“Ya dai de ni wa nna mare hpe mu wu yang, de a matu shi hkrap nna, Mare nang e, ngwi pyaw ai
lam hpe dai ni na nhtoi e nang chye lu wu taw gaw law!” ( Luka 19: 41-44 )
Tsawra ai shiga madat Nu Wa Hpu Nau ni, daini na lu ai Ja Chyum mungga hta Madu Yesu
Jeruslaem mare kaba a matu hkrap ai lam na lu nga ga ai. Madu Yesu hkrap ai hpe Ja Chyum
mungga kaw, masum lang mu hti lu nga ga ai. (1) Yawhan a Kabu kara shiga 11: 33 – 35 kaw,
Lazarus si mat ai majaw Madu Yesu hkrap nga ai. (2) Luka a kabu gara shiga 19: 41 kaw,
Jerusalem mare kaba a matu hkrap nga ai. (3) Hebrew laika 5: 7 kaw, shi a masha ni a matu
hkrap nga ai. Anhte yawng chye na ai, hkrap ai a npawt gaw, yawn hken ai lam a majaw rai nga
ai. Daini Madu hkrap ai lam gaw, shi la sa ai, hkye hkrang la ai lam, simsa ai lam ni hpe n hkap
la ya ai majaw, Madu grai yawn nga ai lam rai nga ai.
Moi na labau hta Jerusalem ngu ai mare kaba na lachyum gaw, ngwi pyaw simsa ai mare kaba
ngu ai re. David Hkaw Hkam wa gaw, Jerusalem mare kaba hpe, Israel myusha ni a Mare
madung hku nna, Madu Yesu mungkan ga de, hkye hkrang la na matu, rai ndu sa ai shaning 1000
mi kaw nna lata da nna, gaw gap lai wa ai re. Jerusalem mare kaba gaw, Benjamin hte Judah
amyu sha ni nga ai ginra lapran kaw gaw de da ai rai ma ai. David Hkaw Hkam wa gaw, Judah
amyu sha ni kaw na yu wa ai wa rai nna, Sawlu Hkaw Hkam wa gaw, Judah amyu sha ni kaw na
yu wa ai wa rai nga ai. Dai re ai majaw, Jerusalem mare kaba gaw, Benjamin hte Judah amyu
masha ni a, ngwi pyaw simsa ai lam jaw ya ai mare kaba rai nga ai.
Ngwi pyaw simsa ai mare kaba she nga tim, labau hpe bai yu yang, grai rai simsa ai lam nau n
nga nga ai. Jerusalem mare kaba hpe dang la na matu, gasat gala 118 lang gasat hkat nna, sai hka
nu ni she lwi lai wa sai. Jerusalem mare kaba hpe, Assyrians, Babylonians, Greeks, Romans
Crusaders, Ottoman Turks, ngu ai hpyen ngun gaba ni 32 lang wang tawn ai mung hkrum lai wa
sai.
Labau kaw na mying gumhkawng ai Jerusalem mare kaba de simsa lam a Hkaw Hkam wa, shi
Madu Yesu hpe nhkap la ai majaw, ndai mare kaba a matu hkrap nga ai. David hte Sawlu hkaw
hkam yen a simsa ai, mare kaba simsa ai Hkaw Hkam majing du sa wa yang nhkap la nga ma
ai.
Anhte shinggyim masha ni law malawng gaw, ngwi pyaw simsa ai lam hpe ra sharawng ai ni rai
nga ga ai. Raitim, Israela masha ni zawn, ngwi pyaw simsa ai lam a Hkaw Hkam wa sa wa yang,
anhte mung shi hpe atsawm nhkap la lu nga ga ai. Gara hku atsawm rai nlu hkap la ai ta nga
yang, Madu Yesu gaw, anhte shinggyim masha ni, langai hte langai mara raw dat hkat na matu,
tsawra matsan dum hkat na matu, sharin ya tim anhte ni rai nlu hkan sa shadik shatup nga ga ai.
Madu jaw ai simsa lam hpe lu hkap la nna, ta tut jai lang lu na matu, shi Madu Karai Kasang
kaw, kyuhpyi let shakut hkawm sa ra nga ga ai. Shi Madu hpe hkap la kam sham yang she, Madu
jaw ya ai Simsa lam hpe, manu dan ai lam chye wa na rai nga ai.
Jerusalem mare kaba zawn, hten za ai kaw nlawm mat na matu, Madu Karai Kasang hpe kam
hpa ai myit hte, hkap la kam sham nga ga. Anhte ni a majaw, Madu hpe myi prwi n pru shangun
nga ga.