Daini na Ja Chyum Mungga hpe hti sumru yu ai shaloi, Madu Yesu shadum ya ai gaw, ya anhte a makau grup yin hta e masha hpan law law nga ai ngu ai hpe chye na hkap la ra nga ai. N kau mi hta masha ni kaja ai galaw tim tsun jahpyak nna masha hpe pawt sindawng shangun ai lam ni gaw Nat tsadan nan re. Tinang gaw dai zawn re pawt sindawng ai lam ni n byin hkra masha ni a man e sadi ra nga ai.
Shingrai Madu Yesu hpa galaw tim, shi hpe mara sha mu taw nga ai ni hpe shi tsun ai gaw nanhte hpe ka na matu dum shapyaw ya tim n ka ma dai. Yawn na zawn nga ai mahkawn hkawn ya tim,n hkrap mi dai. Masha n hkru ai ni e nga nna mara shagun nga ai. Dai majaw anhte a sak hkrung hkawm sa ai shawng lam hta e, mai kaja ai lam ni hpe mu mada ai rai yang hkap la nga pra chye ra ga ai. Kaga masha wa a ntsa hta, galoi e mung mara chyu sha mu mada nna, tsun jahpyak chye ai lai kyang hpe sadi sahka let hkawm sa nga ga law.
