Du Sa Ladaw Laban ( 3 ) Year C
Anhte kaning rai na rai ta Lk 3:10
Tsawra ai nu wa hpu nau ni mabyin langai mi tsun dan mayu ai dai gaw lani mi na nhtoi hta myit masin hpaji hpe sharin ya nga ai jawng sara langai gaw matsat ning ram re ai ma ni hpe shanhte hta nga ai nyan marai ni hpe san jep lai wa ai. Dai jawng sara gaw magazine laika buk langai hta na mungkan ga sumla hpe je la nna ahkyep alep di galaw nna shawng nnan e la kasha ma hpe jaw dat nna mungkan ga sumla hkrang byin hkra bai matut shachyaw shangun lai wa ai. Dai hku shangun dat ai hte minute jahkring a laman e sha ngut mat wa ai a majaw sara gaw mau nna shi hpe nang gara hku dai daram lawan ai hku lu galaw dat ai rai? Jaw ai grai byin ngu nna shagrau tsun dat ai shaloi ma bai tsun dat ai gaw sara e mungkan ga sumla a hpang hta e masha hkum hkrang hte re ai sumla kap nga ai mungkan ga sumla hpe chyawm gaw ma atsawm n chye ai, maga mi de kap nga ai masha sumla hpe gaw ma atsawm sha chye ai a majaw dai masha sumla hpe shachyaw dat ai shaloi mungkan ga sumla gaw jaw ai hku matut shachyaw hkrup mat ai re nga nna e sara hpe bai htai tsun lai wa ai lam rai nga ai.
Tsawra ai nu wa hpu nau ni masha hpe jaw hkra hkrang shapraw lu yang mungkan ga gaw nawng na hkrang zawn rai wa na re. Mungkan ntsa e shanu shingbyi nga ai shinggyim masha ni gaw mi na madang hte maren n rai yang gaw shinggyim masha ni shanu nga ai ndai mungkan ga gaw hkrang n sa wa ai rai nga ai. Anhte yawng mung ndai bat na Luka a kabu gara shiga na Yawhan Baptister hpang de sa nna anhte kaning rai na rai ta ngu nna san ai zawn Madu Yesu hpe hkap tau hkalum la na matu anhte hpa galaw ra na ta. Daini e Yawhan Baptister hpang de san ai ni hpe Yawhan Baptister jaw dat ai mahtai gaw anhte ni hkan sa ra na lam ni hpe galoi mung jaw dat ya ai rai nga ai, lam matsun madun ai lam ni nga ai. Yawhan Baptister gaw shi hpang de sa san nna tara mungga hkam la ai masha ni hpe tara mungga hkaw tsun lai wa ai. Yawhan Baptister hpang de du sa wa ai masha ni gaw yu maya masha uhpung, ahkun hkang se hta ai masha ni, hpyen masha ni rai nga ai.
Shawng nnan e yu maya masha uhpung ni hpe shi mungga jaw hkaw tsun ai lam gaw LK 3: 11 palawng lahkawng lu ai wa gaw n lu ai wa hpe karan u ga, shat lusha lu ai wa mung dai hte maren jaw u ga ngu nna tsun da ai.
Masha shada a lapran e garan kachyan hkat chye na matu shadum ai lam rai nga ai. Tinang lu la ai tara mungga gaw ta tut prat ngu na de du wa hkra galaw na ahkyak la nga ai. Ahkun hkangse hta ai masha ni hpe tara mungga jaw ai lam gaw LK 3: 13 nanhte hta la na shadang tawn ai made hta grau nna hkum dip la myit ngu nna tsun da nga ai. Lachyum gaw ahkun hkangse hta ai wa mung teng man ai wa rai u ga nga nna tara mungga jaw da ai lam rai nga ai..
Masum hta gaw hpyen masha ni rai nga ai. Shanhte hpe shadum tsun da ai lam gaw Lk 3:14 anhte Wa gaw kaning rai na rai ta nga nna san ai ten kadai hpe mung adip arip hkum rai myit jahkrit shama sha ai mung hkum rai myit, nanhte a shabrai hte ram dum nga mu ngu nna tsun da ai.
Mung chying sha ni hpe makawp maga ga di u, dip sha dang sha ai lam hkum galaw mu ngu nna tsun ai lam rai nga ai. Hpyen masha gaw kaja ai share ninghkring byin hkra shakut nga ra ai ngu nna tara mungga jaw ai lam rai nga ai.
