Hpyen majan hte seng nna gaw hpa naw byin wa na Wa Jau mung n chye ai. Ya tsun lu ai langai gaw matut manoi majan naw htat taw nga na re. Gara aten gara hku hkring mat wa na ngu ai gaw mung masa lam hta sha mahta nna byin wa na re. Anhte gaw mung shawa ni re majaw tinang a sak hkrung lam, sak hkrung hkra shakut taw nga na ahkyak ai. Hkam kaja hkra nga na ahkyak ai. Anhte hpaji hpe n mai jahkring ai, ma ni kaning re ai majan hta raitim anhte hpaji hparat hpe chye ai ni gaw sharin ya na, ma ni hpe jawng daw daw ai lam n byin hkra shakut na, ndai hpe anhte dating da ra ai.
Hkam kaja lam hte seng nna ya tsi mawan ni n nga wa sai, grai yak ai, ndai hpe ma anhte dum ga. Garum ningtum ni hte seng nna mung shanhte hta mayak grai nga ai. Ya aten ja gumhpraw shanhte hpe jaw ai, garum da ai gumhpraw ni pyi ya anhte gaw phone line n nga mat sai, internet n lu mat sai, ja gumhpraw gara hku n shalai ai. Shalai wa tim pyi dai ja gumhpraw ni gara hku lu ai, mana maka san jep ai, maigan de na gumhpraw shang wa na matu yak ai, shang wa ai gumhpraw hpe mung hpyen yen shara kaw du hkra lajang na yak ai. Malu masha tam na matu mung anhte yak mat wa ai. Dai majaw tsawra ai hpu nau ni garum ningtum ni mung dai hku mayak nga ai hpe dum shai nna anhte buga kaw nga taw nga ai masha ni nan n gun dat nna sak hkrung lam hpe jawm shakut na gaw grai nan ahkyak ai ngu nna mung tsun mayu ai re.
Ya ndai zawn re ai mayak hta matut manoi byin taw nga ai lam ni grai nga ai, langai mi gaw anhte hpyen yen mat wa sai shaloi anhte buga ginra shara ni tsawmra jahka da ai, 2011 ning hta hpyen yen ai ni mung myit yu hpa gaw kade ning naw yen na ta, ya nnan yen wa ai ni shara n lu ai, nanhte n kau mi, mai byin yang gaw tinang shara kaw tinang lagaw tinang tsap na ten grai na sai. Raitim anhte n shakut ai, jaw sha taw nga ai ni, garan ya taw nga ai ni nga nga yang ding yang jahpan hpe n shaw kau ai sha tinang kade lu lawm wa timung ding mying jahpan bang nna tawn da ai. Dai gaw Wa jau shadu yang gaw n kaja ai ngu nna tsun mayu ai. Ya nnan yen wa ai ni grai yak ai re, dai majaw tinang shara yen ya, mying jahpan ni bang ya, reng gaw n law htum nnan du wa ai ni hpe anhte garum la lu ai, dai hpe ma n’gun jaw mayu ai re.
Langai mi ma hpa re ta nga yang anhte buga ni hpe hpyen yen yen nna n wa ai re majaw mare buga kaw anhte a lamu ga ni hpe, htinghput htingra ni hpe jam jau jaw na matu ala taw nga ai hpyen tsadan gaw grai law ai. Lamu ga ginra hpe jahten kau na zawn zawn re ai lam ni, grai byin pru wa ai. Mang hkang kaba gaw dai lagnai mi mung re. Tinang buga hpe n makawp maga sai kaw nna gaw anhte buga gaw hten run hten za wa na chyalu re. Byin taw nga magang ai hpe mung nanhte mu mada na re. Dai majaw anhte a buga hpe makawp maga lamu ga atsawm sha makawp maga na matu mung myit hkrum myit ra hte jawm shakut na grai ahkyak ai.
Hpyen majan a hpang kaw naw bai hkan ai gaw masha hpe jam jau jaw ai nanghpam malu masha, ya mana maka rai taw ai. Ya nanghpam malu masha hte seng nna shara shagu kaw anhte grai nan sawng taw nga sai re. Nanghpam hte seng nna mung mana maka sawng ai hku anhte ramma ni a kata kaw byin taw nga ai. Ndai ni hpe nanhte anhte myit yu hpa re. Dai majaw makawp maga na hte seng nna wa jau grai n’gun jaw mayu ai. Shada da kahkin gumdin nna anhte ndai zawn rai hpyen ni law law a lapran hkawm taw nga sai re majaw anhte myit galu ai hte akyu hpyi ai hte hkawm ra ai.
Ndai zawn rai masha hpe jahten ai gaw tsadan a bungli re majaw gaw grau nna Karai Kasang a n’gun atsam hte sha anhte mai byin ai. Dai majaw akyu law law hpyi ra ai, makam masham hpe law law hkan ra ai. Ndai aten anhte yawng myit jam jau jaw lu taw nga ai re, myit ana kap ai, dai majaw lama mi byin sa nga i nga yang mung jahkring sha pawt mayu wa ai, myit n galu ai. Yawng hpe n’gun jaw mayu ai gaw dinghku kaw shada da mara shagun ai lam ni hpe koi yen lu hkra shakut ga, myit grai galu hkat ga, kashu kasha ni kanu kawa ni a ntsa e chye madat ga.
Ramma ni anhte, nanhte ya hkawm mayu ai lam ni grai nga ai, rai timung nlu hkawm sa mat wa ai, gara kaw hpaji hparat sharin la mayu ai, grai galaw mayu ai, n mai byin mat wa ai, maigan sa mayu ai yak mat wa ai. Raitim myit n daw ga, anhte lai nan lai lu na re. Ramma prat hpe ndai zawn re ai mayak tsinyam kata kaw ngut mat sai ngu nna kam mara rai nna asak hkrung ai gaw n kaja ai. Myit galu hkam sharang nna hpaji hpe manoi manat nna hkaja nga ga ngu nna n’gun jaw mayu ai. Tsinyam ndai hpe anhte rau sha lata gindun nna tawt lai lu na matu mung shakut ga, ndai zawn re ai tsinyam, ndai zawn re ai mung masa kaw na lawt na matu shakut shaja nga ai ni a matu mung akyu ja ja hpyi nna tinang hkum nan mung ndai tsinyam kaw na lawt na matu akyu rai nna anhte hkawm sa ga.
Ndai aten anhte yawng myit jam jau jaw lu taw nga ai re, myit ana kap ai, dai majaw lama mi byin sa nga i nga yang mung jahkring sha pawt mayu wa ai, myit n galu ai. Yawng hpe n’gun jaw mayu ai gaw dinghku kaw shada da mara shagun ai lam ni hpe koi yen lu hkra shakut ga, myit grai galu hkat ga, kashu kasha ni kanu kawa ni a ntsa e chye madat ga.
