Anhte nawku hpung magam gun ai ngu gaw shinggyim masha atsam hte gun ai gaw n re, raitim anhte chye na ai gaw nawku hpung hpe woi awn ai gaw masha rai nga ai. Karai Kasang nan sa dung nga nna yu ai gaw n re, Saradaw ni mung shinggyim masha sha re, jau ni mung masha ni re.
Raitim anhte a atsam hte anhte nawku hpung makam masham ningbaw ningla galaw ai re majaw gaw tinang a atsam hte gaw n mai byin ngu ai hpe ngai gaw hkrak sha chye ai. Karai Kasang a atsam hte sha mau hpa byin taw nga ai re, anhte masha atsam hte sha gaw n re. Masha a atsam mung gaw ra ai. Dai chyawm gaw masha a nyan atsam mung ra ai.
No ( 1 ) gaw anhte Karai Kasang a magam gun ni gaw Wenyi grai n’gun rawng ra ai, makam masham hta akyu hpyi ai, shawa a man e shawa akyu hpyi ai sha n re, kadai n mu ai gawk kata kaw tinang hkrai akyu hpyi ai zawn re ai, spirituality wenyi n’gun hpring taw nga ai masha ni rai ra ai hpe galoi mung myitdum ai.
Karai Kasang a man e n mai byin ai hpa mung n nga ai. Dai majaw Karai Kasang sha madung re, anhte shinggyim masha ni n’gun n rawng ai ni hkrai re, raitim Karai Kasang a atsam hte n’gun lu la nna galaw lu ai lam ni nga ai.
Wa Jau kaba La Sam ni a matu anhte hpung masha ni gaw kabu taw nga ai hte sha n re, anhte grai akyu jawm hpyi ya ra ai. Hkum hkrang hkam kaja ai, myit masin, wenyi hkam kaja ai, kup tsup ai chyeju lu la na matu Karai Kasang a atsam hte woi awn woi sa lu na matu, anhte hpung masha ni hku nna Wa Saradaw nnan a matu matut nna akyu hpyi ya nna ta tut bungli hta mung rau sha shi hpe garum la, akyu hpyi ai wenyi lam hta mung shi hpe garum la, myit masa hku nna mung shi hpe n’gun jawm jaw la, tsun ai, jahta ai, shaga ai kaw na hkawt shi n’gun lu na hku nna myit marai n’gun jawm jaw rai jang gaw grai hkum tsup ai, mau nan zawn re ai Saradaw tai nna woi awn sa wa na re ngu hpung masha ni yawng hpe mung grai n’gun jaw mayu ai, yawng jawm n’gun jaw ga, rau sha jawm lata gindun nga sa wa ga ngu nna hpang jahtum htet dat mayu ai.
