Pranwan Ladaw 29 year B
Mk 10: 45 “Kaning rai nme law dai masha kasha wa pyi shangun ma hpe yam sha na nga nna du sa ai nrai, shangun ma a amu galaw daw ya na hte masha law law a matu mara shi asak hpe gawng malai jahpu shatai ya na nga nna du sa ai”
Hkristu hta Tsawra hkungga ai nu wa hpu nau ni ndai Laban gaw shaning B a Pranwan Ladaw (29) rai nga ai.
Sahte la kasha langai hte num kasha langai a tsawra hkat lai wa ai lam hpe tsun dan mayu ai. Shan lahkawng gaw kanu kawa ni myit hkrum ai a majaw hkungran lai wa ai rai nga ai.Madu wa gaw shi madu jan myit ru tsang pu ai lam n nga na matu shan a nta hta nchyang shangun ma ni shaga nna ra nrawng hkra madu jan a matu lajang da ya lai wa ai.
Raitim shata mi na ai hpang madu jan gaw kawa e ngai kachyi mi mung n pyaw nngai law ngu nna shi a madu wa hpe tsun dan ai ten rai taw kanu e ngai kawa hpa galaw ya ra na ta nga nna bai san ai ten, nta hta shaga da ai n chyang ni hpe hkum tawn da sa kawa shanhte hpe shara ra hta bungli mahtang shangun dat u.
Nta bungli ngu na shat shadu rai hkrut jasan jaseng ai lam mahkra ngai na a madu jan galaw na ngu nna tsun ai shaloi madu wa gaw nye a madu jan ya na zawn ba hkam nna galaw na hpe ngai n ra nngai. Hkum galaw law kanu e lau ban jan zawn sha nga u ngu nna tsun ai ten madu jan gaw kawa e ngai grai tsawra ai nye madu wa hpe ngai shat n shadu ya ai rai ni nhkrut ya ai rai yang ngai nang hte nga ai gara hku pyaw lu na ta? tinang a madu wa hpe tinang sha gawn lajang mayu nngai. Ahkang jaw rit yaw kawa e ngu nna ahkang hpyi ai shaloi madu wa mung hpyi ai hte maren nye madu jan nang myit ra ai hte maren galaw u ngu tsun dat ai shaloi madu wa hte madu jan lahkawng yan gaw myit ngwi myit pyaw kabu gara ai hte nga lai wa ai.
Shan a kabu pyaw ai lam gaw shangun ma ni kaw du hkra hkam sha lu shangun wa ai.Bungli shangun ma ni mung kabu gara ai hte bungli galaw nna, shada hku hkau kanawn mazum gam garan makawp maga hkat rai nna nga lai wa ai lam rai nga ai.
Tsawra ai nu wa hpu nau ni jet ai tsawra myit shawang kaba nga ai ni gaw masha wa hpe lata layung madi ai lam hta kabu ra sharawng ai lam n nga ai. Masha wa hpe mahtang ap nawng dau jau ai lam hta e kabu gara ai lam lu la ma ai.John Max Mary ngu ai wa gaw hpa lam mung lawt lu wa sai nga yang shingra tara masa nan dai hku hkrang shapru galaw sa wa chye nga ai nga nna tsun lai wa ai.
Alezendra Pathon ngu ai wa mung masha wa hpe daw jau lu na matu tinang hkum madu tai hkra shakut ra nga ai nga nna tsun da nga ai. Tinang hkum hpe dang lu ai wa chyu sha masha wa hpe daw jau lu na rai nga ai. Bai nna gara lam ni hta shang lawm na raitim jin jin rai nga ai.
Tsawra ai nu wa hpu nau ni kasi kamang la lu na matu lam masum hku nna tsun dan mayu ai. Langai hta gaw anhte yawng gaw lam mi nrai lam mi kaba ai shara ngu na hta nga mayu chye nga ai. Kasa Yawhan hte kasa Yaku yan mung kaba ai shara hta nga mayu ai myit ni nga lai wa ai hpe mu lu ai.
Yawhan 1:37-41 Dai Sape yan gaw shi tsun ai ga na nna Yesu kaw hkan sa ma ai. Yesu gaw kayin yu nna dai yan hkan sa ai hpe mu wu yang nan hpa tam myit ta? ngu nna hkap san mu ai. Shan gaw Rabai e nang kanang nga n ta? ngu nna san mu ai. Yesu gaw sa marit shaloi nan mu na marin dai ngu nna shan hpe tsun wu ai.
