Shaman Chyeju Hting Let Ya Ai
Nanhte shada da tsawra nga mu, ngu nna tara ningnan ngai nanhte hpe jaw da made ai: ngai nanhte hpe tsawra made ai zawn, nanhte mung shada da tsawra nga na rai myit dai. 35Shing rai nanhte shada tsawra ai myit rawng nga myit yang gaw, nanhte nye a sape ni rai nga myit dai gaw, masha yawng mayawng chye lu na mara ai,” ngu mu ai.
Jn 13:34-35
Kawa Karai Kasang anhte hpe jaw ya ai shaman chyeju ni hpe myit dum nga let, dai chyeju ni hpe bai htang ai hku nna, anhte mung kaga masha ni a matu chyeju htinglet ya ai ni anhte tai ra ga ai. Ndai chyeju htinglet ya ai lit magam hpe, gun hpai na matu saw shaga hkrum ai ni anhte rai ga ai. Kaga masha ni yawng mung lawt lu ai prat hte sak hkrung hkawm sa nga lu hkra anhte garum ya ai rai yang, anhte hkum nan mung jet ai lawt lu lam hpe hkam sha lu na rai ga ai. Karai Kasang kaw nna tinang lu la ai shaman chyeju ni hpe kaga masha ni hpe bai gam garan jaw ya na matu lit li ga ai rai yang, Karai Kasang a mungdan hte tsan ai shara de anhte hkawm pru mat wa ai hte bung nga ai; N grin ai mungkan lam hta myit dik myit pyaw lam ni lu la na myit mada let, dai mungkan lam ni hta len hkawm nga ai masa hte anhte bung na rai nga ga ai.
Mahte a laika 18:21-35 hta mu lu ai Madu Yesu tsun ai ga shadawn hta, anhte a matu ahkyak ai sharin shaga lam Madu Yesu tsun sharin da nga ai. Dai ga shadawn hta, jahpan la ai shaloi shi a madu a ntsa hka law law kap ai mayam langai madu a man de du sa wa ai, shi hpyi nem ai a majaw, matsan dum ai hte shi a madu gaw shi kap nga ai hka ma hkra hpe raw kau ya ai, dai mayam bai wa nna shi kaw hka kachyi sha kap ai mayam manang wa hpe zingri ai, manang wa hpe tsawra myit madun na matu hprai kau ai, dai re majaw madu gaw shi hpe bai shaga la nna shi a hka wa ma ai aten du hkra shi hpe mang gala ni a lata hta ap kau ai. Daw kaji 35 hta, “Shing rai nanhte hta na kadai wa rai timung, tinang a hpunau wa mara hpe myit masin yawng hte n raw kau ya myit yang gaw, sumsing lamu na nye Wa mung, nanhte hpe tai na marin dai,” ngu ai shadum ga hte Madu Yesu dai ga shadawn hpe gin chyum dat ai. Tinang lu la ai shaman chyeju ni hpe kaga masha ni hpe gam garan jaw ra ai, ngu ai lam hta dai masha ni gying dan ai a majaw n rai, gying dan ai lam ni a majaw sha gam garan jaw ai rai yang, dai gaw shaman chyeju nrai nga ai, shaman chyeju ngu ai gaw anhte gying dan ai a majaw lu la ai lam nrai, Karai Kasang a tsawra ai lam a majaw lu la ai shaman chyeju she rai nga ai.
Shaman chyeju gam garan jaw na matu saw shaga hkrum ai ni anhte rai ga ai ngu ai lam gaw, Madu Yesu a si hkam ai a marang e raw dat kau ya hkrum ai anhte a shut hpyit mara hta grau kaba ai shut hpyit lam anhte a ntsa e kadai mung hka shakap da na lam n nga nga ai. Anhte hkam lu la ai shaman chyeju kaba hte shing daw mai na zawn re ai shut hpyit lam anhte a ntsa kadai mung n galaw lu nga ai.
Manang ni a shut hpyit ai lam hpe raw dat hkyam sa jaw ya ai lam anhte galaw ga ai shaloi, Karai Kasang jaw ya ai hkyik hkam kaba dik ai kabu gara lam nam chyim hpe anhte hkam sha lu na rai ga ai. Raw dat hkyam sa jaw ya na matu n gying dan ai masha ni hpe tsawra matsan dum lama ai lam anhte madun jaw ya ai lam gaw, n sin hta Karai Kasang a nhtoi hpe anhte htoi tu shangun ai, dai masha shi a prat hpe bai sharai la na ahkaw ahkang kalang bai jaw ya ai lam tai nga ai. Tinang a mayam manang a hka hpe n raw dat ya ai mayam zawn anhte n tai ga. Shut hpyit ai anhte a manaw manang ni hpe tsawra matsan dum lama ai lam madun jaw ya ai hku nna, Kawa Karai Kasang a tsawra lam hpe htoi tu shangun nga ga.
1 Korintu 13:1-3 hta, “Ngai gaw masha a ga hte lamu kasa ni a ga amyu myu hpe chye tsun raitimung, tsawra ai myit n rawng yang gaw, mahku rawng ai bau hte ngoi garu ai shupsheng sha ngai tai nga nngai. Ngai myi htoi chye htoi ai hte sung ai yawng mayawng, chye chyang ai lam amyu myu hkum nga ai hte bum hpe jasit lu hkra re ai makam masham rawng timung, tsawra ai myit n rawng yang gaw, ngai hpa nrai nga nngai. Nye a arai ni yawng hte hpe ngai gam kau nna, nye a hkum hpe pyi nat kau na matu ap kau raitimung, tsawra ai myit n rawng yang gaw, hpa akyu nga na nrai” nga nna tsun da nga ai.
Karai Kasang anhte hpe tsawra ai zawn, anhte mung masha ni hpe tsawra myit madun lu hkra shakut nga ga.
Lawu na lam ni hpe myit sumru yu let, akyu hpyi mai ai:
- Madu Karai Kasang a tsawra matsan dum lama ai lam gaw kade kaba nga ai, ngu ai lam hpe madi madun ya ai ja chyum mungga daw ni hpe hti sumru mai ai,
- Karai Kasang a tsawra matsan dum lama ai lam ni hpe sakse hkam madun lu hkra, ngai galaw lu mai ai lam ni hpe sumru yu mai ai,
- Karai Kasang a tsawra matsan dum lama ai lam ni hpe sakse hkam madun lu ai prat hte sak hkrung nga pra lu na chyeju, Chyoi Pra ai wenyi jaw ya rit ga, akyu hpyi mai ai.
