Tsawra ai Nu Wa Hpu nau ni, daini na kabu gara shi ga hta e anhte hpe shadum ya nga ai gaw, masha ni e yu htang kaba hkra shakawng shakat rai arawng mala ai Hparishe ni a lai kyang hpe tsun shadum ya nga ai. Masha hpawng a man e rai jang tinang hpe yu htang kaba hkra galaw dan ai. Grai kam sham ding man ai wa zawn kyu hpyi nga sa tsun shaga chye ai lai kyang ni hte nga sa nna sumsing mungdan de sa na shakut hkawm sa ai rai yang awng dang ai lam lu la na n re. Shing rai anhte mung ndai Hparishe ni a arawn alai ni hpe koi gam let Karai Kasang a man hta san seng ai hku nga sa lu hkra shakut sa nga ga law.