Dai re majaw shan sa nna shi nga ai shara kanang re ai mung mu ma yang dai shani tup shi hte rau nga nga ma ai. Yawhan tsun ai ga na nna shi kaw hkan sa ai yan hta na langai mi gaw Simun Petru a kanau Andre rai nga ai. Dai wa gaw shi a kahpu Simun hpe shawng mu nna an gaw Meshia hpe mu saga ai ngu nna tsun ai lam rai nga ai..
Mk 1:20 Shaloi jang shi shanhte hpe shaga mu ai. dai rai nna shan gaw shan a kawa Zebedi hpe nchyang ni hte rau dai li hta jahti da nna shi Madu kaw hkan nang ma ai.
Ndai bat na Marku kabu gara shi ga hta tsaw ai shara kaba ra sharawng ai myit a matu mara n shagun ai sha shading sharai ya ai lam hpe madaw galaw nna daini e langai nrai yang langai shara lu mayu chye ai anhte a sharawng awng ai lam hpe Madu Yesu sharai ya nga ai. Mungkan hta ahkaw ahkang lu ai wa gaw tinggyeng myit grai rawng yang npu na ma ni grai jam jau hkrum katut nga ai..
Lahkawng hta gaw Mk 10: 43-44 hta nanhte hta chyawm gaw shingrai nga ai nrai.Nanhte hta grau mayu ai wa kadai raitimung nanhte a ali ama tai u ga. Nanhte hta baw tai mayu ai wa kadai raitimung nlang a mayam tai u ga ngu nna tsun da ai.
Ndai mabyin lam hpe lam lahkawng hku garan nna mungga la nga ga. Ap nawng daw jau ai magam lam hpe sut masa bungli hku nna shakut shaja chye ai masha ni nga nga ai. Philipine mungdan na jak sau seng shagu hta ga lashum kadun ka tawn da ai hpe mu lu ai. Dai gaw service is our business anhte sut masa magam bungli gaw dau jau ai lam rai nga ai nga nna ka shakap da ai rai nga ai.
Ndai ga si hpe mu hkrup ai masha shagu hpe ra nrawng hkra garum ya ai seng shagu company ni hta grau nna mari ai hpe mu lu na mung rai nga ai. Madu Yesu a hpyi shawn ai lam gaw ndai zawn lam hta grau ai rai nga ai. Lachyum grau mung sung nga ai..
Madu Yesu gaw anhte marai hkum ngau shagu kaw na sak jaw ap nawng ai lam hpe hpyi shawn nga ai zawn jaw na hpe mung myit mada nga ai. Anhte ap nawng daw jau ai lam gaw mying kaba na matu arawng aya tsaw na matu sut masa byin na matu daw jau taw nga ai lam n mai rai nga ai. Karai Kasang a myu masha hpe ap nawng daw jau nga ai lam nan gaw chyeju hta chyeju rai nga ai..
Karai Kasang gaw hpang jahtum e kumhpa shagrau na ngu ai hpe chye tim Karai Kasang gaw kadai hpe mung grai rai nna shagwi ai lam gaw n galaw nga ai. Tinang hkum nan wanglu wanglang lata la shangun nga ai. 1cor 9:19 – 23 Ngai gaw shingrai gade a ahkang npu e n nga timung malawng maga hpe lum la lu hkra yawng mayawng a mayam ngai tai nga nngai.
Yuda ni hta e Yuda masha zawn ngai tai nga nngai ngai hkum tara npu e n nga timung tara npu na ni hpe zinlum lu hkra tara npu na ni hta e tara npu e nga ai wa zawn ngai tai nga nngai. Ngai hkum Karai Kasang kaw tara kata ai wa n rai. Hkristu a tara npu e nga ai wa ngai rai nga nngai. Raitimung tara kata ai ni hpe zinlum la lu hkra tara kata ai ni hta e tara kata ai wa zawn ngai tai nga nngai..
2cor 4:5 hta kaning rai nme law anhte gaw tinang a lam hkaw dan ga ai n re ai sha Madu hkristu Yesu a lam hpe mung anhte nan Yesu a jaw e nanhte a mayam ni rai nga ga ai lam hpe mung hkaw dan nga ga ai..
