“Nanhte hta, sagu latsa lu nna, langai mi mat yang, dai jahku shi jahku hte hpe, nam e naw tawn da nhtawm, mat ai sagu hpe mu la hkra, n hkan tam ai, kadai wa nga na rai ta?.” ( Luka 15: 1-10 )
Tsawra la ai Nu Wa hpunau ni e, Dani na Ja Chyum mungga gaw, Madu anhte ni hpe kade ram manu shadan, kade ram tsawra ai, lanu lahku nga ai, ngu ai lam madun nga ai.
Anhte a manu shadan ai rai ni, ga shadawn Phone, Computer, Bank Card, Gumhpraw Sumbu zawn re ni mat mat yang, baw she sin hkra, tam chye nga ga ai. Tam ai lam gaw, anhte a, rai ni hpe manu shadan ai majaw, bai nna rai ni mung manu dan ai majaw rai nga ai. Lai mat wa sai, June Shata hta, Ngai, Masha kaba langai a Passport hpe tawn shamat kau ai majaw yup mung npyaw, sha mung nmu rai, lahkawng ya tam kau ai. Hpang jahtum she mu la ai. Passport sha mat ai pyi, she n mai yup mat hkra byin mat wa ai. Madu Yesu a matu anhte ni gaw ja sutgan hte arung rai ni hta grau manu dat ai ni rai nga ai.
Madu Yesu gaw, anhte shinggyim masha ni hpe grai manu shadan da nga ai. Hpa majaw ta nga yang, shinggyim masha ni hpe shi a hkrang sumla hte maren, hpan da ai majaw rai nga ai. (Ningpawt Ninghpang Laika 1:27) “Shing rai Karai Kasang gaw shi a hkrang sumla hte maren, shinggyim masha hpe hpan da wu ai.” Anhte hkum ngau shagu gaw, Madu a matu manu dan dik ai ni rai nga ga ai hpe galoi mung myit dum nga ga.
Anhte a shut hpyit mara a majaw, Madu hte tsan mat wa na hpe, shi n ra sharawng nga ai. Anhte shinggyim masha ni manu shadan chye ai rai ni, anhte ni the tsan mat na, nra ai zawn, Shi Madu mung manu shadan ai, anhte ni yawng mung, shi hte rau nga nga na matu sha, ra sharawng nga ai. Anhte a shut hpyit mara a majaw, Madu hte tsan mat ai ten ni law law nga nga ga ai. Raitim Madu gaw, anhte myit malai lu nhtawm, shi hpang de bai wa na hpe myit mada nga ai. Shi hkum nan mung lam dam taw ai ni anhte hpe tam hkawm taw nga ai.
Dai rai nna, anhte galaw lai wa ai, mara a majaw, Madu hte tsan mat wa ai hpe myit dum dat jang, htaw- law- nga, n-myit taw ai sha, anhte a mara tawng ban n-na, Madu hpang de bai nhtang wa nga ga. Shi Madu gaw, anhte shi a kashu kasha ni, myit malai ai hte, wa na hpe galoi mung a la nga ai.
Shi Madu, anhte ni hpe, manu shadan ai zawn, anhte ni mung shi a, manu dan ai ni tai ra nga ga ai. Shi Madu hpe, kam hpa, manoi manat chye ai ni, Madu a tara lam ni hpe shadik shatup chye ai ni, shi madu nra ai bungli ni hpe koi yen kau chye ai, shi a manu dan la ai sagu ni tai nga ga.
