“Anhte a ngwi pyaw ai lam a npawt rai nga ai Madu gaw, nanhte hpe tut nawng e lam shagu hta ngwi pyaw ai ajaw ya nga u ga.”
2 Htesaloni 3:16
Tsawra ai Nu Wa Hpu Nau ni,
2 Htesaloni 3: 16 gaw kaning re ai masa hta raitim anhte a matu simsa ai lam gaw galoi mung a nga nga ai lam hpe shadum n-gun jaw nga ai chyum mungga rai nga ai. Karai Kasang gaw shi a kashu kasha ni hpe kawa a simsa ai lam hte sak hkrung nga lu na hpe ra sharawng nga ai. Anhte kabu pyaw ai ten raitim, yawn hkyen jam jau ai ten raitim simsa ai hte tawt lai lu na hpe ra sharawng nga ai. Shi gaw anhte a ntsa e galoi mung sadi dung ai hte kaja ai kawa rai nga ai. Shi hpe kam sham nna shi hta maju jung nga na hpe shi ra sharawng nga ai. Dai rai yang hpa e mung anhte hpe jahkrit shama lu na nre.
Anhte gaw mungkan ga a myit ru tsam pu ai lapran hta sak hkrung ra nga ga ai raitim Karai Kasang gaw anhte hta shanu nga ai hpe mung nmalap kau ga. Simsa lam a madu hpe nawku daw jau ai ni rai nga ga ai hpe 2 Htesoloni 3:16 hta“Anhte a ngwi pyaw ai lam a npawt rai nga ai
Madu gaw, nanhte hpe tut nawng e lam shagu hta ngwi pyaw ai ajaw ya nga u ga.” nga nna n-gun jaw da nga ai. Anhte a kata hta shanu nga ai Chyoi Pra ai Wenyi mung simsa ai apu asi ni hpe jaw ya nga ai lam Galati 5:22 hta mu lu nga ai. Anhte dai simsa lam a madu hta manoi nga ai rai yang dai Chyoi pra ai Wenyi a apu asi hkam la lu na rai nga ai.
Tsawra ai nu wa ni,
Mungkan ga a ru yak tsam pu ai lam hpe hkrum sha ai a majaw, Karai Kasang gaw anhte hte rau nrai sai ngu hkam sha nna shi hte hka mat ai ten hta ndai ru yak ai lam ni, makau grup yin hta byin hkrum hkra ai masa ni gaw anhte hpe kaup kau na ra ai. Anhte a prat hpe mayu kaup kau na ahkang jaw kau ai hte bung na ra ai. Dai aten hta anhte prat a simsa ai lam mung mat mat na ra ai. Kaning re masa hta raitim anhte dum ra na gaw, anhte hkrai chyaren taw ai ni nrai ga ai. Dai majaw kaning re masa hpe mi hkrum hkra wa ai raitim shinggyim myit hte sha dawdan nna hkawm sa na malai Makam masham a myit hte hkap la chye na ahkyak la nga ai. Karai Kasang gaw anhte a ntsa e sadi dung ai hte lakawn la nga ai hpe kam sham nna hkawm sa chye ra nga ai.
Si ai kaw nna bai hkrung rawt sai, Kasa ni hpe mungkan htum hkra hkaw tsun na matsun ai Madu gaw anhte hte rau galoi mung a nga nga ai hpe myit dum let hkawm sa ra nga ga ai. Karai Kasang hta manoi manat nga nag rai ahkyak nga ai.
Karai Kasang hta manoi manat ai sak prat hku nna sha, anhte simsa ai lam lu mai nga ai. Aten ahkying shagu shi gaw anhte hte rau rai nga ai; anhte hpe lam woi ya nga ai; anhte hpe atsam jaw shadaw ya nga ai; shi hpe kam sham nna hkawm sa ai ni hpe simsa ai prat jaw ya nga ai.
Yawhan a laika 14:27 hta “Ngwi pyaw sim sa ai gaw ngai nanhte hpe tawn da ya ma sade ai; nye a ngwi pyaw ai simsa ai nanhte hpe ngai jaw made ai, mungkan ga na ni jaw ai zawn ngai nanhte hpe jaw
made ai n rai. Nanhte myit hku ru myit, hkrit mung hkum hkrit myit” nga nna anhte hpe n-gun jaw da nga ai. Dai majaw Simsa ai lam ngu ai gaw, anhte Hkristian sak prat a daw chyen rai nga ai.
Ndai simsa lam gaw hten bra chye ai mungkan masa na lu la ai nrai nga ai; nhten nbya ai sumsing lamu na tsawra chye dik ai Kawa kaja kaw na lu la ai rai nga ai. Karai kasan jaw ai simsa lam gaw
mungka ga na simsa lam htan grau nga ai. Atsam rawng ai Karai a lata hta anhte a prat hpe ap da ai rai yang kaja dik, hpring zup dik ai lam ni anhte a prat hta byin wa na hpe kam hpa nga ga.
Dai re majaw Yawha a laika 14:27 hta shadum da ai hte maren anhte gaw myit ru myit tsang ai the hkrit nga na malai, mahka hpe dang lu ai Karai Kasang hta majung jung nga ga. Anhte hta shanu nga ai Chyoi pra ai wenyi hte matut mahkai nga ga; shi a nsen hpe madat nna shia lam woi ya ai hpe hkap la nga ga. Nu wa hpu nau ni, mungkan ga a hpring zup pyaw hpa lam ni hta manoi nga na malai atsam rawng ai Karai Kasang hte grau ni htep wa na, shi hta grau manoi nga lu na matu
shakut sa wa ga.
Anhte hte galoi mung ni htep ai hku shanu nga ai Chyoi pra ai wenyi gaw anhte a shani shagu na sak hkrung lam hta myit masin hkum hkrang simsa ai lam jaw ya let lam woi ya nga u ga.