Tsawra ai nu wa hpu nau ni Madu Yesu a hpang e hkan nang ai hta jet ai Hkristan byin tai wa na matu gaw aw ra le ra shara ra ai lam n nga ai, tinang lit la galaw nga ai magam bungli gaw masha hpe Madu Yesu a hpang de hkan ai masha n byin shangun ai raitim tinang lit la galaw nga ai lam hta mahta nna Madu Yesu a sape byin shangun nga ai. Tinang galaw nga ai amu hta kang ka ai hte masu magaw ai lam n nga ai, myit masin san ai hte sadi dung rai lit la galaw ai lam mahtang sha Madu Yesu a hpang hkan nang ai jet ai sape ni hku byin shangun nga ai. Karai Kasang a mungga gaw anhte shani shagu myit ai mang ai galaw sa ai lam mahkra hta e myit maju jung shangun nga ai. Karai Kasang a hpung shingkang dan hkung na matu masha shada da a lapran hta e ap nawng daw jau ai lam hpe galaw na ra nga ai. Anhte lit la galaw nga ai ten hta e teng man dinghpring ai hte tsawra hkungga hkat na matu mung ra nga ai. Tinang hkum kaja wa hkra shakut lu sai nga yang rawt jat galu kaba wa nga ai ndai mungkan hta e sak hkrung lu na rai nga ai. Tinang ang ai magam lam kawn Karai Kasang hpe ap nawng daw jau ai htan grau kaja ai shara gara shara hta mung n nga ai. Karai Kasang jahkrat da ya ai shara daram kaja dik ai shara ngu ai gaw n nga sai. Sang hpaw hpun gaw hpun kaji ai zawn rai tim asi kaba ni hpe si na lit nga ai dai zawn lagat hpun ni gaw hpun kaba tim asi kaji ni sha si na lit nga ai hte masha ni hpe shingnip jaw ra na ndai zawn hku na masha a prat hta n bung ai bungli lit magam lam ni hpe kangka ai hte gun hpai na ra nga ga ai.
Hkristan prat hta e byin taw nga ai yawn na zawn re ai lam ni hta na langai mi gaw hkrat sum ai lam gaw n lawm nga ai. Raitim jet ai Hkristan langai hku na atsam dat shakut rai sak hkrung hkawm sa ai lam gaw n nga ai. Karai Kasang a mungga hpe shani shagu anhte a prat hta hkam la nna hkan shadik ai lam n nga ai hpe tsun mayu ai rai nga ai. Myen ga malai zawn n gup gaw Karai lata gaw baw raw rai byin nga ai lam rai nga ai. Kam sham ai myit hte ta tut sak hkrung ai lam n nga ai gaw hka hte sau zawn san rai nga ai.
Kashin kamun hkam nna nawku hpung hta jashawn da hkrum sai Hkristan masha ni grai law wa sai raitimung anhte marai kade daram wa mi Hkristan arawn alai hte maren hkawm sa taw nga ai kun laban nhtoi ni hta sha myit su sumnung ai masha tai nna ngam nga ai nhtoi ni hta gaw Karai Kasang hpe hkap la kam sham lam n nga ai masha ni a hkrang zawn anhte sak hkrung nga sa nga na kun nawku jawng kata e sha sari hte hpring ai masha zawn rai nna nawku jawng shinggan du jang Hkristan a tara lam ni hpe kabai tawn kau da sana kun nang ngai anhte myit yu ra nga ai.
San pra jau langai a lam hpe tsun dan ga nga yang kalang mi na laban missa ngut ai ten hta e num hpung langai mi jau hpe sa tsun dan ai lam langai mi gaw wa jau e nye a kanau hpe ngai hpa galaw ra na re pi n chye mat ni ai shi gaw born again nawku hpung hta shang mat sai ngu nna tsun dan ai ten jau gaw nu num e hpa mung hkum tsun shi, shi a matu akyu shawng hpyi ya u, bai nna nang hkum nan makam masham ngang ai jet ai Cahtolic hkristan hpung masha byin wa hkra shawng galaw shakut u ngu nna Jau gaw shadum tsun dat ai. Shaloi shi gaw rai yang ngai shi hpe dai hku sha kabai tawn da ra na i ngu nna bai tsun ai ten jau gaw ya ten e nawku hpung lam dangrang hkat nna shi bai wa na n re na a akyu hpyi nsen hte mai kaja ai Cahtolic laikyang ni hte sha nang shi bai woi lakawn la lu na re ngu nna bai tsun dat ai. Maha Thamagandi gaw India Mungdan kata e nga ai hkristan ni gaw jachyum mungga hte maren jet ai hkristan byin hkra shakut na nga yang India Mungdan kata hta Hindu langai mung nga sa na n re nga nna tsun lai wa ai.
