Myanmar Mungdan a Saradaw kaba Cardinal Charles Bo gaw hka mawru a majaw hka hpyen tsinyam hkrum sha nga ai Myanmar Mung masha ni hpe garum madi shadaw ya na matu Mungkan mungdan ni hpe tsun shadut hpyi shawn lai wa ai lam Vatican shiga dap ndau shabra da ai kaw na chye lu ai.
September 9 ya shani kaw nna Ragi nbung laru hte marang kaba htu ai majaw Myanmar mungdan shara law law hta hka kaba nna masha sen ( 9 ) daram hka hpyen tsin yam hkrum sha ra taw nga ai. Ya aten shara law malawng hta hka hkyet mat sai raitim, n’gun kaba ai hka mawru a majaw dum nta ni law law hten za mat ai, hka hta yawng lawm mat ai, matut mahkai lam, hkawm wa hkawm sa lam ni hten mat ai, n kau shara dum nta ni hta hka naw ung taw ai mayak mahkak ni hte hkrum sha taw nga ai.
San seng ai lu hka n nga ai majaw hkamja lam a matu myit tsang ai lam nga ai. Tsan ai shara ginra ni hta malu masha, tsi mawan hte kaga hkyak hkyak ra kadawn ai arung arai ni dinghprut ai mang hkang hpe hkrum sha taw nga ai.
Myanmar mungdan masha ni yawng myit hkrum kahyin gumdin let ndai tsin yam tsin dam lam hpe hkam sharang tawt lai lu na lam Cardinal Charles Bo tsun n’gun jaw da nga ai hte hka hpyen tsin yam hkrum sha nga ai mung shawa ni hpe shinggyim nau na myit hte garum shingtau lam matut galaw ya na matu ya aten Vatican kaw du nga ai Cardinal Charles Bo kawn Mungkan mungdan ni hpe tsun shadut hpyi shawn lam galaw da nga ai.
