Tsawra ai Nu Wa hpu nau ni, daini na Ja Chyum Mungga hpe hti sum ru yu ai shaloi, Madu Yesu shadum ya ai gaw, ya shi ga madat nga ai Nu Wa hpu nau ni, akyu hpyi ai ten hta gara hku myit masa hte hpyi nga ga ai kun? Tinang hpyi ai akyu hpe lu mayu ai majaw kun, ( sh ) hpyi ngut jang rai sai ngu ai myit hte hpyi ai kun, ndai hku myit masa, hkrang hte hpyi ai gaw n manu nga ai. Gara hku mi hpyi hpyi, myit masin salum dingman sanseng ai hte hpyi ra nga ai.
Makam masham myit majing hte hpyi ra nga ga ai. Daini na kabu gara shiga hta Zachari gaw dingman ai hkinjawng langai mi rai nga ai. Lamu Kasa mung dinghpring ai wa rai nga ai Zachari a hpyi ai nsen hpe jaw ya na matu du sa ai. Zachari kaw la kasha langai mi lu na re ngu tsun ai shaloi shan lahkawng gaw, asak kaba sai majaw n mai byin sai nga nna, kam sham myit ningra ai hpe mu lu ai majaw lamu kasa shi hpe tsun ai gaw, nang na kasha shangai ai ten du hkra Ga n mai shaga na ra ai ngu tsun dat u ai. Dai aten kaw nna, Zachari ga n mai shaga mat ai. Dai hpe yu ai shaloi anhte mung Karai Kasang hpe kam sham kam hpa ai myit grai nan ahkyak la nga ai ngu ai hpe tinang hkum dum shai let, Karai Kasang kaw hpyi la nga ga. Shi madu aten du ai shaloi jaw na re ngu ai hpe kam sham let shakut nga ga law.
