Tsawra ai Nu Wa hpu nau ni, daini gaw, Kahtolik nawku hpung kaw nna, Hkawn sek Maria a mara n kap ai Na-um Na-sin poi n`htoi hpe galaw nga ga ai. Moi kaw nna, Maria hpe mara n kap ai jan, lak lai ai chyeju hte hpring ai, chyoi pra ai wenyi a atsam hte, na-um na-sin rai nna, Ma Yesu hpe shangai chyinghkai ya sai aten du hkra, mahkawn hkawn jet re ai hpe, Wa sara byin Pius 9 kawn 8 .12.1854 shani hta, ndau shana ya sai rai nga ai.
Nu Maria gaw, chyeju mahkra hte hpring zup ai, Karai a Kanu re majaw Anhte Kahtawlik hpung masha ni gaw, shi hpe shakawn shagrau daw jau ai lam re. Nu Maria hpe Karai Kasang langai mi hpe zawn nawku daw jau ai n re. Nu Maria gaw mara n galaw ai. San seng san pra ai majaw, lamu kasa ni hte hkrum shaga lu ai atsam ni nga ai hpe mu lu ga ai. Ga shaka dingsa hta Adam hte Eva zawn tsdan a mahkam, lup taw nga majaw, Karai Kasang hpe hkrit mat ai hte shi madu hpe ga pyi n gwi shaga mat sai rai nga ai.
Anhte ni mung kyu hpyi na lagawn ai. Karai Kasang hte ga shaga na aten n lu jaw ai, mara galaw nna, tsadan a lata hta, lup taw ai rai yang, tinang a hkum, Karai Kasang hte tsan gang mat nna, chyeju sutgan ni, ningra mat na teng sha re. Dai majaw, Nu Maria a kasi ningli hpe hkan lang hkan sa let shakut sa nga ga law.
