Tsawra ai Nu Wa hpu nau ni, daini na Ja Chyum Mungga hpe hti sumru yu ai shaloi, Madu Yesu tsun ai gaw, ndai myi n mu nna jam jau nga ai yan gaw, Mungkan ga hpe grai mu mayu ai majaw, shan gaw Karai Kasang hpe kam hpa let nsen kaba hte marawn jahtau let hpyi shawn ai gaw shan lahkawng myi bai mu lu na hpe grai kam sham kam hpa ai lam nan re.
Madu Yesu sha shan lahkawng hpe, lu garum ya ai hpe chye ai, kam sham ai majaw, kam hpa let nsen kaba hte hpyi jahtau ai rai nga ai. Dai majaw Madu Yesu tsun ai gaw “Ngai lu galaw ya ai ngu ai hpe, nanhte kam myit ni” nga nna san ai rai nga ai.
Tsawra ai nu wa hpu nau ni, ndai myi n mu ai yan gaw, Yesu a hpang de hkan abram tam let, marawn jahtau hpyi nem ai a majaw, myi bai mu wa sai rai nga ai.
Anhte yawng mung, nsin kata hta hpa mung n mu, n na rai hkawm sa nga ai ten ni nga nga ga ai. Shut hpyit mara hta pyaw len nga ai, akyu hpyi lagawn ai, Karai Kasang hpe shingdu tawn da nna nga chye ga ai. Namak lawhpa let nsin krung hta nga pyaw taw nga ai hpe madu a hkum madu chye nna n’htoi de bai du wa hkra, Karai Kasang kaw nsen kaba hte marawn jahtau let sit shang nga ga law.
