Hkristu hta tsawra hkung ga ai nu wa hpu nau ni ndai laban gaw shaning B a Pranwan Ladaw
28 rai nga ai

Mk 10: 23 shingrai Yesu gaw praw rai yu nna shi a sape ni hpe sut su ai ni gaw Karai Kasang
a mungdan hta nachying wa shang yak la ahka gaw ngu nna tsun da ai hpe mu lu ai.
Shawng nnan mabyin langai mi hpe tsun dan mayu ai. Moi kalang mi hta mawdaw htuk
shapraw ai sahte wa gaw shi a bungli galaw shangun ma ni hpe shata shabrai atsawm n jaw ai
sha n ga hkungga lara ai lam hte myit tau chye ya ai lam mung n nga ai. Ahkaw ahkang hpyi
ai shaloi kachyi mi mung n gayin yu ya ai.

Dai majaw dai bungli galaw ai masha ni hpe yu ai jau langai gaw shi hkum nan sahte wa hte
hkrum lu na matu shakut ai shaloi hpang jahtum hkrum na ahkang lu lai wa ai rai nga ai.
Sahte wa gaw dai zawn hkrum ai ten Wa jau ngai hpa garum ya ra na ta? Alu kade bang ya ra
na ta? nga nna tang shawn ai shaloi, rai sa sahte wa e ndai zaw hku kaw na na n pu de yu dat
yu u.

Hpa ni mu ta nga nna tsun ai ten aw dai wa i? nye a shangun ma ni bungli galaw nga ai hpe
mu ai ngu nna bai htan tsun ai ten atsawm sha bai yu yu u ngu nna tsun ai ten dai sahte wa
bai yu nga yang dolla gumhpraw dai hku pat kau ya nna hpa naw mu a ta ngu nna bai san ai
ten Wa jau she hku hpe gumhpraw hte pat kau nga mi gaw ngai hpa hpe mu sa na ta ngu nna
bai htan tsun dat ai.

Dai shaloi she Wa jau gaw sahte wa e gumhpraw hpe madung da nna bungli galaw wa ai ten
na a shangun ma ni yak hkak jam jau hkrum nga ai hpe nang n mu ya mat wa ai. Na ningmu
hta dollar gumhpraw ni hte pat kau dat ai a majaw na shangun ma ni a matu myi pat taw
nga ai lam rai nga ndai nga nna shadum tsun dat ai shaloi she shi a shangun ma ni a ra
kadawn ai lam,hpyi shawn ai lam ni hpe atsawm madat garum ya wa ai lam rai nga ai.
Ndai mabyin hta gumhpraw gaw sahte wa a myi hpe pat kau ai,n mu kau shangu ai. Masha
gaw ya zawn byin wa sai nga yang tengman ai lam hpe nmu mada wa ai. Karai Kasang hpe
mung n mu sai nga ai. Tara ai lam hpe mung n mu sai rai nga ai. Bai nna masha wa hta hpa
baw ra ai ngai hpa baw garum ya lu mai ai ngu n nga wa ai. Lam magup gaw tinang a matu
sha rai wa nna tinggyeng myit a matu sha myit wa ai rai nga ai.

Karai Kasang jaw ya shaman chyeju a majaw ngai ndai arung arai ja gumhpraw sut gan ni
hpe madu wa lu ai ngu ai hpe n dum chye wa ai. Chyeju n dum chye wa ai. Lam magup gaw
ngai galaw nna lu ai ngai chye nna ngai ngu ai myit ni hte sha hpring tup shara la wa ai.

Hpang jahtum e gaw gumhpraw sha shara la mat wa nna, gumhpraw hpe Karai Kasang shadu
nna shi a hpang hkan nang ai hte nawku wa ai rai nga ai.
Ndai lam gaw Karai Kasang hpe shingdu da nna ja gumhpraw tam ai sut hpaga masha ni
kawn Karai Kasang a shara hta gumhpraw gaw shara la kau ya ai lam rai nga ai. Nkau sahte
ni a matu alu ai masha hte Karai Kasang hpe shingdaw wa yang Karai Kasang gaw galoi
mung hpang ngu ai shara hta chyu tawn da hkrum mat ai. Tsa hte Karai Kasang, tsa hpe lata
wa ai dai majaw ndai masha ni a matu kasa Pawlu gaw philip 3:19 dai ni a jahtum ai gaw
hten byak ai rai nga malu ai. Dai ni a Karai Kasang gaw tinang a kaya kahpa hta shanhte a
gumrawng shara rai nga ma ai. Dinghta ga na arai hpe hkrai shanhte myit tsang nga ma ai..
Ga shadawn maw hpyi langai shi hpyi sha ai kaw kawk hte Karai Kasang hte shing daw wa
ai ten Karai Kasang hpe shingdu da kau ai re majaw kawk hpe nawku wa ai hte bung mat nga
ai. Ndai zawn mabyin lam gaw mungkan arai ni hpe grai nan myit majung jung ai lam.kaw
na praw pru wa ai majaw lu su ai masha ni hta grau byin chye nga ai. Dai majaw Madu Yesu
gaw ading tawk sha tsun ai lam hpe Mk 10: 23 sumsing mungdan shang mayu ai ni a matu
Madu Yesu a lam matsun ya ai lam gaw Mk 10: 21 Yesu shi hpe azi yu let shi hpe tsawra wu
ai rai nna lam langai mi nang naw ra nga ndai, nang wa su lu malu dut kau nna matsan mayan
ni hpe karan jaw u shingrai jang she sumsing lamu lamu ntsa e nang sutgan lu na rin dai, ngai
kaw mung sa hkan nang rit ngu nna tsun da ai hpe mu lu ai..
Ndai mungga hku tsun ga nga yang Madu Yesu zahte n mai galaw ai . Matsan ai ni tai mu,
matsan mayan hku nga mu, nta kaja ni hkum gap mu, mu mu mai hkum sha, nta shangawp
sha gap nga mu, madaw wut dek nta hte madang tsaw tsaw hkum nga mu ngu nna tsun mayu
ai lam gaw nrai nga ai.
Madung gaw ja sutgan tam ai galaw ai shakut ai mahkawng ai sha ai lu ai pyaw ai ndai lam
ni mai galaw nga ai . Raitim na mak law hpa ai manawn masham ai pawt sin dawng ai lam ni
hte makam masham ningra ai n nga ai.
Arawng aya marin ai, ndai ni a majaw Karai Kasang hpe shing du da yet kau ai prat zawn
tinang hte ni nawn ai ni hpe shingdu da n chye ai zawn galaw kau ai. Matsan ai ni kaw na
amyat kaba hte mawp la nna alu sak jaw ai lam galaw ai zawn re ai ndai lam ni hpe tsun ai
mung rai nga ai..
Anhte shinggyim masha ni gaw Karai Kasang a mungdan de man yawng nna lani hte lani lai
di nna gau ngwi ngwi rai hkawm taw ra ai prat a maw ru ndai lam hta e ndai rai ndai sut gan
ni gaw Karai Kasang jaw da ya ai hpe teng sha re ngu hkap la da na ahkyak nga ai. Ya na
zawn mai kaja lam a matu Karai Kasang jai lang na matu jaw da ya ai Karai Kasang a arung

