Madu Karai Kasang A Tsawra Ai Lam Gaw Anhte Kaw Na Galoi Mung Hka Mat Na Nrai
“Tsawra ai ni e, anhte shada da tsawra nga ga: tsawra ai myit gaw, Karai Kasang kaw na rai nga ai rai nna, tsawra ai myit rawng ai wa kadai rai timung, Karai Kasang kaw na shangai wa sai hte, Karai Kasang hpe chye chyang nga ai.”
1John 4:7
Karai Kasang a tsawra ai lam hpe anhte hkam la lu nga ai, ngu ai lam gaw asak jaw ai mau hpa chyeju nan rai nga ai. Karai Kasang a tsawra ai lam gaw anhte kaw na galoi mung hka mat na nrai. Madu a tsawra ai lam gaw, nhtoi a kashu kasha ni zawn nsin hpe htoi tu shangun lu hkra anhte hpe n gun atsam shabyin ya nga ai. Mathe 5:14-16 hta Madu Yesu tsun ai,
“Nanhte gaw mungkan ga a nhtoi rai nga myit dai, bum ntsa e de ai mare hpe shinggang lu na n rai; pyengdin hpe shatu nhtawm, mung npu e tawn da ai gaw, kadai n galaw yu ai; pyengdin shadun hta tawn da nna, dai gaw, nta e nga nga ai ni nlang hte hpe jahtoi ya mu ai. dai rai nna, masha ni gaw nanhte a kaja ai bungli mu lu nna, sumsing lamu e nga ai nanhte a kawa hpe shagrau sha-a lu mu ga, shanhte a man e nanhte a nhtoi hpe htoi tu shangun da mu law.”
Madu Yesu a hpang hkan nang ai anhte shi a sape ni hku nna, Madu Karai Kasang a tsawra ai salum hpe masha kaga ni mu chye wa hkra galaw lu nga ai. Karai Kasang a tsawra ai lam kade hkyik hkam kaba nga ai ngu ai lam hpe hkam sha chye yu sai anhte kam sham ai masha ni hku nna, dai Madu a tsawra ai nhtoi hte mungkan ga hpe htoi tu shangun ra nga ai. Anhte a nga sat nga sa, tsun shaga shamu shamawt lam ni hku nna dai Madu a tsawra ai salum hpe kaga masha ni mu mada chye na wa hkra hpaw malang dan na ra ga ai. Tinang a tinggyeng akyu hpe tam ai n re ai sha, daw jau ai lam ni galaw let Madu Yesu a shagrit shanem ai lam hpe madun shaleng dan lam anhte galaw mai nga ga ai. Masha ni n gawn n sawn galaw ai lam ni hpe hkrum wa ai aten ni hta, tsawra matsan dum lama ai lam ni hpe madun ai hku nna Karai Kasang a mai kaja ai lam hpe anhte madun shaleng lam galaw mai nga ga ai. Masha a man hta masu magaw lam ni galaw let tinang a arawng sadang hpe gaw gap lam galaw nga na malai, Madu Karai Kasang jaw ya ai chyeju n gun atsam hte teng man ding hpring ai prat hpe gaw gap nga sa lu mai ai, ngu ai lam hpe madun shaleng mai nga ai.
Karai Kasang a tsawra ai lam hpe gam garan jaw lam galaw na matu; Madu Yesu a Kabu gara ai shiga shachyam shabra ai magam bungli hta shang lawm gun hpai na matu; masha a man hta kasi kaja tai na matu; hpan da hkrum ai ni anhte rai ga ai. Ehp 2:10 hta Kasa Pawlu tsun ai, “Kaning rai nme law, anhte shi a magam bungli rai nga ga ai; mai kaja ai bungli shachyen na, Hkristu Yesu hta e hpan da ai ni gaw, anhte rai nga ga ai: dai mai kaja ai bungli hta anhte hkawm nga u ga, Karai Kasang gaw dai ni hpe shawng nnan e lajang tawn da mu ai.”
Dai ni anhte galaw ra ang ai magam bungli hpe Karai Kasang lajang tawn da nga ai. Tinang a prat hta Karai Kasang shabyin ya nga ai lam ni hpe gam garan lam galaw lu na ahkaw ahkang hpe tam nga ga. Karai Kasang a tsawra myit kaba hpe kaning rai gara hku madun shaleng lam galaw lu na ngu ai lam hpe myit nga ga. Anhte lu la sai Karai Kasang a tsawra ai lam hpe makoi ip da ai lam n galaw ai sha, shawang tsawra myit kaba hte kaga masha ni hpe bai gam garan jaw ga. Shinggyim masha yawng tam nga ai gaw Madu Karai Kasang a tsawra lam re, dai tsawra lam gaw htum mat ngu ai n nga, n law mat ai ngu ai mung n nga ai, ngu ai lam hpe dum chye nga ga.
Madu Karai Kasang hte bai matut gahkyin wa na matu ra kadawn dik ai ai dai ni na mungkan, Shi Madu a tsawra lam hte jahpring ya ai chyeju hkam la lu u ga, lawu na lam ni hpe sumru let Madu hapng de akyu hpyi ga:
- Karai Kasang ai tsawra ai salum hpe gam garan jaw lam galaw na ahkyak nga ai, ngu ai lam hpe sumru yu mai ai;
- Madu a tsawra ai lam hpe gam garan jaw lam shabyin na matu dai ni ngai galaw lu ai lam hpa nga ai kun?
- Dai ni, nye a tawra myit laksan madun la na ra ai masha langai ngai, shing nrai uhpung uhpawng langai ngai gaw kadai rai na kun ngu ai hpe mu mada wa lu hkra, Chyoi Pra ai Wenyi kaw akyu hpyi mai ai.
