Wa Sarabyin Francis gaw, makam masham lam a majaw, Syria Mungdan hta sat kau hkrum ai San pra ai masha marai 11 lawm ai, San Pra ai masha ningnan marai 14 a matu, Canonization Missa hkungga hpe woi awn let, shanhte gaw Yesu a magam bungli hpe kangka sadi dung ai hte sakse hkam gun hpai lai wa ai ni rai nga ai hpe madi madun tsun lai wa ai.
Wa Saradaw Francis gaw, Lai wa sai laban shani hta san pra ai masha tai wa sai, Wa Jau Manuel Ruiz López hte shi a share shagan manang marai sanit rai nga ai, Brother Francis, Mooti, hte Raphael Massabki, Wa Jau Joseph Allamano, Mama Marie Leonie Paradis, hte Mama Elena Guerra , shanhte langai hpra gaw share shagan kasi kamang madun dan ai ni rai ma ai. Shanhte a laklai ai hte shaga la ai lam ni hpe ta tut gun hpai lai wa ai ni mung rai nga ai nga nna tsun lai wa ai.
Mungkan Sasana Laban nhtoi shani e San Peter shawa pa kaba hta galaw ai Canonization Missa hkungga hta Wa Sarabyin hku nna, “Ndai chyoi pra ai masha nnan ni gaw Yesu a kasi kamang lam hku sak hkrung nga let, daw jau ai amu magam hpe galaw lai wa ma ai.” re nga nna mungga jaw tsun lai wa ai.
Shanhte galaw ai makam masham hte sasana amu gun hpai ai ten shanhte a mungkan ra marin ai myit ni hte ahkaw ahkang lu na matu galaw lai wa ai lam hku n re sha, dai hte ninghtan shai ai hku, shanhte zawn kam sham nga ai hpunau na ni a matu ningchyang mayam ni tai let, kaja ai lam galaw ai hta shakut ai, yak hkak ai lam ni hta ngang kang ai hte jahtum du hkra daw jau ai magam hpe gun ai ni tai ma ai,” nga nna tsun lai wa ai..
Shanhte a sakse hkam ai lam gaw, Hkristan ni gaw arawg sadang hpe tam na matu n re ai sha, Yesu hta dawjau ai hte madat mara Chye ai ni tai nga na matu saw shaga ai lam Wa Sarabyin kawn tsun lai wa ai.
Ngai lu ai gawm hpe nang lu lu na kun?’
Marku a Kabu Gara Shiga hpe la nna, Yesu gaw Shi a sape Yaku hte Yawhan hpe san lai wa ai sung htum ai ga san ni hpe myit sumru yu na matu Hkristan ni hpe saw shaga ai: “Nanhte a matu ngai hpa galaw ya ra na ta?” hte “Ngai lu ai gawm hpe nang lu lu na kun?” Ndai ga san ni gaw anhte a makoi magap da ai ra sharawng ai lam ni hpe nhtoi htoi tu shangun nna, tinang hkum hpe sha myit mada ai ngu ai hkalem hkalau ai lam ni hpe yeng seng kau ya ai lam, Wa Saradaw Francis tsun lai wa ai.
Ndai ga san ni a marang e, Yesu gaw shi hte grau ni htep ai hku hkau lam nga na matu anhte hpe mung shaga nga ai lam Wa Sarabyin tsun sang lang dan lai wa ai.
Shi tsun ai hta, Yaku yan Yawhan gaw sadi dung ai sape ni rai nga tim, mungkan a arawng aya hta myit mada ai lam ni hte, arawng aya hte ahkaw ahkang ni hpe tam let Yesu hpang de sit sa lai wa ai rai nga ai.
Shan gaw Shi a hkra maga hte pai maga de Shi a hpung shingkang arawng sadang hta shara lu na matu ra sharawng ma ai, yawng hpe dangdi lu ai Madu hpe myit mada nna, n’gun atsam hte up hkang lu na re ngu myit la ai. Raitim, shanhte a chye na ai lam gaw n jaw nga ai hpe tsun lai wa ai.
“Yesu gaw shanhte a hpyi shawn ai lam hpe daru ai lam n nga ai sha, grau sung ai hku sawk sagawn nna, shanhte a ga a hpang e nga ai ra sharawng ai myit ni hpe hpaw tsun dan lai wa ai. Shi gaw anhte hpe shadum tsun ai zawn, shinggyim masha ni a myit mada ra sharawng ai hta lai nna mu lu na matu shanhte hpe shadum ya ai.”
