Nam mali kata e jahtau ai nsen gaw dai madu a lam lajang mu shi a lam matsun ni hpe shading mu, hkaraw hkamwam shagu kaput lu na rai nga ai. Bum hte kawng shagu hpe daw kau lu na rai nga ai, magaw ai lam.ni hpe shading sharai lu na rai nga ai. Machyawk marawk re ai lam ni hpe shara lu na rai nga ai ngu nna Lk 3:4-5 kaw tsun da nga ai.
Tsawra ai nu wa hpu nau ni moi kalang mi hta grai lak lai ai madu wa hte madu jan nga ai da, shan lahakwng gaw grai myit ngwi myit pyaw simsa ai hte nga lai wa ai. Dai zawn rau nga nga ai ten hta madu jan gaw ma hkum byin wa ai, Raitim shi a madu jan gaw lai wa sai ten hta mawng ana machyi hkrum ai a majaw tsi tsi ga lajang da ai lam mung nga ai de a majaw gun taw nga ai ma mung asak hkrung na lam yak ai. Jam jau hkrum ai, kanu hta mung hkam ja lam lani hte lani sawng wa ai. Tsi sarawun mung myit mada lam nau n nga ai. Gara hku mung nmai byin sana re ai majaw si na mung teng ai daram rai nga ai. Dai majaw shan la shada bawng ban la nna e bum ga de mahtang sa nga na matu daw dan jahkrat ai. Hpa majaw nga yang makau grup yin ni a tsun ai lam hpe shan gaw nlu hkam sha ai n pyaw ai a majaw myit zim nna simsa ai bum ga de mahtang wa nga nna hkai sun ni hpe galaw rai ngam nga ai aten hpe jahtum na matu daw dan let sa nga mat ai mung rai nga ai. Bai shan la a hkap la da ai lam langai gaw masha shagu hta si na atsam.hte sak hkrung lu na atsam nga ai ngu ai hpe hkap la da ai mung rai nga ai. Ndai mungkan uhpung. hta nga ai ni hta chyawm gaw shan lahakwng hkap la da ai lam zawn re ai myit ni yawm mat wa hkra gung lau ginjang taw nga ai lam sha re nga nna mung hkap la da ai rai nga ai. Dai majaw bum ga de wa nna shan hkailu hkaisha rai nga ai shada n gun jaw hkat ai akyu rau hpyi ai hkam ja lam hte seng ai hpe rau jawm jahta lakawn lanawn hkat rai nna nga ai. Bai nna masha ni shan hpe tsun ai lam hpe myit hta n matsing da ai sha mara raw dat ya ai. Shana de rosary arau hti ai shada tsawra hkungga hkat rai nna nga lai wa ai. Shani shana Karai Kasang a mai kaja lam hpe hkam sha nna chyeju dum ai hte nga lai wa ai. Dai zawn rai shata mi na ai hpang gaw dai madu jan hta lak lai lam langai hpe hkam sha lu dat ai. Dai majaw shi a madu wa hpe tsun dan ai ya ngai mawng machyi hkrum ai lam kaw na mai wa ai gaw n kaja ai myit masin kyang lai len ni mara dat ya ai dai zawn lam ni hte bai matai htang ai a majaw rai nga ai hpe hkam sha lu dat ai rai nga ai.
Tsawra ai nu wa hpu nau ni ana zingli ana ahkya gara hku na kap wa ai gara hku shang wa ai ngu ai hpe masha shagu gaw chye nga ai..nchye dat ai sha atsam dat nna lu hkra la ai arung arai ni a matu jam jau lam ni n hkam mayu ai zawn hkam mayu ai zawn rai hkap la kau ra ai makau grup yin mungkan ga a shuk shanuk ai lam ni hpe prat hte maren hkan nna jang jang nan hkan nang taw nga ra ai lam ni a dam ngu na hpe hkam nga ra ga ai. Kaja ai ngu nna shadu da ai lam ni gaw hpang jahtum e n kaja ai hku na jahtum bai tai mat wa ai. Raitim mi shawng e tsun lai wa sai ga shadawn mabyin lam na ma kanu gaw makau grup yin a tsun bun ai tsun katut ai lam ni pru le mat wa nna myit ningmu nnan shara nnan ngu na hta htawt sit nna nga lai wa ai shaloi myit masin nnan hte ana ahkya mahkra mai tsai hkam la lu dat ai hpe kasi la ging nga ai.
Yawhan Baptister a mungga gaw nanhte sak hkrung nga pra ai mungkan ga gaw nanhte hpe n gyit hkang da ai mungkan ga a agu aga re ai lam ni hpe n kaja ai lam ni hte bai htang nga na malai dai zawn lam ni kaw na lawt lu na matu tinang hkum nan koi yen lu na astam marai masha hkum ngau shagu hta nga nga ai..myit mada lam nnan hte prat nnan hpe hpang na ra nga sai re.