Masum hta gaw ndai bat na jachyum mungga rai nga ai.Mk 10:45 kaning rai nme law dai masha kasha wa pyi shangun ma hpe yam sha na nga nna du sa ai n rai shangun ma a amu galaw daw ya na hte masha law law a matu mara shi asak hpe gawng malai jahpu shatai ya na nga nna du sa ai nga ai lam rai nga ai..
Ndai chyum daw gaw Madu Yesu hta tinggyeng myit kachyi mi mung n nga ai hte tsaw dik ap nawng daw jau ai lam hpe madun dan ai lam rai nga ai. Ndai lam hpe mung lam lahkawng garan nna mungga la mai nga ai..
Messial ngu ai Jan Mau gaw Karai Kasang ngu ai lachyum hte myi htoi ni tau nau hkaw tsun tawn da lai wa ai amying shingteng rai nga tim, Isaraela myu ni gaw mungkan a Hkye la Madu hku nna lachyum chye na hkap la da ai majaw Madu Yesu gaw hkye la Madu ngu ai lachyum pru ai rai nga ai. Messial ngu ai Jan Mau hpe shi hkum a matu n jai ai sha Danela 7 kaw na mungkan htum ai nhtoi shani tara jeyang na matu summwi jawn nna du sa wa na masha e jaw tawn da ai shi a Jan Mau hpe sha madung da jai lang lai wa ai..
Dai majaw Madu Yesu shi hkum nan son of man masha kasha nga nna jahkring hkring tsun shaga lai wa ai rai nga ai. Masha kasha gaw law law hkam ra na lam hte seng nna Easia 52:13-53:12 yu mu nye a shangun ma gaw awng wa na ra ai. Shi gaw shagrau shatsaw hkrum ai hte hpung shingkang rawng nna nachying galu kaba na ra ai.
Na a lam masha law law wa mau mahka nga ma ai. Shi a myi man gaw masha ni a myi man hta shi a gawng shing yan gaw shinggyim masha ni a hkum hkrang hta ahpraw nsam grau hten wa ai. Shing rai shi gaw amyu baw law law hpe kanawng shabra kau na ra ai. Hkawhkam ni mung shi a man e tinang n gup pat kau na mara ai.
Lahkawng hta e Madu Yesu a hpang hkan nang ai masha shagu shi Madu a nni nkri lam hpe garan hkam sha na hpe sharawng awng na ahkyak nga ai.Ndai bat na Marku a kabu gara shiga hta e Yaku hte Yawhan yan hpe Madu Yesu hpyi shawn ai lam gaw Mk 10: 38 Yesu mahtang nan hpa hpyi nga ai hpe nan nchye myit dai. Ngai lu ang ai gawm hpe nan lu lu na rai nga myit ni? ngai hkam la na Baptisma hpe mung nan hkam la lu na rai myit ni ? ngu nna san ai lam rai nga ai.
Mungga hta lawm ai gawm hte kashin ai lachyum hpe yu ga nga yang, nni nkri lam a gawng malai rai nga ai. Gawm hte seng nna Mk 14:36 aba wa e yawng mayawng nang shabyin lu ndai, ndai gawm hpe ngai kaw na shalai kau ya e raitimung nye a myit ra ai n rai na a myit she rai u ga ngu nna hpyi ai lam rai nga ai.
Kashin ai lam hte seng nna Lk 12:50 raitimung ngai hkam na Baptisma langai mi naw nga ai. Dai garai n hkam hkam gaw ngai nachying kyin la nga nngai.
Dai majaw mungga hta lawm ai Kasa kaba yan hpe yu dat yang Kasa shi lahkawng hta Yaku gaw shawng nnan Madu a matu du daw sat hkrum nna sai hkungga nawng lai wa ai rai nga ai.
Hkristu a share shagan rai nga ai hte Kasa Yawhan bai rai yang gaw Madu Yesu a matu nni nkri hkam nna zinglawng langai mi de gawt shapraw hkrum ai hte zingri zingrat amyu myu hkam let sat n hkrum ai sha asak kaba ugut gu nna si wa ai wa rai nga ai.
Shiga madat nu wa hpu nau ni yawng Karai Kasang hpe tsawra chye ai kashu kasha ni tai lu myit ga ngu akyu hpyi ya dat nngai law.
Akyu hpyi saga – Oh hpan Madu Karai Kasang e chyeju mahkra matu chyeju dum ai hte nang wa hpe grau nna kam sham tsawra chye chyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nem nga ga ai. Amen
