“Madu e nang chyawm gaw, matsan dum chye ai sumnung re ai, myit galu ai,
chyeju kaba the, sadi sahka rawng ai Karai Wa, rai nga ndai.”
(Shakawn Kungdawn 86:15)
Sumsing lamu na anhte a Kawa gaw, myit galu kaba ai, sumnung dik ai Kawa rai
nga ai. Shi a tsawra lam kaba dik nga ai majaw, anhte hpe galoi mung shi a tsawra
ai hte jahpring da ya nga ai, ahkying aten shagu anhte hpe myit dik myit pyaw lam
shabyin ya nga ai. Madu Yesu Hkristu nawng ya ai hkungga a marang e anhte a
matu lajang da ya sai hkum tsup ai asak aprat hpe lu la hkra Karai Kasang gaw
anhte hpe myit galu kaba ai hte lam matsun shading sharai ya nga ai. Kam hpa ai
myit hte shi hpang de sit sa wa nna, shi hte rau gahkyin nga na matu, saw shaga let
galoi mung anhte hpe ala nga ai.
Luka laika daw kaba 15 hta, Madu Yesu tsun dan ai, dam mat ai kasha, Kawa
hpang de bai wa ai mabyin lam hpe mu lu nga ga ai. Matsat shabat lam ni galaw
hkawm nna, sutgan yawng ginlut shamat kau ai hpang bai wa ai kasha hpe tsawra
myit kaba madun nna kawa bai hkap tau la ai, si mat sai kasha hpe bai mu la ai
zawn kabu gara ai myit hte hkap la nna, kawa a sali kumhtaw ni hpe bai ap jaw ya
ai. Kawa a sharin shaga lam ni hpe lale kau nna hten bya lam hta hkawm sa mat wa
ai kasha, lani mi na nhtoi hta bai wa na re ngu ai myit mada lam kaba hte kasha
hpe myit galu kaba ai hte ala nga ai.
Mungkan a myit marin hpa lam ni hpe hkan tam na matu, Karai Kasang a tsawra
shim lum ai lahpyen hpe kau da ai lam anhte galaw ga ai. Mungkan lam ni hpe
myit marin ai a majaw, Kawa Karai Kasang jaw ya nga ai jet ai simsa lam hpe
anhte shingdu gayin kau da ai. Masha ni a tsawra manu shadan ai lam hpe lu la
yang myit dik myit pyaw lam lu la na re, ngu myit mada nna, Kawa a hkum tsup
dik ai tsawra mai kaja ai lam ni hpe n gawn n sawn di kau ai.
Anhte yawng gaw dam mat ai kasha zawn tai nga ga ai. Raitimung, Wa Karai
Kasang gaw anhte hpe myit galu kaba ai hte tsawra nga ai. Anhte hpe shi Madu ala
dingda nga ai, grai tsan ai kaw nna anhte hpe mu dat ai hte Karai Kasang gaw
anhte hpang de gat sa wa nga ai. Shakawn Kungdawn 86: 15 hta,“Madu e nang
chyawm gaw, matsan dum chye ai sumnung re ai, myit galu ai, chyeju kaba hte,
sadi sahka rawng ai Karai Wa, rai nga ndai,” nga nna tsun da nga ai. Ngai galaw
shut kau sai mara ni a majaw Karai Kasang ngai hpe ari jaw, je yang na nhten, ngu
myit nga ai aten, Karai Kasang chyawm gaw, “Reng htum ai hpun palawng alawan
la sa nna, ngai hpe jahpun ya ai; nye a lata hta lachyawp chyawp ya ai; lagaw hta
kyepdin din ya ai’ (Lk 15:22). Nye a mara ni a majaw shing gan de mayam langai
zawn ngai hpe gawt shapraw kau na nhten ngu myit nga ai aten, Karai Kasang gaw
‘kawn tawn ai dumsu kasha sat nna, kabu gara ai hte hkalum poi kaba galaw nna
ngai hpe hkalum la ai, (Lk 15:23-24). Karai Kasang a tsawra ai lam hpe lu la na
ngai n gying n dan mat ni ai, ngu nna ngai myit nga ai aten, ngai hpe tsawra ai
majaw hkum tsup ai asak jaw ya matu Kawa Karai Kasang a tsawra myit kaba hte
lajang ai Kasha a Udang hkungga hpe myit dum shangun nga ai.
Kawa a tsawra ai lahpyen hta asak hkrung nga mayu nngai. Madu Yesu lajang jaw
ya nga ai shi a hkum tsup ai lahpyen hta ban sa nga mayu nngai. Shi Madu hta lai
nna jet ai tsawra lam jaw ya lu ai shara gara kaw mung n nga nga ai. Hpan Madu
Karai Kasang a kasha tai nga lu ai a marang e lu la ai simsa lam hta grau ai simsa
lam gara kaw mung n nga mai ai. Madu Kasang Kasang a myit galu kaba dik ai
masin salum hta lai nna, jet ai shaman chyeju jaw ya lu ai shara gara kaw mung n
nga mai ai.
Tinang a shut hpyit ai lam ni hpe yin la nna Kawa Karai Kasang a nta de bai kayin
wa nga ga. Myit galu kaba ai hte n gun atsam rawng ai Karai Kasang a man hta
shagrit shanem ai hte sit shang nga ga. Anhte hpe sharawt la nna, tsawra myit
madun ya ai, reng htum ai hpun palawng jahpun ya na matu; lata hta lachyawp
chyawp ya na matu; lagaw hta kyepdin din ya matu ala nga ai Madu Karai Kasang
hpang de sit shang nga ga. Tsawra myit galu kaba dik ai Madu Karai Kasang jaw
ya mayu nga ai hkum tsup ai asak aprat hpe hkap la nga ga.
Lawu na lam ni hpe sumru akyu hpyi mai ai:
- Kawa Karai Kasang a tsawra myit galu kaba ai masin salum,
- Dam mat ai kasha zawn galaw shut lai wa ai lam ni tinang a prat hta kaning
re ai lam ni nga lai wa sai kun? - Shi a Madu a tsawra myit kaba anhte hpe jahpring ya lu u ga, shut hpyit kau
sai lam ni hpe hkyam sa hpyi nem let Kawa hpang de bai gayin wa ga.
