Shiga madat ni hpyi shawn da ai ga san hpe Wa Jau Dr. Joseph Gawlu Yung Wa htai da ya ai hpe madat hkaja la ga.
Ga san ni;
Waimaw Jau Ginwang, Jamga mare kaw nga lai wa nna, ya, Miwa Mung, Htin Chung e shanu nga ai Easter Dashi Hkawn Ra:
1). Myu hte mungdan hpe makawp maga let tai hpyen ni hpe kasat ai, sat ai rai yang mara lu na kun?
Tinang a mungdan hte Amyusha ni hpang de N TARA ai hku tawt lai shang wa nna adip arip rai wa ai hpyen ni hpe tinang a mungdan/Amyusha ni hku nna shingla gasat ai hpe “just war” TARA AI MAJAN ngu nna masat ma ai. Dai zawn re ai LAI N MAI re ai majan hkan Hkristan ni mung lawm wa chye nga ai.
2) Nam maling hkan jau-gawng gawng ai ten hta, masha hpe myi le le nna gap sat kau hkrup ai rai yang mara kade kaba ai kun?
Masha langai mi hpe sat kau hkrup sai majaw, mara gaw tai sai; Dingsang n ju ndawn, pawt singdawng nna masha sat ai daram gaw n rai nga ai.
Dai gaw byin yu sai/ byin chye ai lam rai nga ai. Masat da ai tara/ htung lai ni hte jawm jahkrup jahtuk la ai baw rai nga ai.
Shwili Jau Gingwang, Loilun Sara Ninghtawn, Uten Pa mare kaw shanu nga ai
Peter Zinghtung Aung:
3. Anhte nta masha ni gaw hpung masha rai nna, Wa Di nta ni gaw nat jaw naw rai taw ai. Wa Di a nta na wungli nat galaw yang anhte hpung masha nta ni hkungga wa mai shaw karum na kun?
Wunpawng sha ni, Kaji, kawoi, Hpu-Nau, Mayu-Dama, Kahkri-Katsa ngu nna hkik hkam tsawm htap ai HTUNGHKING lu ga ai. Wa Di Nat jaw na matu n re ai sha, shih pe hkungga chyeju dum shakawn ai hku nna garum u. Na a myit hta mung dai Wunli nat hpe jaw ai ngu ai myit hkum bang da. Wa Di a matu, Missa Hkungga hpyi let akyu hpyi ya u.
