Mk 9: 40
Anhte a gumlau maga e n nga ai wa gaw anhte hpang maga nga ai wa rai nga ai.
Tsawra ai nu wa hpu nau ni ndai laban gaw shaning B a pranwan ladaw 26 rai nga ai.
Wa jau Demelo S.J kawn ka lai wa ai gawdin shing jawng poi de sa du ai Madu Yesu ngu ai ga shadawn mau mwi ka da ai lam hpe bai tsun dan mayu ai. Madu Yesu gaw gawdin shing jawng poi kalang mi mung n yu ga ai re majaw..shi a manang ni gaw Madu Yesu hpe gawdin poi de woi sa lai wa ai.
Ang mung ang dai shani na poi gaw Kahtawlik hpung hte Protestan hpung ni grai n gun dat grai rai nna ginsup ai poi mung rai nga ai…dai poi hta Kahtawlik shawng goal langai htawng bang dat ai. Shaloi Madu Yesu gaw grai kabu marawn nna n gun jaw dat ai hpe mu dat ai.
Jahkring mi bai rai yang ..Protestan ni bai htawng bang dat ya ai …Dai shaloi mung Madu Yesu gaw grai kabu marawn n gun jaw ai hpe bai mu dat ai. Dai shaloi gaw shi hpe shaga woi wa ai manang ni hpe shawa masha ni gaw Madu Yesu n gun jaw ai hkrang hpe n chye na mat nna.. manang ni gaw shi a lahpa ahtawk nna Madu e gara wuhpung hpe mahtang nang n gun jaw nga n ta? nga nna san dat ai shaloi. Aw ngai kun.. gara hpung hpe mung n gun n jaw nngai. Ngai ya na zawn marawn n gun jaw ai gaw ndai hpung lahkawng yan n gun dat grai rai shakut shaja lu na matu n gun jaw nga ai mahtang sha rai nngai nga nna bai htan tsun lai wa ai.
Gawdin poi ngut ai shaloi Madu Yesu hpe Madu nang wuhpung langai pyeng rai nna n gun nchye jaw ai i? ngu nna bai san dat ai shaloi ngai Karai Kasang gaw gara Nawku hpung hta mung shang lawm taw nga ai wa n rai nngai.Masha hpe mahtang n gun jaw nga ai lam madaw rai nngai. Laban nhtoi shani hta masha ni gaw Ngai Karai Kasang a matu grau nna ahkyak nga ai nga nna bai htai ya lai wa ai lam rai nga ai.
Tsawra ai nu wa hpu nau ni mungkan ntsa hta e masha gaw makam masham nga wa magang bai tara lam ni hpe grau shadik wa magang, tinang hkap la kam sham ai nawku hpung a ntsa e grau nna sadi dung wa magang rai nga ai.Ngut nna tinang nawku kam sham nga ai Karai Kasang a ntsa e grau nna sadi dung wa magang rai nga ai.
Ya na zawn byin ai lam ni a majaw Karai lam yan hta tsaw ai shara ngu na de du nga ai. Masha ni gaw tinang a makau kaw nga taw ai. Masha yawng hpe masha langai hku nna hkrak mu mada nna nye a amyu.. nye a nawku hpung ngu ai tinggyeng myit ni kachyi mi mung n nga ai sha jet ai tsawra myit ni hte mahkri shawn wa sai nga yang prat bung masha langai hku mu mada wa ai hte n gun jaw chye wa ai..garum shingtau wa ai, madi shadaw ya wa ai, woi dun lakawn la chye ai. Yu kaji ai hku kanawn mazum ai lam kachyi mi mung n nga wa ai.
Madu Yesu a matu masha shagu gaw shi Madu hpan tawn da nna hkye mawai da ai ni chyu rai nga ai a majaw masha shagu a ntsa Madu Yesu gaw tsawra myit ka up kahprwi da nga ai..Madu Yesu a lagaw lahkam hte maren hkawm sa taw nga ai anhte yawng mung Madu Yesu zawn masha shada da a ntsa e masha langai zawn mu mada lu na matu hkap la lu na matu Madu Yesu zawn masin salum kaba ai hte salum chyinghka ni hpe hpaw da na ra nga ai.
Makam masham sung wa magang tsa dan a gumlau lam yan ni mat wa magang rai nga ai. Awng dang taw nga ai wa hpe matut hkawm lu na matu madi shadaw ya ai hte mara shagun ai lam, dingbai dingna jaw ai lam ni n nga ai sha, maga mi de gaw mara shagun ai dingbai dingna jaw ai tsa dan a maw lanyet ai lam yan ni sha rai nga ai.
