Tsawra ai Nu Wa hpu nau ni, daini na Ja Chyum Mungga hpe hti sumru yu ai shaloi, Madu Yesu shadum ya ai gaw, shinggyim masha a lam hpe sagawn yu yang, masha wa e shakawn na hpe chyu sha ra nga ga ai. Kaga wa e tsun shatan ai lam hpe n kam hkam ma ai.Tinang a ra rawng gawng kya ai lam hpe madi madun wa yang, n lu hkap la pawt sindawng chye ai.
Daini na ja chyum mungga hta, dinghpring ai wa San Yawsep gaw, Ma hkum gawng li ai Nu Maria hpe shi lit la ra ai hpe chye ai shaloi e, kadai hpe mung mara shagun ai lam n nga ai. Zim sha nga nna, Maria hte tsan ai shara de hprawng mat na matu shi myit daw dan ai. Raitim hpang jahtum e gaw, myit shagrit shanem ai, madat mara ai hte Nu Maria hpe shi lit la yu gawn lajang ai. Madu Yesu hte San Yawsep a lai ladat gaw, masha kaja ni a arawn alai nan rai nga ai. Anhte ni mung ndai zawn mabyin ni hkrum wa yang, n chye hkap la yang, n kaja ai hpe mai kaja ai hku n lu dang di yang gaw, kaja ai, byin ai masha n rai shi nga ga ai. Shingrai dingman dinghpring ai masha byin na matu gaw lam shagu hta kaja ai ningmu hte nga pra nga sa lu hkra shakut sa nga ga law.