“Kunhting wa gaw, nye madu ngai hpe, kunhting aya na jahkrat kau ni ai: ga htu ga chye na mung, ngai n di lu nngai; hpyi lu hpyi sha na mung, ngai kaya nngai.” ( Luka 16: 1-10 ) Tsawra la ai Nu Wa, Hpunau ni e; anhte hkum ngau shagu mung Madu a Kunhting ni rai nga ga ai hpe galoi mung myit dum nga ga. Daini hti ang ai Ja Chyum mungga hta, Kunhting langai mi gaw, Sahti wa a ja sutgan ni hpe, jai shamat kau ya ai majaw, Sahti wa gaw Kunhting aya kaw nna, dawm la kau hkrum ai lam hpe na lu nga ga ai. Kunhting ngu ai aya gaw, Sahti wa a rai ni hpe, makawp maga ya ai wa sha rai nga ai, Kunhting wa lu ai rai ni nrai nga ai. Dai re ai majaw, Kunhting ngu ai wa gaw, lani mi, shi a Sahti wa hpe, jahpan ni hte hpawn rai ni hpe, bai ap ra nga ai. Madu gaw anhte ni a Sahti wa rai nna, anhte ni gaw Madu a Kunhting ni rai nga ga ai. Anhte ni yawng hpe, Madu gaw shi a Sutgan ni law law ap da nga ai. Anhte hkum ngau shagu hpe, nbung ai Sutgan ni ap da nga ai. Nkau ni gaw Sut Du, Hpaji Du, Hpyen Du Kaba, Tsi Sara, Jawng Sara, Jak Sara, Hkawhkam Hkawseng, Tara agyi ni, Nawku Hpung hpe woi awn ai ni, Mungkan hpe woi awn ai ni tai nga ai. Sut Du a, Kunhting wa gaw, shi hpe ap da ai Sutgan ni hte, masha ni hpe, dang sha hkawm, dip sha hkawm rai taw nga yang gaw, Kunhting kaja n byin na rai nga ai. Dai hte maren, Hkawhkam Hkawseng ni, Hpaji Du ni, Hpyen Du ni, Tsi Sara, Jawng Sara ni mung, shanhte ni hpe ap da ai, Sutgan ni hpe, rap ra ai hku, n lang jang gaw, Madu hpe jahpan bai jaw ai shani jam jau hkrum na rai nga ai. Anhte ni hpe jaw da ai, Sutgan ni gaw, anhte ni hpe Kunhting wa zawn, Madu ap da ai sha rai nga ai. Anhte ni lani mi, Shi Madu hpe jahpan ni bai jaw ra na rai nga ga ai. Madu a Kunhting tai nga ai ten, anhte ni hpe ap da ai Sutgan ni hte anhte ni hpa baw a matu jai lang nga ga ai kun? Myit pyaw hpa, arawng lu hpa, masha ni hpe dang sha, roi sha na matu, sha Madu ap da ai Sutgan ni hpe lang taw nga yang gaw, Madu anhte hpe jahpan hpyi ai shaloi jahpan atsawm nlu jaw ai ni tai wa na rai nga ga ai. Madu ap da ai, Sutgan ni hpe atsawm sha jai lang nhtawm, Madu hpe chyeju dum chye ai ni, Shi hpe shakawn shagrau chye ai ni, manaw manang, makyin jinghku, hting bu hting byen ni hpe tsawra matsan dum chye ai ni byin tai wa ra nga ga ai. Bai anhte kaw ap da ai Sutgan ni hte ndai Mungkan ga na matu sha nrai, Sumsing Mungdan a matu mung, jai lang chye ai ni tai ra nga ga ai. Madu hta grau nlu nlawm ai ni, matsan mayan re ai ni, jamjau jamhkau hkrum nga ai ni, Madu a hpang hkan na shakut nga ai, nawku hpung a magam gun nga ai ni hpe anhte kaw ap da ai Sutgan ni hte garum la ai a marang e, Sumsing Mundan a matu mung, mai mahkawng da nga ga ai. Daini na Ja Chyum mungga hta, Kunhting aya kaw na jahkring kau ai hpang, Kunhting wa hpa nchye galaw sha ai lam mung, na lu nga ga ai. Madu gaw anhte hkaum ngau shagu hpe lam amyu myu hku nna Kunhting ni shabyin shatai da nga ga ai. Madu anhte ni hpe Kunhting aya kaw na, jahkring kau jang, anhte ni mung hpa nchye galaw sha mat na rai nga ga ai. Kunhting ngu ai wa gaw shi hpe ap da ai Sutgan ni hpe hparan na ahkaw ahkang lu nga ai. Raitim Kunhting aya kaw nna jahkrat kau jang, Sahti wa a Sutgan ni hpe hpa nmai hparan mat nga ai. Anhte Madu a Kunhting ni mung, Madu anhte hpe Kunhting aya kaw nna, jahkrat kau jang shi a chyeju ahkaw ahkang nlu mat jang gaw Mungkan ga ntsa hta pyi, sak hkrung hkawm sa na nloi nga ga ai. Dai majaw sak hkrung hkawm sa nga ai ten hta, anhte ni yawng Madu a ding hpring ai, kam hpa mai ai Kunhting kaja ni byin tai wa hkra shakut hkawm sa nga ga.
