“Simsa ai lam hpe shabyin ai ni gaw a lu ma ai, kanig rai nme law shanhte gaw Karai Kasang a kasha ni, nug shamying hkrum na mara ai.”
Mahte 5:9
Tsawra ai Nu Wa Hpu Nau ni,
Anhte Hkristian sak prat hta, Simsa ai lam shabyin ai wa tai na matu gaw grai ahkyak ai ra madung rai nga ai. Karai kasang a kasha ni ngu nna hkam la ai ni a bungli madung mung rai nga ai. Shinggyim masha anhte gaw anhte a ra kadawn ai lam, ra sharawng ai lam ni lu na matu
kashun kashe rai sakhkrung nga ga ai; shada gasat hkat nga ga ai. Ndai lam ni a majaw kalang marang tinang hkrai pi nsimsa lu nga ai. Simsa ai lam nnga ai makau grup yin shatai la nga ga ai.
Ndai lam ni a majaw Karai Kasang gaw anhte ni hpe “Simsa ai lam hpe shabyin ai ni” tai nga na matu saw shaga nga ai.
Mahte laika 5:9 hta e “Simsa ai lam hpe shabyin ai ni gaw a lu ma ai, kanig rai nme law shanhte gaw Karai Kasang a kasha ni ngu shamying hkrum na mara ai” nga nna tsun da ai hte maren Karai Kasang a Kashu Kasha ni tai na matu gaw, tinang a hting bu wa hte simsa lam shabyin na
matu rai nga ai. Anhte a ntsa e kaja mi rai rai, n-gaja ai mi rai rai shanhte hte simsa lam tam na matu Madu Yesu gaw anhte hpe shadut nga ai. Madu Yesu shi hkum nan mung, ten shagu hta simsa lam a matu sak hkrung mat ai hpe mu lu ai. Hpang jahtum na lu sha poi hta pyi Karai Kasang hte shinggyim masha ni a lapran simsa lam lu na matu akroi anoi hpyi jahtau mat wa ai.
Tsawra ai nu wa ni,
Mara a mayam prat de hkrat sum mat ai majaw anhte shinggyim masha ni gaw Karai Kasang a simsa ai lam hte tsan mat wa ra ai. Dai re majaw, anhte shinggyim masha ni a sak prat hta Sumsing mungdan a simsa ai lam bai lu wa na matu ap nawng shakut shaja ai lam gaw grai ahkyak ai magam bungli rai nga ai. Ntara ai lam ni hte zingri zingrat hkrum ai ten hta pyi matai htang na malai simsa lam a matu shakut ra nga ai. Ga shadawn tsun ga nga yang: Petru a laika 3: 9-11 hta “N kaja ai hte, roi rip ai hpe roi rip ai hte matai hkum htang mu. Shaman akyu hpyi gat sun mu; shaloi she shaman chyeju a Sali wunli hpe nanhte hkam la lu na myit dai. Ndai myit jasat lu shajng na matu she nanhte hpe shaga la ai rai nga ai. Kaning rai nme law: Tinang a asak hpe tsawra ai hte nhtoi kaja ni hpe mu mayu ai wa gaw, shi a shinglet hpe n hkru n kja ai baw kaw na, shi a nten hpe masu gamaw ga kaw na, koi yen shangun ran a rai nga ai. Dai wa gaw n hkru n kaja ai baw hpe shingdu yawn kau nthawm, kaja ai amu galaw ra n-rai nga ai; simsa lam hpe tam sagawn nna de a hpang hkan ran a rai nga ai” nga nna shadum da nga ai.
Tsawra ai nu wa ni anhte galoi mung dum nga ra ai lam gaw, Ndai Mungkan gaw Karai Kasan a nhpaw n ya shaman chyeju hpe magap da lu na nrai nga ai.
Karai Kasang a nhtum nma ai tsawra myit hpe mung masha ni kaw na makoi da ya lu na nrai nga ai. Anhte gaw n-gaja ai hpe n-gaja ai hte , n tara ai hpe ntara ai hte bai n- nhtang na, daw dan ai ten hta sumsing mung dan hpe anhte a lapran e gaw de nga ai hpe dum nga ga. Raitim ndai zaw n-gaja ai lam, ntara ai lam ni hpe kaja ai lam simsa ai hku bai htang htan ai atsam lu la na matu gaw Simsa lam a hkaw hkam wa Madu Yesu a garum la ai hpe anhte rag awn nga ga ai. Dai jang she anhte gaw simsa ai sakprat hpe lu mai ai hpe mung, Esaia laika 9:6 hta tsun shadum da nga ai.
Mahte laika 5: 38 – 42 hta Madu Yesu tsun ai gaw: “Myi a matu myi, wa a matu wa, matai htang lu na, nga nna tsun ai ga hpe nanhte na yu manit dai. Ngai mahtang nanhte hpe tsun nngai, nh hkru ai wa hpe matai hkum htang mu. Na hkra maga shabyi bhe ya ai wa hpe kaga maga mung ngaw ja ya u. Na a palawng a nhkan e nang hpe tara rung de woi sa mayu ai wa
hpe, htsa palawng mung jaw kau u. Mari langai ngai, nga hpe yam sha nna deng mi hkawm shangun ai rai yang, shi the rau deng lahkawng hkawm kau u. Nang kaw na hpyi ai wa hpe jaw u; bai, nang kaw nna hkoi shap mayu ai wa hpe mung shingdu hkum kayin mat u.”
Dai re majaw n-kaja, ntara hpe hkam sha ai ten hta matai htang na malai anhte shawng Madu Yesu hpe ntara ai hku je yang dawdan sat kau sai hpe myit dum dat u. Marai langai ngai tinang a shabyi hpe bye ai ten dai wa hpe bai htang na malai mara n-nga ai Madu Yesu hpe “ Udang hta
jen sat kau u” ngu anhte jahtau marawn kau sai hpe dum u. Simsa ai lam hpe anhte chye na hkam sha lu na matu anhte a mara ni a gawng malai shi Madu gaw U dang ntsa jen noi si hkam ai hpe dum nga ga. Ndai lam ni hpe myit dum dat nna anhte Karai Kasan a myu sha ni tinang a hting bu wa hpe tsawra myit madun na aten rai sai. Anhte a ahkaw ahkang hpe sha tam taw na htan mashani Karai Kasang a tsawra myit hpe hkam sha wa hkra shakut na aten rai sai.
Dai re ai majaw tsawra ai Nu wa hpu nau ni,
Karai Kasang a tsawra myit hpe hkap hkam la nna kaning re ai masa hta raitim htingbu wa hpe tsawra lu ai n-gun atsawm Karai Kasang nanhte hpe jaw ya u ga. Aten ahkying shagu hta Simsa ai lam hpe shabyin lu ai ni tai wa hkra Karai Kasang gaw nanhte a salum hpe hkyen ya nga u ga kyu hpyi ya dat nngai.
