Yanggon Mare Kaba Amyu Tha Zatyung Kaw, Hkritsan Wuhpung Hpawng nI Ginlung Zuphpawng Galaw
Myanmar mungdan kata nga ai Hkristan wuhpung hpawng ni yawng tsawra ai hte gahkying gumdin rai simsa lam de du wa lu na ngu ai Nawku Hpung a Ga manoi hte maren, galaw ai zuphpawng hpe Yanggon mare kaba Dagon Ninghtawn, Amyu Tha Zatyung kaw, ( 5. 10. 2024) bat kru ya shani hkying (1: 00) pm kaw na (3:20) pm du hkra galaw lai wa sai.
Nju ndawng ga, nju ndawng ai tara ni n chyam bra wa na matu ngu ai ga baw hte hkaw tsun hpawng hta, Nawku hpung shagu na dakasa ni shang lawm ma ai. Katawlik Nawku hpung a dakkasa hku na Wa Jau John Zaw Min Tun (Ygn) Sr. Flora Kong (SJA), Sr. Gabriella Om Pai (SJA), Sr. Veronica Tial (LWST) ni shang lawm lai wa sai.
Zuphpawng hta;
Wuhpung mali na dakkasa marai (4) kawn, tinang a Nawku Hpung a sharin shaga matsun ai lam hpe lakap nna simsa lam hte seng ai lam hpe madung hkaw tsun lai wa sai. Hkristan hpung a gawng malai hku nna Dr. Myo Win kawn ga tsun shaga ai lam hta sadi sahka ra na lam hte Madu Yesu a simsa ai lam hpe Chyum Mungga matsun hte gam garan gachyan ya ai.
