RVA shiga madat ni san tawn da ai Ga San ni hpe Wa Jau Dr. Joseph Gawlu Yung Wa htai da ya ai.
Ga san ni
1). KBC lang ai Yehowa ngu ai ga-si gaw hpa lachyum kun? Bai galoi, gara kaw nna pru wa ai kun?
Madu Yesu a prat hta Karai Kasang a Mying “YAHWEH” ngu ai hpe nau hkrit hkungga ma ai majaw nsen n shapraw gwi ma ai. De a malai “Adoni” ngu nna nseng shapraw ma ai; dai gaw “Madu” ngu nna lachyum pru nga ai. Dai majaw, Yahweh hte Adonai yan kaw nna, “JEHOWAH” ngu nna bai shaga wa ma ai. Hebre ga rai nga ai. Dai majaw Jinghpaw hku “Yehowa” ngu ai gaw “Jehowah” ngu ai kaw na la ai rai nga ai. Ya hpang de gaw, Jehowah a malai Yaweh ngu nna lang mat wa sai.
2). Anhte Ramma Shayi, shadang sha ni sumtsaw sumra byin rai nna, mayu- dama htunghkring lam n jahta, num hkrungran ga shaka la ai lam mung n galaw, rau nga sha nga ai rai yang, Mara Raw Chyeju Kumla hkam la mai na kun? Chyoi Pra Hkum mai hkam ai kun?
Lam amyu my a majaw, dai hku gan jawm nga ra ai rai yang, tinang a Ginwang Up Jau the lawan jahkrup nna Hkungran Sakramentu shawng la ga. Dai hpang e she Chyoi Pra Hkum, Mara Raw chyeju kumla ni hpe hkam la lu na re. Tinang a Buga, Jau Sara ni the tsan ai shara hkan du hkawm nga ai, bungle galaw sha ra ai ni law law ng ana re. Myit n kaji ga yaw; Karai Kasang gaw matsan dum lama ai Kawa re. Myit masin san seng ai hte Shi hpang de akyu hpyi shakut ga. Shi lajang ya na re.
