Lk.. 1: 43 Nye Madu a kanu ngai kaw sa du ai gaw hpa chyeju jaw e rai ra ai i?
Tsawra ai nu wa hpu nau ni advent ngu ai gaw du sa wa na hpe ala ding da ai lam rai nga ai. Anhte hpa hpe ala nga ai, anhte kadai hpe la nga ga ai kun, anhte gara hku na ala dingda nga ga ai kun, kaja wa nga yang anhte rau kanawn mazum nga ai masha ni a masa lam hpe mahta nna kabu gara ai hte hkap tau ala dingda nga ai kun myit yawn ai hku na hkap tau ala nga ga ai kun, shingnrai myit tsang lam ni hte ala dingda nga ga ai kun.
Daini e ala dingda nga ai lam mali hpe tsun dan mayu ai.
Langai hta gaw yu maya sha ala dingda ai lam rai nga ai. Ga shadawn bus hkring sa shara hta tsap nna bus madaw sa wa na hpe ala ai. Manawng manang ni hpe la ai. Ahkaw ahkang lu na hpe la ai, matsun na hpe la ai, ndai zawn la ni gaw kaji kajaw rai nna aten jaw rai la ai lam rai nga ai.
Lahkawng hta gaw ahkyak kaba lam hku na la ai lam rai nga ai. Dai zawn lam ni bai rai yang hkungran na ten hpe la ai. Bungli lu na nhtoi hpe la ai, hkring sa sana nhtoi hpe la ai.tsawra dik masha si wa na hpe la ai. Anhte a hpang jahtum na nhtoi hpe la ai ndai zawn ahkyak ai nhtoi ni hpe tsun ai rai nga ai.
Masum hta gaw kaja wa re ai lam hpe la ai lam rai nga ai..ga shadawn bai du wa na hpe la ai. Arawng aya lung na nhtoi hpe la ai. Lak lai ai hte galaw na poi lamang hpe la ai, kabu pyaw mai ai nhtoi shani ala ai ndai zawn lam hpe tsun mayu ai rai nga ai.
Mali hta jahten sharun ai lam hku na ala ai, lam ninghkap ai masa hku na ala ai lam rai nga ai. Ga shadawn hka bra ra na aten hpe la ai, ga lajang na matu tsi gawk de shang ai, prat hkrun lam ting hta na lu na kahtet ai shiga byin wa na n kaja ai lam ni du pru wa na hpe ala ai lam rai nga ai.
Anhte gaw hpa a matu ala dingda nga ga ai kun gara ladat hku na anhte ala nga ga ai kun, hpa a matu anhte ala nga ga ai kun, ndai lam ni hpe mahta nna anhte a prat hta hkap la ai madang tsaw ai nyem ai lam byin pru wa ai rai nga ai. Ndai bat na kabu gara shiga hta e chyoi pra ai Nu Maria gaw shi a hkritung na ma shangai wa na Karai Kasang a shangai nhtoi hpe e kam sham ai myit hte gara hku hkyen lajang nna gara hku ala dingda lai wa ai ngu ai lam gaw kam sham ai kashu kasha ni a matu kasi la hpa tai nga ai..kam sham myit nga ai masha gaw gara hku ala dingda ra na ngu ai lam hpe prat hte madun dan nga ai nu maria gaw anhte yawng a matu kasi ningli la hpa masha tai wa ai. Lamu kasa Gabriel mung nu Maria hpe ga sa shana ai ten kaw na Nu Maria gaw shi a kasha Yesu a shangai nhtoi hpe hkyen lajang nna ala dingda lai wa ai. Nu Maria hte kana Elizabeth ni a prat hte nan ala dingda lai wa ai hkrang ni hpe tara mungga la nga ga.
Shawng nnan hku na Nu Maria a ala dingda ai lam lk 1 :39.40.56 dai nhtoi hte hta e mari gaw yuda mung na bum ga e nga ai mare langai mi de alawan rawt sa wa nna..zakari a nta de shang nhtawm elizabeth hpe hkrum shaga wu ai. Maria chyawm gaw Elizabeth hte rai shata masum dang nga nhtawm nta de bai wa mat ai.
