“Ya shi gaw Nawku Htingnu de shang nna, rai dut ai ni hpe, Nye a nta akyu hpyi ai nta rai na ra ai, nga ka da nga ti mung, nanhte gaw ndai hpe damya lungpu shatai myit dai, ngu nna shanhte hpe shaden kau mu ai.” ( Luka 19: 45-48 )
Anhte ni a hkum hkrang, Nawku Htingnu ni hpe Madu kaw akyu hpyi ai shara, Madu hte grau ni htep ai shara byin tai hkra shakut nga ga.
Tsawra la ai shiga madat nu wa hpu nau ni e, daini na lu ai Ja Chyum mungga hta, Madu Yesu gaw, Nawku Htingnu e gat dut sha nga ai ni hpe, shaden kau ai lam na lu nga ga ai. Nawku Htingnu ngu ai gaw, Madu Karai Kasang kaw, anhte lu la hkam sha lai wa sai chyeju ni a matu, chyeju sa dum ai shara, anhte shut hpyit kau ai mara ni hpe sa tawngban ai shara, anhte ra nga ai akyu ara ni hpe sa hpyi ai shara, rai nga ai. Ndai zawn re, anhte shinggyim masha ni hte Hpan Wa Karai Kasang hte hkrum zup lu ai shara hpe, anhte yawng gaw, manu shadan na rai nga ga ai.
Raitim, Madu Yesu Jerusalem Nawku Htingnu kaw, sa du ai shaloi, masha ni gat dut sha taw ai hpe mu ai majaw, grai myit n pyaw mat nna, yawng hpe gawt shapraw kau dat nga ai. Dai ten na Israela masha ni gaw, Nawku Htingnu hta Madu hte hkrum zup lu ai shara ngu ai hta, dai htingnu kaw sa ai masha ni hpe rai dut ya na kaw sha myit lawm taw nga ai majaw, Karai Kasang hte hkrum zup lu ai shara hpe manu n shadan mat wa ai lachyum rai nga ai.
Anhte a hpu nau, Buddaha ni manu shadan ai sha ra ni hpe, anhte ni n gawn n sawn rai nga jang, shanhte ni grai pawt nga ma ai. Lani mi ngai na manam ni sa chyai ai majaw, Shwe Dagone hpara de sa woi hkawm ai sahloi, manang langai gaw, kyep din nraw ai hpara de lung wa ai majaw, Budda ni grai pawt wa ma ai. Budda ni na hpara ni hpe gaw, grai hkungga ai majaw, kyep din ndin shangun nga ma ai.
Madu Yesu hkum nan, Nawku Htingnu hpe akyu hpyi ai shara, san seng ai shara, re ai hpe, daini hti ai chyum mungga kaw, asan sha tsun dan lai wa sai. Anhte ni mung, Nawku Htingnu ni hte anhte a hkum hkrang Nawku Htingnu ni hpe jasan jaseng nna, grai manu shadan chye ra nga ga ai. Anhte ni a hkum hkrang ni gaw, Chyoi pra ai Wenyi a htingnu rai nga ai lam San Paulu tsun da nga ai. San Paulu a Korinhtu ni kaw shagun dat ai laika langai 6: 19 hta, “Nanhte a hkum hkrang gaw, Karai Kasang kaw na nanhte lu la ai hte, nanhte hta e rawng nga ai Chyoi pra ai Wenyi a htingnu rai nga ai, nanhte n chye nga myit ni?”
Anhte a hkum hkrang ni gaw, Wenyi Karai Kasang shanu nga ai htingnu ni rai ai majaw, anhte a hkum hkrang hte myit masin ni hpe mung san seng hkra tawn da ra nga ai. Mungkan ga na Ja gumhpraw, Sut gan ni sha tam hkawm nga nna, Chyoi pra ai Wenyi shanu nga ai, anhte a hkum hkrang Nawku Htingnu hpe, manu n shadan taw nga yang gaw, gat dut ai ni hte hpring nga ai, Jerusalem Nawku Htingnu hte bung mat na rai nga ai.
Dai majaw, anhte a hkum hkrang hte Wenyi hpe, Madu Karai Kasang hte, galoi mung matut mahkai ai shara, san seng ai shara, akyu hpyi ai shara, byin tai wa hkra, shakut hkawm sa nga ga.