku hkau kanawn mazum ai lam jaw n jaw jet n jet myit san seng ai n san seng ai lam ni hpe san jep ai lam mung rai nga ai. Madu a hpang hkan nang nga ai shi a kasa ni gaw Madu Yesu hte rau hku hkau kanawn mazum nga ai lam gaw grai nan myit dik lu ma ai majaw Madu Yesu hte kata lam mahkri shawn hku hkau nga ma ai. Madu a myit hpe mawng shalen ai lam gaw shanhte ni Karai Kasang a mungdan lam hpe chye na na ahkang lu ai rai nga ai. Madu Yesu hte nihtep ai hku nga lu na ahkang lu ai ni mung rai nga ai. Kasa ni mung lamik kumla ni hpe madun dan na ahkang hte nat gawt shapraw na ahkang, ana zingli ni hpe shamai shatsai na ahkang ni Madu Yesu kaw na lu la ai majaw chyeju dum chye ai ni mung rai nga ma ai.
Madu Yesu hpe chye wa ai masha law wa magang shanhte kasa ni mung grau mying kaba wa magang rai nga ai. Hpang jahtum e Madu Yesu gaw hpung rawng ai sara wa David a kasha rai nga ai hte hpung dagu hpring nga ai wa, myihtoi ni hta na myihtoi langai chyoi pra san seng dik ai Karai Kasang hku nna masha ni chye law wa ai mung rai nga ai.
Madu Yesu mung shi a kasa ni hpe nanhte mung ngai hpe kadai ngu shadu myit ta ngu nna san ai ten kasa Petru gaw nang gaw Hkristu ngu ai hkye la madu rai nga ai hpe tsun lai wa ai. Hkye la madu ngu ai ga si hte seng nna kawa Karai Kasang kawn myihtoi ni hpe shangun dat nna tau nau hkaw tsun tawn da ai lam gaw ndai mungkan ga hte n seng ai htawm hpang prat hte mahtang seng nga ai lam rai nga ai. Raitim moi na Yuda masha ni gaw Roma hpyen la ni a up hkang ai npu e nga taw ra ai majaw anhte hpe Roma asuya ni a lata hta na hkye mawai la na hhye la Madu Hkristu hku nna sha chye na hkawn hkrang hkap la da lai wa ai rai nga ai. Bai nna e Madu a hpang hkan nang nga ai kasa ni mung dai zawn myit ni shanhte hta nga lai wa ai majaw Madu Yesu hpe Hkristu gaw hkye la madu ngu ai wa re nga nna yawng a malai mahtai jaw tsun lai wa ai. Kasa Petru hkum nan pi myit sawn la shut lai wa ai a majaw tsun daru hkrum lai wa ai lam mung mu lu ai. Mabyin gaw Madu Yesu gaw nni nhkri lam law law hkrum ra na ra ai, tara agyi salang ni hparashe ni, laika ka sara ni a nyet kau ai, sat kau ai lam ni hpe hkrum katut nna masum ya ngu ai nhtoi hta bai hkrung rawt wa na lam shi a kasa ni hpe tsun dan ai shaloi kasa Petru gaw Madu Yesu hpe hpang de gang dun shapru la nna htawm hpang de dai zawn nga ai ga n tsun na matu mara shagun tsun ai ten Madu Yesu kawn Petru hpe bai tsun shadum sharin dat ai lam gaw Mk 8:33 hta satan e nye a hpang de sit mat wa u. Karai Kasang hte seng ai lam n rai, masha hte seng ai lam sha nang myit nga ndai ngu nna daru tsun ai lam hpe mu lu ai.
Tsawra ai nu wa hpu nau ni ndai shara hta Madu Yesu kawn masat hte mahkret kau dat ai. Madu Yesu a kanawn mazum ai masat mahkret kata hta galoi mung anhte nga nga na matu udang hpai nna hkawm sa ra ai prat hpe myit dum da ra nga ai. Udang lam ngu na jam jau yak hkak lam hpe koi ai wa gaw Madu Yesu hpe ninghkap ai wa, hpyen wa rai nga ai. Udang ngu ai gaw Madu Yesu a shinggyim masha ni hte rau kanawn mazum lu nna htingbu wa jet n jet san jep ai lam mung rai nga ai. Yawhan 15: 13 hta jinghku wa a matu tinang a asak nawng kau hkra tsawra ai myit hta grau kaba ai tsawra myit gaw kadai hta mung n rawng nga ai.