Tsawra ai nu wa hpu nau ni anhte malawng maga chye ai hte maren kam sham ai kashu kasha ni gaw grai law nga ai, raitim daini na ten e anhte hpe saw shaga nga ai lam gaw kam sham ai ni law wa na matu sha n rai anhte Hkristan shada da a lapran hta e kasi kamang la hkat nna kasi madun na masha grau nna law htam wa na matu rai nga ai.
Yesu Hkristu a matu jet ai Hkristan hku na asak n hkrung mayu ai masha gaw Madu Yesu a matu asak jaw mayu ai ngu nna tsun ai gaw n mai byin nga ai. Nawku hpung a share shagan ni gaw shanhte a sai hpe ru kau nna tinang a asak hpe Karai Kasang a matu sak jaw lai wa ai raitim anhte malawng maga gaw tinang a tsun shaga lam ni hku nna anhte a kam sham ai lam hpe tinang sak hkrung nna nga nga ai anhte a makau grup yin ni hta e sakse hkam kasi madun na matu anhte a prat hte masha ni hpe tara mungga jaw nna hkye la lu na matu Karai Kasang a matu salu salat hkrat rai nna shakut na ra nga ai. Anhte ni a machyi hkam ai lam ni gaw shakut shaja nga ai ni hpe tara jaw ai lam mung rai nga ai.
Daini e Madu Yesu shi hkum nan shinggyim hkum hkrang hpe dagraw la nna shinggyim masha ni hpe hkye la na matu mungkan de ga du sa wa ai dai Hkristu a marang e shi hte rau shi hta e jet ai mai kaja lam jet ai chyoi pra lam ni gaw anhte a prat hta e byin wa na rai nga ai. Lk 3: 17
Hpang jahtum na tara je yang na aten hta e Karai Kasang a jen kau ai lam hpe n la ai sha ya ten kaw na tinang nang a asak prat hpe san seng na hku jep jasan kau nna mai kaja lam ni hpe mahkawng da na ahkyak nga ai. Sak hkrung nga ai ahkying aten hta e tinang lam tinang n kaja ai lam ni hpe jen jasan kau nna san seng nga ai wa gaw jasan da chyalu rai nga sai majaw hpang jahtum na mungkan htum ai nhtoi hta e Karai Kasang kawn jep jasan ai lam n ra ai sha awng chyalu rai nga na ahkyak nga ai. Hpang jahtum hku nna tsun mayu ai gaw nli tum langai hpe hkai dat ai a marang kalang dan la lu ai, hpun langai hkai ai marang e htam shi hkam sha lu ai. Masha ni hpe hpaji jaw yang htam latsa hkam la lu nga ai. Tsawra ai nu wa hpu nau ni yawng tinang a tsun shaga ai lai kyang ni hte makau grup yin hpe galai shai ya lu ai Karai Kasang a lagaw lata tai let sasana gun hpai lu ai ni rai nga myit ga.
American gum san magam Lincoln gaw hkamja lam nga ai ginsup ninghkring ramma langai mi hpe shi a amu madu hku dang lai wa ai. Dai wa gaw lam magup hta kam ging ai masha langai tai lai wa ai. Dai ramma gaw ngai hpe num bungli ni chyu sha shangun shangun rai nba anyung ai da. Kaja wa nga yang dai ramma gaw shawng lam de rawt nna gasat ai lam hpe sharawng ai wa mung rai nga ai. Gum san magam wa mung shi azi yu nna tsun dat ai lam gaw ma e nang na a mungdan a matu pi asak n hkrung mayu ai nga yang ya nang shawng lam de rawt nna asak si hkam gwi ai ngu ai gaw ngai gaw n kam ya ai ngu nna tsun lai wa ai rai nga ai..
Akyu hpyi saga oh hpan Madu Karai Kasang e chyeju mahakra matu chyeju dum ai hte nang Wa hpe grau nna kam sham tsawra chye chyang lu ai hte nang wa a kabu gara shiga hpe anhte a sak hkrung lam hta hkaw tsun sakse hkam lu na matu ra kadawn nga ai myit nyan marai hte n gun atsam chyeju ni hpe mung jaw ya rit anhte a Madu Hkristu a marang e hpyi nem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw Du Sa Ladaw masum rai nga ai hti ang ai ja chyum mungga ni gaw chyum mungga daw langai Zehpani a laika 3: 14-18 chyum mungga daw lahkawng Hpilipi laika 4: 4-7 kabu gara shiga Lk 3: 10-18.
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.