Tara shadik ai lam ngu ai gaw hpa rai ta? nga yang nat tsa dan a maw lanyet chye ai n kaja ai lam yan kawn lawt lu shangun ai lam rai nga ai. Madu Yesu hte nat tsa dan gum hpawn tawn da ai prat man lahakwng hte tara shadik ai lam hta kachyi mung n mai nga ai. Kaja ai kata de n kaja ai lam kachyi mi gayau bang ai lam hpe nan nan koi yen ra nga ai.
Coffee ntsin hta hkum pup ntsin loi mi gayau bang dat na nga yang gara hku byin mat na ngu ai hpe myit yu mai nga ai. Kaja wa mung lu n mai mat na re dai zawn sha anhte a prat hta san san rai nga na ahkyak nga ai. Mt 12 : 30 ngai hpang maga de n nga ai wa gaw nye a gumlau maga de rai nga ai ngai hte kahkyin gumdin n re ai wa gaw ayai aya rai nga ai nga nna tsun da ai hpe mu lu ai.
Daini e anhte hkum ga san san la na ra nga ai kaja wa sha ngai Madu Yesu hpang maga nga taw ai kun shingnrai makau grup yin hpe hkrit nna, agam nna kai htum de nkap kai lang de nkap zawn rai taw nga ai kun? tinang hkum tinang san jep la ai ten, hkrak daw dan la na ahkyak nga ai. Masha wa hpe san jep n yang gaw hkam sharang ai myit hte chye na san jep ya ra nga ai. Ndai lam hpe Mtt 10: 33 hta masha a man e ngai hpe nyet kau ai wa chyawm gaw sumsing lamu e nga ai Nye wa a man e dai wa hpe ngai nyet kau na we ai.
Tsawra ai nu wa hpu nau ni Madu Yesu hpe hkap la kam sham ai wa zawn zawn gaw rai nna anhte a prat lam masum hku nna nyet ai lam hpe galaw nga ga ai re.
Langai hta gaw tinang a n gup kawn tsun shapraw tsun shaga ai lam hku na nyet kau chye nga ga ai. Masha wa hpe shatan nhkan tsun ai matsa mawa tsun ai nsan nseng ai ga ni pawt sindawng ai hte tsun shaga taw nga ai ten n teng nman ai ga tsun shaga ai hta shang lawm masu garum ai, Shang lawm tsun garum ai, ndai zawn lam ni hku nna Karai Kasang hpe n gup ga hte nyet chye nga ga ai.
Hkristan ni a lit gaw mungkan (shinggyim masha) sharawmg awng ai lam hpe manu ai hku hkan shadik nga na matu n rai nga ai.Karai Kasang a sharawng awng ai lam hte n htan shai nga ai hpe chye na nna galai shai na matu ra nga ai.Ndai gaw shi Madu jaw ai lit mung rai nga ai. Tinang hta nga taw ai Karai Kasang a sasana magam hpe gun hpai taw nga ai lam mung rai nga ai.
Lahkawng hta gaw masha wa shut taw nga ai hpe galai shai na matu shadum sharin ya ra ai lam hpe ahkaw ahkang lu nga ninglen n gup pat zim rai nna nchye ai zawn zawn madi shadaw ai zawn zawn ndai lam ni hku na Madu Yesu hpe nyet kau chye nga ai. Ga shadawn kanu kawa ni gaw kashu kasha ni a tsun shaga shut shai ai lam hpe n shadum sharin shaga ai sha dai hku sha zim rai nga shalai kau ai. Kaba ai shara hta nga taw ai wa mung npu na ma ni shut shai taw nga ai hpe hpa n tsun shadum ai zim rai dai hku sha nga ai hkrang hte Karai Kasang hpe nyet kau chye nga ai.
Masumhta gaw kyang lailen ni hku na Madu Yesu hpe nyet kau chye nga ai lam rai nga ai. Galaw ra ai lit magam hpe n galaw ai, mai kaja ai lam galaw lu nga tim n galaw ai sha dai hku nga ai.N galaw ging ai lam ni hpe galaw ai lam ni hku nna Madu Yesu hpe nyet kau chye nga ga ai.Mtt 6: 24 hta kadai raitimung madu lahkawng kaw chyang lu na nrai shi langai mi hpe ndawng nna kaga hpe tsawra wu ai shing n rai langai mi hpe kasawt nna kaga hpe n kaw n law di na wu ai.
