Tsawra ai Nu Wa hpu nau ni, daini na Ja Chyum Mungga hpe hti sumru yu ai shaloi, Madu Yesu shadum ya ai gaw, ndai shinggyim masha ni hpa majaw Karai Kasang kaw lamik kumla hpe chyu sha hpyi nga ma ai kun. Shanhte gaw akyu hpyi ai n re, Karai Kasang hpe chyam ai ni rai nga ma ai. Karai Kasang n ra ai lam gaw shi hpe chyam nna, kyu hpyi ai lam nan re.
Dai majaw anhte ni akyu hpyi shagu n lu ai lam gaw, dai zawn re myit hte hpyi ai majaw mung re. Akyu hpyi ai shaloi e Karai Kasang a chyeju hte Karai Kasang a shaman chyeju ni hkam sha lu na matu ngu hpyi ai lam langai hte sha n lu ai. Tinang hkum nan mung ap nawng daw jau ai lam ra nga ai. St. Francis Asisi tsun ai, akyu hpyi ai shaloi, ap nawng daw jau ai lam lawm yang sha, hpyi ai chyeju hkam la lu ai nga tsun da ai re. Dai majaw shiga madat nga ai ni yawng mung, tinang a namak law hpa marin ai myit hpe shagrit shanem let,Karai Kasang jaw ya na chyeju kumhpa hpe myit galu ai hte hpyi let hkam la nga ga law.