Lamu kasa Grabriel matsun hte maren re ai hpe lk 1:36 hta yu u na a amyu jan Elizabeth mung gumgai rai sayang shadang sha na-um nasin hkum rai nga nna, maudung ngu ai num hta ya shata kru rai wa sai, ngu nna tsun shana da ai majaw asak kaba yang she ma hkum rai wa ai majaw nga nna kalang lata sa nna kana elizabeth hpe daw jau ai lam sa galaw ya ai hte tsawra myit madun nna shi a kasha Yesu Hkristu hpe mungkan ga de du sa wa na hpe hkyen lajang ala dingda lai wa ai rai nga ai. Karai Kasang a sasana amu magam hpe gun hpai galaw ai hkristan hpung masha shagu Nu Maria zawn tsawra matsan dum ai amu magam hte ap nawng daw jau ai amu magam ni hpe galaw na matu ra nga ai.
Nu Maria a du sa ai lam a majaw shi a shakram ai lam a majaw kalang lata lak lai ai lam masum byin pru wa ai dai lam ni gaw. Langai hta gaw Elizabeth a hkritung na ma gaw kabu gumlawt lai wa ai lam rai nga ai. Lahkawng hta gaw Elizabeth gaw Chyoi Pra ai Wenyi a astam hpring wa ai lam rai nga ai. Masum hta gaw lak lai ai hte kabu gara nna kaba ai nsen hte shakawn ai lam rai nga ai. Hkristan sasana galaw ai masha ni a shakut shaja ai lam a majaw sasana majan je hkrum ai ni sha n re shi hte rau nga ai masha ni yawng gaw kabu gara ai hte Chyoi Pra ai Wenyi Karai Kasang a ka-up kahprwi hkrum ai ten du hkra sasana amu galaw na ahkyak nga ai.
Anhte a shakram ai lam gaw myit masin ajet ngu ai akri n lawm ai sha ntsa lam shakram ai lam sha rai nga ai kun, anhte a myit masin hta e Madu Yesu sa nu nga yang she anhte a shakram ai lam gaw Nu Maria a shakram hkrum ai hku na atsam rawng wa na re galoi mung kabu gara ai hte nnan hpang ai. Hkristan laikyang gaw Madu Yesu hte rau nga nga nna galoi mung kabu gara ai masa rai nga ai. Lk 1:28 dai lamu kasa gaw Maria kaw du jang chyeju nga lit ga nang a lu ndai dai madu gaw nang hte rau nga nga ai law ngu wu ai.
Nu Maria ziun shayi sha hku na lata hkrum ai majaw grau nna Zehpani 3:14-15.. Yawna 2:22 zahkari 9:9 ni hta kabu jahtau mahkawn mangoi na lam tsun da ai hpe mu lu nga ai. Dai majaw htam lahkawng pyaw lu na matu tinang a kabu gara ai lam hpe masha wa hpe bai gam garan ra ai. Kabu gara shiga a npawt nhpang gaw Madu Yesu anhte hte rau nga ai lam rai nga ai. Nu Maria gaw shi a hkritung hta na um na sin rai tim kalang lata rawt nna bum ga e nga ai shi a kana Elizabeth nga ai shara de kade yak hkak ai mi rai rai sa mat wa ai. Dai gaw hpa majaw ta nga yang Karai Kasang gaw shi hte rau nga ai. Lamu Kasa ga sa shana ai hte maren shi a kana Elizabeth ma hkum byin ai shata kru de du taw nga sai hpe chye dat nna kabu gara ai hte shi hte rau rai nga ai Madu Yesu hpe Elizabeth hte mung rau nga shangun mayu ai a majaw sa du ap nawng daw jau garan kachyan ya lai wa ai rai nga ai.
Nu Maria gaw shi a kabu gara ai lam hpe myit masin hkying hka pat rai nga na lam kalang mi mung nmyit lai wa ai. Shi a matu gaw akyu hpyi ai hte ta tut hkan galaw ai lam bai Karai Kasang a ntsa e myit maju jung ai hte bungli hpe kaprawn nna galaw lu ai jan rai nga ai. Karai Kasang a matu nga nna sak jaw ap nawng da ai hte Karai Kasang hte ga shaga rai nna masha wa hpe tsawra myit hte ap nawng daw jau lu nga ai rai nga ai.