Dai majaw Madu Yesu gaw shi a hpang e hkan nang mayu ai ni shi a uhpung hta lawm mayu ai ni nga yang Mk 8: 34 ngai hpang de hkan sa mayu ai wa kadai raitimung tinang hkum hpe ndang kau nna shi a udang hpai let ngai kaw hkan ru ga ngu nna tsun da ai hpe mu lu ai.
Ya na zawn Madu tsun ai mungga hpe zing hte rai na matu myit nam chyim hkam sha lu na matu lusu na lam a matu hte prat sak hkrung ai lam a manu ngu nna shadu hkam la da ai ni a matu hkap la na n loi nga ai. Kaja wa nga yang anhte ni kade mi yak hkak jam jau lam ni hpe koi koi yak hkak lam ni hte gaw n lawt lu nga ai. Langai nrai langai gaw bai byin hkrum sha nga na sha rai nga ai. Atsawm sha bai hkaja sawk shagawn dat yu yang yak hkak jam jau lam ngu ai gaw grai lachyum pru ai lam rai nga ai. Dai daram nan lachyum nga ai jam jau lam gaw anhte hkum ngau shagu a prat hta e hpa majaw lachyum n pru ai zawn rai nga kun? Mahtai gaw asan sha rai nga ai. Dai gaw anhte a prat hta Madu Yesu ngu ai wa n nga taw ai a majaw rai nga ai. Udang gaw hpa lachyum hte hpring nga nna hkye hkrang la ai lam byin taw nga ai i nga yang, dai udang hpe Madu hkum nan hpai nna dai udang ntsa e sha shi hkum nan jen noi si hkam lai wa ai a majaw rai nga ai. Udang gaw tsawra myit a kumla re ai zawn tsawra myit gaw udang sha rai nga ai..
San banerd tsun lai wa ai lam langai gaw tinang gaw Madu Yesu a sumla lawm ai udang hpe nawku daw jau shagu Madu Yesu hkam lai wa ai ningma ni gaw masha a nten zawn galai shai nna ningma shagu gaw ngai Madu nang hpe grai tsawra ai nga nngai ngu tsun taw ai hpe na lu ai. Udang ntsa e Madu Yesu a kaba la ai tsawra myit kawn nni nhkri lam a lachyum hpe mahtai jaw tsun taw nga ai. Nni nhkri lam gaw hpa majaw shaman chyeju hte hpring nga ai nga yang Madu Yesu a tsawra myit hte jasan jaseng tawn da ai a majaw rai nga ai. Daini na ten myit ninghkring law law a npawt nhpang sawn hkap la da chye ai lam gaw tinang hkum tinang tsawra na matu tinang hkum tinang hkap la chye na matu, tinang hkum tinang kaja ai ngu nna hkam la da chye na matu rai nga ai.
Ya na zawn hkap la da ai lam gaw anhte hpe ngai gaw makam masham nga ai wa ngai gaw dingman nga ai wa re majaw tara lam ni hpe hkan shadik n ra sai, nye a prat hta hpring zup nga sai, hpa baw naw ra ai ngu ai ndai zawn myit mang ai lam ni hpe tsadan kawn maw lanyet ai hte bang ya chye nga ai. Dai majaw dum hprang sadi maja nga ra ai.
Ndai bat na Marku a kabu gara shiga 8: 35 hta gaw tinang asak hpe hkye la mayu ai wa kadai mung asak sum na ra ai nye a matu hte dai kabu gara shiga majaw asak sum ai wa chyawm gaw dai hpe hkye la lu na wu ai.
Mungkan a hpaji ninghking ni gaw ndai zawn tara lam ni gaw shut shai ai lam re nga nna tsun mayu na re. Raitim Madu Yesu gaw ndai lam gaw hkye hkrang la ai lam de du shangun ai lam rai nga ai hpe asan sha hkaw tsun da nga ai.
