Hamas ni rim tawn da hkrum ai la ni, num ni hte ma ni gaw Wa Sarabyin Francis hte Vatican kaw hkrum shaga nga lai wa ai. Israela dat kasa rung kaw nna, ndai zuphpawng hpe “hpyen yen tsin-yam tsindam hkrum ai ni hte Wa Sarabyin gaw nihtep nga ai lam hpe madun dan lai wa ai” ngu tsun lai wa ai.

Gaza mare hta shata law law bawng dung hkam sharang ngut ai hpang, 2023 ning October shata praw 7 ya shani Hamas ni rim woi mat wa ai Israela rim hkrum ai bawng masha hpung langai hpe dai shani jahpawt Vatican kaw Wa Sarabyin Francis hkap tau hkalum lai wa ai.

Dai zuphpawng hta masha marai 16—num marai shi, la marai mali, ma lahkawng sa du shang lawm ma ai.
Zuphpawng lung ai ni kaw na marai langai gaw Tal shoham mying ka shakap da ai bawlung palawng hpe Wa Sarabyin hpe jaw lai wa ai, dai wa a madu jan,kasha,gani hte makyin jinghku ni gaw bawng masha hku nna rim hkrum lai wa ai wa a nta masha ni rai nga ai.

Nkau mi hpe gaw, Qatar, Egypt, America ni lapran salang galaw ya a marang e, aten kadun gap hkat jahkring ai myit hkrum laika a daw langai hku nna, hpang jahtum e bai lawt lu ma ai.

Shanglawm ai masha law law gaw, shanhte a mat mat nga ai (sh) rim hkrum hkra ai dinghku masha ni a myi man hte mying ni ka shakap da ai laika ni hpe lang nna shamawt madun da let, “Shi hpe nta de wa shangun u” ngu ai laika ni hpe ka lai wa ai.

Wa Sarabyin Francis gaw sumla langai hpra hpe shaman chyeju kumla hku nna lang let, atsin sha rai nna akyu hpyi lai wa ai.

Israela dat kasa rung kaw nna, ndai zawn hkrum katut ai lam hpe “hpyen yen tsin-yam tsindam hkrum ai” ngu tsun nna, “dai hkrit hpa shani hta tsin-yam tsindam hkrum ai ni hte Wa Sarabyin gaw grai ni htep nga ai hte shanhte hpe dat ya na matu shi a ga sadi hkam daga ai lam hpe madun dan nga ai” nga nna tsun lai wa ai.

Simsa lam lu na matu Wa Sarabyin hpyi shawn ai lam

Wa Sarabyin Francis gaw, October 7 ya shani byin lai wa ai gasat gala lam kaw nna, gasat gala lam hta rim hkrum ai ni hpe lawan ladan dat ya na matu, Gaza mare hta gap hkat jahkring na matu hte, hkra machyi hkrum ai ni hpe shinggyim nauna myit hte garum shingtau lam jaw na matu, shawa hpawng hta azin ayang tsun shaga ai lam galaw nga ai hpe mu lu ai. Shi gaw ndai zawn galaw ai lam ni hpe, Hamas woi awn ai gasat gala lam a majaw, masha marai 1,100 jan si hkrum nna, num ni, asak kaba sai ni, ma kaji ni lawm nga ai bai masha marai 240 hpe rim woi mat wa ai hpang byin pru wa ai, jahten sharun ai manghkang hpe hparan na matu ra kadawn ai lahkam ni hku nna ahkyak shatai tsun lai wa ai.

Dai shaning nnan daw, April shata praw 8 ya shani hta, Wa Sarabyin Francis gaw, Hamas ni rim tawn da ai Israela masha ni a jinghku jingyu ni hte hkrum shaga lai wa ai hpe chye lu ai. 2023 ning November shata 22 ya shani hta, Gaza mare hta byin nga ai zingri zingrat lam hte shinggyim nauna manghkang ni a lapran, Israela rim hkrum ai ni a dinghku ni hte, tsawra ai ni hte rau, Palestine mungdan na dat kasa hpung lahkawng yan hpe hkap tau la lai wa sai rai nga ai. Gaza hkamja lam dap kaw nna shapraw ai hpang jahtum na jahpan hku nga yang, Israela ni n hkring n sa gasat ai majaw, masha marai 43,700 jan si hkrum lai wa ai. Dai aten hta Wa Saradaw gaw “dai lam hta shang lawm ai ni yawng a tsin-yam tsindam ni hpe wenyi hku nna myit hkrum kahkyin gumdin ai lam” hpe tsun shapraw na matu shakut nga ai lam hpe Wa sarabyin a Shiga Rung a lit hkam Matteo Bruni tsun lai wa ai.

Wa Sarabyin gaw, October 17 ya shani hta, Israela Hkringmang Daju dingsa Ehud Olmert hte Palestine Maigan Hkringmang Daju dingsa Nasser Al-Kidwa yan hpe mung, simsa lam galaw ai ni a dat kasa hpung ni hte rau, shi hkrai sha hkrum shaga ai lam galaw lai wa ai. Ndai zuphpawng gaw “ahkyak ai hte myit rawt shangun ai” ngu tsun let, ningbaw lahkawng yan tsun ai hta, Wa Saradaw Francis gaw, Sinpraw Dingda mungdan ni hta simsa lam shakut shaja ai lam hpe laklai ai hku myit tsang nga ai lam tsun dan lai wa ai.