arai ni hpe nlang ai sha dai hku tawn da nna sha marin nga na nga yang arung arai …ni hpe
nawku Karai Kasang hpe shing du da kau ai de du wa shangun ai.
Mtt 6: 19-21 Manut hte nhkan e sha jahten nna lagu lagut ni tawk htu nna lagu la lu ai.
Dinghta ga na sutgan hpe hkum mahkawng da mu.Manut hte nhkan n sha jahten lu nna lagu
lagut n lu ai sumsing lamu hta e nanhte a matu sutgan hpe mahkawng da mu ngu nna tsun da
nga ai..
Karai Kasang tinang jaw ya ai arung arai ja sut gan ni hpe mai kaja lam hte masha yawng a
matu akyu jashawn jai lang ai wa gaw sut gan nhprang rai hpe nhprang rai shara…Karai
Kasang hpe Karai Kasang shara kaw tawn da chye ai ni rai nga ai..
Ya na zawn gam jaw gam ya chye ai ni a arai gaw nhkan e n sha hkrum ai sha lagut e lagu la
n lu ya ai sumsing sutgan rai nga ai. Ya na masha ni a myit gaw shanhte a sutgan nga ai
sumsing mungdan hta du nga ai majaw galoi mung Karai Kasang a matu Karai a myi man tau
nna yawng a matu mai kaja lam hpe galaw nga lu ai rai nga ai..
Kolo 3: 1-2 Dai rai nna nanhte hkristu hte rau bai hkrung rawt nga ai teng myit yang gaw
hkristu gaw Karai Kasang a hkra maga e dung nga ai shara na ntsa arai ni hpe atam nga mu.
Ga ntsa arai ni hpe myit hkum manoi myit ntsa na arai ni hpe myit manoi nga mu.
Myen ga malai nga ai zawn arung arai gaw jai lang chye yang tsi, nchye lang yang gung re ai
zawn Nga rai mung de mung du shangun nga ai. Mtt 16:26 Masha gaw nga yawng nga pra
hpe kawm dawm amyat lu tim tinang a asak sum mat yang gaw hpa akyu nga lu ta.?
Mungkan hta hkawmhkam langai zawn sak hkrung lai wa nna si yang nga rai mung de du ai
ngu ai gaw masha tai sum nga ai. Dai majaw n grin ai lam ni hpe htani htana grin ai mungdan
a matu arung arai hku nna galai shai lu mai nga ai. Mk 10: 27 Yesu mahtang shanhte hpe
mada yu nna dai amu gaw masha n dang di lu timung Karai Kasang gaw ndang lu ai n nga ai.
Kaning rai nme law Karai Kasang gaw yawng mayawng hpe dang di lu nga ai..
Mtt 25:40 Dai rai nna hkawhkam wa gaw nanhte hpe ngai teng teng tsun made ga ndai ngai
nau ni hta na kaji htum ai wa hpe nanhte galaw ai gaw nanhte ngai hpe galaw manit dai…
Karai Kasang a kashu kasha ni yawng shawang myit kaba hte gam jaw gam ya chye ai kashu
kasha ni byin tai lu myit ga, yawng hpe Karai Kasang shaman ya u ga…
Akyu hpyi saga – Oh hpan Madu Karai Kasang e chyeju mahkra matu chyeju dum ai hte
nang wa hpe grau nna kam sham tsawra chye chyang lu ai hte nang wa a kabu gara shiga hpe
anhte a sak hkrung lam hta hkaw tsun sak se hkam lu na matu ra kadawn nga ai myit yan

marai hte n gun atsam chyeju ni hpe mung jaw ya rit anhte a Madu hkristu a marang e hpyi
nem nga ga ai. Amen.