Madu lahkawng yan gaw ten tup myit masin hkum hkramg hte nawng shan yan hpe daw jau shangun mayu ai re majaw langai ngai hpe gaw tawn kau nyet kau ra nga ai. Karai Kasang hpe i? mungkan pyaw hpa lam ni hpe i? Karai Kasang hpe i? nat tsa dan hpe i?.langai hpe lata ra na gaw rai nga ai.Mahkra gaw Karai Kasang hpan da ai re majaw mahkra gaw Karai Kasang hte seng nga ai majaw nang ngai mung Karai Kasang hte seng nga ai dai majaw Karai Kasang hpe kaja wa sha lata na lit nga ai.
Tinang a prat hta e nawku tawn hte nat jaw shara hpe shara mi kaw sha kayau tawn da gaw nmai nga ai.Shingran 3: 16 hta ya gaw nang kahtet ai mung nrai katsi ai mung n rai lum nai rai nga ndai majaw nye a n gup hta na ngai nang hpe nhpat kau magang shade ai.
Tsawra ai nu wa hpu nau ni masha ngu ai prat hta mazut mayu ai prat hku na nga mayu ai masha ni,dingman ai prat hku nna sak hkrung mayu ai masha ngu nna daw lahkawng mu lu ai.
Masha ngu ai ni gaw kaji nga ai ten ndai wa myit su ai, myit n su ai nga nna tsun chye nga ai.Kaba wa ai ten hta gaw jaw ai shut ai lam hpe atsawm sha garan gin hka nna lata la chye nga ai.Ja chyum mungga hta e kaja ai zawn zawn n kaja ai zawn zawn rai ndai lam lahkwng pawng nna tinggyeng akyu tam nga ma ai nga nna tsun da ai hpe mu lu ai. Kasa 8: 18-20 hta kasa ni a lata mara akyu hpyi ya ai hte Wenyi hkam la lu ai hpe simun mu jang shi gumhpraw kasa Petru kaw sa sak nna, kade a ntsa e rai tim mung ngai lata mara jang dai wa chyoi pra ai Wenyi lu la na matu dai baw ahkaw ahkang ngai hpe mung jaw mi ngu nna hpyi lai wa ai.Shaloi kasa Petru chyawm gaw Karai Kasang a kumhpa hpe gumhpraw hte mari la lu na re ngu nna myit ndai majaw na a gumhpraw gaw nang hte rau hten bya mat u ga Kasa 13: 10-11 hta mung mabyin langai zawn sha mu lu nga ai.
Ndai bat na Marku a kabu gara shiga hta mung Yawhan gaw “ Sara e anhte kaw n hkan nang ai marai langai mi na a amying hte nat shaden kau ai hpe anhte mu hkrup sagaw ai raitimung anhte gaw n hkan nang ai majaw shi hpe hkum pat kau gaw ai ngu nna tsun ai ten Yesu mahtang shi hpe hkum hkum myit nye a amying hte magam amu galaw ai wa gaw nye a lam n kaja ai ga alawan tsun lu na kadai mung n nga ai. Anhte a gumlau maga e n nga ai gaw anhte hpang maga nga ai wa rai nga ai nga nna tsun da ai hpe mu lu ai.
Mungkan hpe bai gram taw nga ra ai ten hta e tinang ang ai magam bungli kawn lu tawn da ai Karai Kasang a shaman chyeju hpe atsawm jai nna gun hpai hkawm sa ai hku na shang lawm na ra nga ai.
Karai Kasang a sasana magam gaw masha shagu hta du na matu yawng gaw gahkyin gumdin let rau jawm galaw na mung ra nga ai. Lam magup ngai sha galaw na ngu ai masha hte n hten ai myit hpe la kau nna myit shawang kaba ai hte gam garan kachyan galaw sa wa na ahkyak nga ai.
Lai kyang hte kam sham ai lam n hkra dingsang masha shagu gaw hkaw tsun ga shaga na ahkang nga nga ai.
Masha wa a makam masham hpe yu n ra yang nra na re raitim masha wa hpe n ju n dawng ai lam gaw n mai nga ai.
Masha wa hpe mung lam numshe hkum madun tinang hkum nan mung masha wa a shut shai taw nga ai lam ni hpe kasi n la hkrup na ahkyak nga ai.
Ya tsun mat ai lam manga hpe dum chye la nna hkawm sa wa na nga yang tinang hkan shadik nga ai tara gaw jaw nga na re yawng hpe karai kasang shaman ya u ga.
Akyu hpyi saga- Oh hpan Madu Karai Kasang e chyeju mahkra matu chyeju dum ai hte nang wa hpe grau nna kam sham tsawra chye chyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nem nga ga ai. Amen