Tsawra ai nu wa hpu nau ni san pra ai masha ni gaw Karai Kasang hta si na hpe myit sharawng awng nga ai majaw shanhte myit sharawng awng ai lam grai nga ai lam mung madun dan nga ai. Karai Kasang hte rai yang hpa n ra ai zawn rai nga ai. Tinang a tinggyeng myit hte matut mahkai ai lam n galaw magang Karai Kasang a lam mahkra hpe jahtum di lu magang rai nga ai. Tinang a tinggyeng sharawng awng ai lam hpe awng dawm lu ai lam gaw tinang kadai re hpe mu chye shangun nga ai. Karai Kasang a matu ngu nna hkam sharang gun hpai ai lam gaw masha hpe sumsing lamu hta ningngai nga shangun ai. Anhte a si ai lam, anhte ni hkrum lai wa ai hte hkrat sum lam ni gaw Karai Kasang a man hta tsaw dik awng dang lam ni hku nna bai galai shai mat nga ai. Anhte hkrum sha nga ai nni nkri jam jau lam ni gaw mahkawn yu ngwi zawn galai shai mat ai.
Tsawra ai nu wa hpu nau ni moi kalang mi hta masha langai mi Karai Kasang hpang de apu angun rai nna akyu hpyi ai. Madu Karai Kasang e ya na zawn yak hkak jam jau lam n nga ai sha htani htana asak n lu ai hpe na a kasha ngai chye nngai raitim nang madu hku na na a kasha ngai hpe n dang lu ai kandang grau li dik ai udang jaw da nga ai hpe naw dum chye ya rit ngu nna tang shawn kyu hpyi lai wa ai. Dai hpang shi yup nga ai ten hta yup mang langai mi mu hkrup dat ai dai shaloi dai yup mang hta e shi gaw gawk kaba langai mi hta shang mat wa nna dai gawk kata hta mungkan a yak hkak jam jau ai lam ni gaw udang hkrang hku nna hpring tup rai nna nga nga ai. Dai gawk kata hta shang wa ai shaloi shi na dat ai nsen gaw nang ya e hpai taw nga ai na a udang hpe dai gawk kaw jahkrat tawn da nna nang ra ai kaga udang langai ngai hpe bai lata la nna sak hkrung hkawn sa nga ai ten kabu gara ai hte gun hpai nga u ngu nna tsun dat ai shaloi shi gaw grai kabu ai hte shi a udang hpe jahkrat tawn nna shi hte htap htuk nan re ai udang ni hpe hkan tam hpang ai. Tsang na zawn re ai udang langai hpe shi lata hpai dat yu yang grai li taw nga ai majaw bai tawn da nna laga langai hpe bai lata hpai ai, dai wa she grau nna li taw ai, langai bai rai yang gaw shi a lahpa htan grau kaba taw nga ai. Dai hku rai hpang jahtum e gaw shi hte hkrak re udang hpe shi mu tam la lu nna grai pyaw ai hte hta hpai dat ai. Shaloi ndai udang chyawm gaw ngai hte htap htuk sai ngu nna yu dat yu ai shaloi mi shawng e shi jahkrak tawn da ai shi a udang mahtang bai rai taw nga ai. Mi shi anyung nna galai mayu ai udang gaw shi hte hkrak re ai a majaw kabu gara ai hte bai gun hpai lai wa ai lam rai nga ai. Dai majaw 2cor 12:9 hta nye a chyeju gaw na a matu ram nga ai nga nna tsun ai hpe mu lu ai.
Yawng a ntsa karai kasang shaman ya u ga
Akyu hpyi saga oh hpan Madu Karai Kasang e chyeju mahakra matu chyeju dum ai hte nang wa hpe grau nna kam sham tsawra chye chyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit nyan marai hte n gun atsam chyeju ni hpe mung jaw ya rit anhte a Madu Hkristu a marang e hpyi nem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw pranwan ladaw hta hkun mali ngu na laban rai nga ai hti ang ai ja chyum mungga ni gaw chyum mungga daw langai ..Esaia a laika 50: 5-9 .chyum mungga daw lahkawng Yaku a laika 2: 14-18 kabu gara shiga Marku 8: 27-35
Ndai Ja chyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law .