Yawhan Baptister gaw zai bru jang mali e sak hkrung nna masha ni hpe myit mada lam ngu na tara mungga jaw ai zawn Karai Kasang a tara lam hte n htan shai nna sak hkrung ai lam ni hpe asan sha rawt malan lu na matu mungga jaw ya nga ai. Yawhan Baptister gaw masha a prat gaw nawng na zawn n re ai sha grau nna kaja wa lu na matu lam byeng ya ai wa masha ni hpe sharai ya ai wa masha ni myit mada nga ai dat kasa wa rai nga ai. Yawhna 1 : 3,15
Madu Yesu shangai poi ngu na Hkristmas poi hpe kaja dik galaw lu na matu mabyin lam ni hpe mabyin lam hku hkap la nna tinang hkye hkrang la ai lam hkrum lu na matu tara mungga hte nhtan shai ai lam ni hpe anhte a prat na di kau la kau ra nga ai. Shangai nhtoi madu rai nga Yesu Hkristu hpe anhte ni kawn kaba htum kumhpa hku nna jaw na lam kaja dik gaw anhte a prat ting hpe sak jaw ap nawng ai lam rai nga ai. Tinang a prat ting hpe sak jaw ap nawng ai lam ngu ai gaw tengman ai tara lam kata e myit yawn myit malai ai hte galai shai wa nna prat nnan hte bai hpang ai lam gaw prat hkrun lam hpe kaja wa galai shai kau dat ai lam rai nga ai. Karai Kasang a hkrang hpe anhte a prat hta bang la dat ai lam mung rai nga ai. karai Kasang a hkrang nsam hpe anhte a prat hta bang la lu na matu ndai bat na Luka a kabu gara shiga 3: 4,5 hta Karai Kasang du sa wa ai ten hta anhte marai hkum ngau shagu hkyen lajang ra ai lam gaw anhte a prat gaw dingman san seng ai prat de du hkra hkyen lajang ai rai nga ai..hkaraw ni hpe kaput ngu ai gaw hkaraw zawn re ai ana ahkya mara ngu na ni hpe myit dum hprang la rai myit malai lu ra ai. Bum ni hpe shara shayawm kau ra na ngu ai rai dum ai lam myit tsaw ai lam ni hpe la kau ra na re, magaw ai lam hpe shading ra na ngu ai gaw anhte a magaw chye ai myit masin myit masa ni hpe shading na matu shakut ra nga ai. N ra ai lam ni hpe gram ra ai shara ra na ngu ai gaw tinang a zai ai hte tsun shaga ai lam ni kanawn mazum lam ni hpe sharai na matu shakut ra ai..masha madang shagu gaw shading sharai na nga yang shawng nnan hkyen lajang ai lam ra ai. Shagrit shanem ai masha shakawn shagrau hkrum na matu hkyen lajang ya ra ai. Shagrit shanem ai masha ni gaw shakawn shagarau hkrum na mung rai nga ai.
Lahkawng hku na hkyen lajang ra na gaw rai dum ai masha ni hpe shanem sharai la nna hkyen lajang ya ai. Tinang hkum ngai nga ai ni tinang hkum n gun lu dum nga ai ni rai dum nga nna masha wa hpe hpa zawn n nawn galaw nga ai ni myit yawn myit malai ai hte myit hpe shagrit nna hkyen lajang ra nga ai. Myit yawn myit malai ai lam n nga yang gaw n hpu zawn ahpu jahkrat kau hkrum na rai nga ai.
Masum hku nna Madu Yesu a matu hkyen lajang ra ai lam gaw myit magaw nna lagu la lagu sha rai mawp lu mawp sha rai, gumhpraw tam ai ni masu magaw ai la num madu wa madu jan ni tinang a prat hpe dingman na matu san seng na matu hkyen na ra nga ga ai.
Mali hta hkyen lajang ra ai lam gaw prat a mawru hpe hkrum nga ai ni, myit mada lam mat nga ai ni lakawn la na masha n nga na garen gari hkrum nga ai ni, matsan nna prat a shimlum lam n nga rai kaya kahpa rai nga ai ni a prat hpe masan sa hkra lajang ya ra nga ai. Esaia 41:15,16
Tsawra ai nu wa hpu nau ni daini e kawa Karai Kasang gaw anhte yawng hpe anhte a myit tsaw rai dum.nga ai bum magyi magaw ai lam hkaraw ni hpe agrawp mani jahkoi kau ya na matu Karai Kasang jaw wa ai lam gaw kaba ai lam rai wa ai. Dai zawn sharai ai ten hta mung hkrat sum lam ni gaw naw byin pru nga na re raitim myit daw ai lam n nga ai sha Karai Kasang a chyeju hte tawt lai lu hkra galaw na ahkyak nga ai. Shagrit shanem ai hte madu Karai Kasang a chyeju atsam ni hpe hpyi nna shi hta kam shamyet rai nnan bai hpang na ahkyak ai…ya na zawn myit daw asum jaw ai lam ni gaw tinang a myit rai dum ai lam ni hta ru jaung nga ai a majaw mung rai nga ai. Tinang hkum tinang grai kam dinglai ai lam ni kaw na byin pru wa ai lam mung rai nga ai. Dai majaw kasa Petru zawn Madu Yesu a ga hpe kam nna hkan nang hkan sa ai masha byin hkra kasi la na ra nga ga ai. Lk 5: 5
kaning re gawng kya lam ni hte mi hkrum hkrum madu sharawng awng ai rai yang ngai kasha n gun dating rai bai shakut na nngai ngu nna tsun ai hte maren hkan na ahkyak nga ai.
Akyu hpyi saga oh hpan Madu Karai Kasang e chyeju mahakra matu chyeju dum ai hte nang wa hpe grau nna kam sham tsawra chye chyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a Madu Hkristu a marang e hpyi nem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw Du Sa Ladaw lahkawng rai nga ai hti ang ai ja chyum mungga ni gaw chyum mungga daw langai ..Barak a laika 5: 1-9 .chyum mungga daw lahkawng hpilipi laika 1: 4-6, 8-11 kabu gara shiga Lk 3: 1-6
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law .
