Tsawra ai Nu Wa hpu nau ni, daini na Ja Chyum Mungga hpe hti sum ru yu ai shaloi, Madu Yesu shadum ya ai gaw, shiga madat ni yawng hte e, Mai sa ngu nna tinang hkam la jang teng sha lu galaw ra ai. N myit yu ai, n mai byin na zawn rai yang n mai hkam la ai. Tsun mayu ai gaw, sadi dung ai masha tai ra ai. Daini na kabu gara shiga hta, Nu Maria a matu Na-um na sin rai nna, kasha shangai ya ra ai ngu ai gaw kade daram yak la ai. Shi grai naw kaji ai, mahkawn hkawn jet sha naw re ai hpe dinghku num zawn ma hkum rai nna, shangai chyinghkai ya ra ai hpe kadai wa lu galaw ya na ta?
Raitim Maria gaw Karai Kasang hpe tsawra ai, kam sham ai re majaw Yes na a ga hte maren ngai hta byin wa u ga ngu ga sadi jaw dat sai hte maren Ma Yesu hpe shangai ya sai. Shi lit la ai hte maren ga sadi dung ai. Shingrai Maria a sadi dung lit la ai majaw, shut hpyit mara lu ai mungkan masha ni yawng htani htana asak hpe lu la ai rai nga ai. Dai zawn sha shiga madat nga ai ni anhte yawng mung,Karai Kasang kaw tawn da ai ga sadi dung nga ga. Nu Maria hpe kasi la let tinang hte kaga masha ni a wenyi hpe hkye hkrang la ai lam lu la hkra, anhte yawng ap nawng shakut daw jau sa nga ga law.
