Wa Sarabyin Francis gaw lai wa sai laban shani na Angelus hta shinggan kaw mu mada ai nsam ni gaw ahkyak n re ai sha, anhte shada da tsawra hkat ai lam gaw ahkyak nga ai hpe tsun lai wa ai.
Dai shani na Marku a kabu gara Shiga hta lawm ai kaba htum ai tara kanu lam gaw hpa re ngu nna tsun da ai lam hpe bai sanglang dan ai hta ndai ga san gaw lai wa sai chyum laika prat a matu sha nre, “anhte a matu, anhte a prat hte anhte a makam masham hkrun lam a matu mung ahkyak nga ai.” nga nna tsun lai wa ai.
Shani shagu na sak hkrung lam ngu ai hta anhte galaw ra ai lam ni hte amu bungli ni a lapran hta, ka up kau ai hte hkrat sum mat chye ai majaw, Wa Sarabyin gaw, “ngam ai lam yawng pru wa ai a ginjaw hpe gara kaw na mu lu na kun?” Kabu Gara Shiga hta Yesu gaw laika ka sara ni hpe tsun ai zawn, Karai Kasang hpe tsawra ai hte htingbu wa hpe tsawra ai ngu ai ndai tara lam lahkawng hpe kalang lata tsun mahtai jaw lai wa ai. Wa Sarabyin Francis gaw ndai lam lahkawng hpe “Hkristan prat a masin salum” ngu nna tsun shamying lai wa ai.
Asak hkrung lam a myit masin hte makam masham .
Wa Sarabyin gaw, San Peter shawa pa kaba kaw du nga ai masha shagu hpe, “sak hkrung lam hte makam masham a myit masin de bai nhtang wa na matu” tsun shadum da nga ai, hpa majaw nga yang, “myit masin gaw anhte a n-gun atsam, kam sham ai lam, myit rawt ai lam hte dawdan ai lam ni a npawt nhpang rai nga ai” nga nna tsun lai wa ai.
Ahkyak ai gaw shinggan kaw mu mada ai arawn alai ni n rai, Karai Kasang hta myit masin hpaw tawn da let tsawra myit hte htingbu wa hpe myit masin jin Jin rai hpaw ya ra ai lam rai nga ai,” nga nna Wa Sarabyin sang lang dan lai wa ai. Anhte a prat htum wa ai ten hta, anhte jaw lai wa ai tsawra myit hte tek jum nna n jaw lai wa ai tsawra myit a matu jahpan jaw ra na re ngu nna mung yawng hpe shadum tsun lai wa ai.
Hpang jahtum hku na, Wa Sarabyin gaw, Shawa pa kaba kaw du nga ai hkying Kaba re Masha ni hpe lit langai jaw Lai wa ai: Karai Kasang hte htingbu ni hpe gara hku tsawra ra ai lam hpe myit sumru shangun let, shani shagu tinang a myit masin hpe jep joi ai lam galaw na matu tsun lai wa ai.
Dileksit Nos
Wa Sarabyin Francis a hpang jahtum na encyclical, Dilexit nos hta Yesu Hkristu a masin salum hte Karai Kasang a tsawra myit hpe shinggyim Masha ni a matu ap nawng da nna, Madu Yesu a salum ningsang hta ningnan bai ap nawng gram lajang da na matu tsun let. Mungkan hpe galai shai lu na matu anhte a myit masin hpe shawng galai shai ra ai lam Wa Sarabyin tsun lai wa ai.
