San Peter shawa pa kaba hta bat shagu na shawa masha ni hkrum ai lamang hta Wa Sarabyin Francis gaw, Chyoi Pra ai Wenyi hte seng nna myit sumru ai lam ni hpe tsun dan ai hte, anhte a akyu hpyi ai lam hta Chyoi Pra Wenyi gara hku bungli galaw nga ai hpe mau hpa lam hku nna tsun dan lai wa ai.
Anhte Christan ni akyu hpyi ai gaw,shinggyim masha shada da telephone hte ga shaga ai zawn Karai Kasang gaw kaga maga hku na ga shaga taw ai nre, Karai Kasang gaw anhte hte rau nga nga ai, Anhte gaw Karai Kasang kaw na Karai Kasang hpang de akyu hpyi nga ga ai.
Wa Sarabyin Francis gaw ndai n gun jaw ga hpe, lai wa sai bat masum ya shani, San Peter shawa pa kaba hta zuphpawng nga ai kam sham ai hpung masha ni hpe tsun ai lam rai nga ai.
Nawku hpung a prat hta Chyoi Pra ai Wenyi hte seng nna, shi a tara ga sharin ai lam hpe matut galaw ai shaloi, sakramentu ni hte seng ai hpe bawngban ai lam kawn, Hkristan akyu hpyi ai lam de bawngban galai shai mat wa ai lam tsun lai wa ai.
“Chyoi Pra ai Wenyi a shachyoi shapra ai magam bungli hpe, Karai Kasang a mungga hte Sakramentu ni hta n-ga, akyu hpyi ai hku nna shaleng dan ya ai,” nga nna Wa Sarabyin tsun lai wa ai, ndai lam a majaw, dai jahpawt na myit sumru ai ten dai lam hpe ap nawng ya mayu ai, nga nna tsun lai wa ai.
Chyoi pra ai Wenyi gaw Hkristan ni a akyu hpyi ai lam a dinghkrai ahkyak madung hte teng man ai mabyin lam re ai hpe Wa Sarabyin shadum ya nga ai. “Dai gaw, Shi gaw akyu hpyi ga jaw ai wa rai nna, akyu hpyi ai hku nna jaw ya ai wa mung rai nga ai.”
“Anhte gaw Chyoi Pra ai Wenyi hpe hkam la lu na matu akyu hpyi ga ai, teng sha akyu hpyi ai shaloi mung Chyoi Pra ai Wenyi hpe hkam la lu ga ai,” nga nna Wa Sarabyin tsun let, ndai hku nna anhte gaw mayam zawn n rai, Karai Kasang a kashu kasha ni hku nna akyu hpyi ra ai lam hpe madi madun tsun lai wa ai.
Chyoi Pra ai Wenyi hte akyu hpyi ai lam
Shawng nnan Wa Sarabyin tsun ai gaw, Chyoi Pra ai Wenyi hkam la lu na matu akyu hpyi ra ai lam rai nga ai. “Ndai lam hte seng nna, Yesu gaw Kabu Gara Shiga hta grai hkrak ai ga langai mi tsun da nga ai: “Nanhte n hkru n kaja ai ni gaw, nanhte a kashu kasha ni hpe kaja ai kumhpa ni hpe jaw chye myit yang gaw, Dai hta grau nna sumsing lamu na Kawa gaw Shi e hpyi ai ni hpe dai Chyoi Pra ai Wenyi jaw na n rai hka! (Lk 11:13).
Anhte akyu hpyi ai gaw ”atsam marai” langai a majaw sha,anhte kaw Karai Kasang a chyoipra wenyi nga ai, dai chyoipra wenyi gaw aja awa akyu hpyi ai ni hpe teng man ai chyeju kumhpa jaw ya ai wa rai nga ai nga nna Wa sarabyin tsun lai wa ai.
Gara hku akyu hpyi na
Wa Sarabyin tsun ai lam, anhte akyu n chye hpyi ai ngu ai gaw jaw teng nga ai “Rai sa, Chyoi Pra ai Wenyi gaw anhte a gawng kya ai lam hta karum na matu du sa ai, rai tim grau ahkyak ai lam langai mi hpe Shi galoi mung galaw ya nga ai,” bai Wa Sarabyin Francis matut tsun ai hta, “Anhte gaw Karai Kasang a kashu kasha ni re ai hpe sakse hkam nna, anhte a n-gup hta ndai hku “Abba! WA E!'”ngu nna hpyi jahtau na ahkang lu ai:
Akyu hpyi ai ten, Chyoi Pra ai Wenyi gaw “Paraclete” hku nna hpaw shadan dan nga ai, ngu ai gaw, anhte a tara kasa wa hku hte makawp maga ya ai wa hku nna, rai nga ai lam Wa Sarabyin tsun lai wa ai. Shi gaw Kawa Karai Kasang a man e anhte hpe mara n shagun ai sha, anhte hpe makawp maga ya nga ai ngu nna tsun lai wa ai.
“Anhte a myit masin gaw lama ma a majaw mara de du shangun ai shaloi pyi, Chyoi Pra ai Wenyi kawn “‘Karai Kasang gaw anhte a myit masin hta grau kaba nga ai’ ngu ai hpe shadum ya nga ai,”.
Akyu hpyi ai gaw law htam wa ai
Chyoi Pra ai Wenyi gaw, anhte a matu hpyi nem ya ai sha n-ga, anhte a hpu nau ni a matu gara hku hpyi nem ya ra ai lam hpe mung sharin ya nga ai, nga nna Wa Sarabyin tsun da nga ai. Dai hta n-ga, shi matut tsun ai gaw, “Shi gaw anhte hpe hpyi nem ai akyu hpyi ga hpe sharin ya ai,” ngu ai akyu hpyi ga gaw, Wa Sarabyin tsun ai, “Karai Kasang hpe grau nna ra sharawng shangun ai, hpa majaw nga yang, dai akyu hpyi ga gaw, manu jahpu n jaw ra ai sha, n-gun jaw ai akyu hpyi ga rai nga ai.”
Marai langai ngai gaw masha shagu a matu akyu hpyi ai shaloi,” Wa Sarabyin mau hpa, “byin wa ai San Pra ai Ambrose tsun da ai hte maren masha shagu gaw marai langai ngai a matu akyu hpyi ya ai; dai akyu hpyi ai lam hpe law htam wa shagun ai.”
Wa Sarabyin Francis gaw, du wa na Jubilee Poi hpe tau hkrau hkyen lajang na matu, “Karai Kasang a masing hte maren chyoi pra ai ni ngu ai Paraclete hte rau kahkyin gumdin akyu hpyi nga na matu” ga hpungdim dat tsun lai wa ai.