Tinang hte ni htep nga ai masha ni hpe tsawra myit madun ai gaw Karai Kasang hpe tsawra ai lam rai nga ai hte Karai Kasang ntsa e grau nna tsawra myit nga wa ai zawn anhte a masin salum kawn Karai Kasang hte ga shaga kyu hpyi matut mahkai ai hku na anhte galaw taw nga ai amu bungli ni a matu n gun atsam ni prat hta jat wa shangun ai. Madu Hkristu a shangai nhtoi Hkristmas poi garai n du shi yang masha ni gaw lam amyu myu hte shuk taw nga ai…shangai nhtoi poi a matu myit kraw lawang hkyen lajang ai lam ni hpe galaw ra nga ga ai..mu mada ai lam hpe galaw nna myit masin wenyi hpe gara hku na hkyen lajang ra ai ngu ai hpe Nu Maria lam madun ya nna tara mungga jaw nga ai…masha wa a matu amu kyin wa magang anhte myit masin kaw na madu yesu hte ga shaga wa mayu magang rai wa sai nga yang gaw madu yesu a du sa wa na lam a matu anhte a prat hta e hkyen lajang nga sai re hpe myit dum dat u…jet ai hkyen lajang lam gaw anhte hpe myit ndaw shangun ai sha kyu hpyi ga byin wa shangun ai. 2Samuel 6: 2-11 hta e David hkaw hkam gaw tara kanu lam shi bang tawn da ai ga shaka sadet a shawng e kabu gumlawt ai hte ka lai wa ai zawn shakawn 114: 4.6 ai zawn mungga shanu nga ai ga shaka sadet rai nga ai nu maria a hkritung hte du shang wa ai shaloi elizabeth hte rau shi a hkritung ma yawhan mung kabu gumlawt ai lam rai nga ai..
Tsawra ai nu wa hpu nau ni Elizabeth a prat hpe yu ga nga yang mung kasi la hpa law law rai nga ai madu yesu gaw Nu Maria a hkritung hta e chyoi pra ai wenyi a atsam hte na um na sin lai wa ai zawn elizabeth a hkritung hta mung Yawhan ngu ai na um na sin wa shangun ai mung chyoi pra ai wenyi a atsam hte sha rai nga ai. Lk 1:43.44
Elizabeth a tsun shapraw ai ndai chyum daw hpe myit sawn sumru nna mungga la ga nga yang malawng maga tinang a myit atsam ngang kang ai makam masham hpe tinang n re masha wa a tengman ai lam hpe madi madun madi shadaw ya ai lam hku na grai nan kaja ai lam mung rai nga ai. Daini e Nu Maria kaning re ai num ngu ai hpe Elizabeth kawn astawm sha madi madun dan nga ai. Num mahkra hta nang a lu ndai na a hkritung na ma mung alu nga ndai nga nna tsun ai lam hpe Num Maria hta n ra tim masha ni hta ra kadawng nga ai.
Karai Kasang gaw masha ni hpe laga masha ni hte woi awn shangun ai kalang marang e chyam na hpe yu ra ai zawn masha ni kawn anhte hpe gara hku rai nga ai hpe yu ya na ra nga ai.
Nye madu a kanu ngai hpang de du sa wa ai ahpa chyeju rai a ta.kaning rai ngai hkam la lu nga a ta, Elizabeth kawn Nu Maria gaw Karai ajet masha ajet ndai lam lahkawng yang nga ai hkye la madu a kanu Karai Kasang a kanu ngu ai hpe Nu Maria hpe madi madun shakawn tsun ai zawn anhte shinggyim masha yawng hpe mung Karai Kasang a kanu ngu ai hpe madi madun ya nga ai.
Lk 1:45 kamsham ai numsha gaw a lu ai kaning rai nme law dai madu kaw nna shi hpe tsun ai ga gaw dik wa na ra ai.
Nu Maria Karai Kasang a kanu tai wa ai gaw lak san ahkaw ahkang a majaw kasha Karai Kasang hpe shi a hkritung hta gun lu ai a majaw chyoi pra nga ai n rai nga ai. Shi a kam sham myit grai kaba ai a majaw chyoi pra nga ai lam re hpe Elizabeth kawn madi madun dan dat ai lam mung rai nga ai. Lk 11:27-28
Madu Yesu hkum nan pi shi a kanu chyoi pra nga ai lam gaw shi a kam sham myit kaba la ai a majaw Karai Kasang a mungga hpe madat hkam la nna hkan shadik ai jan rai nga ai hpe madun dan dat ai lam rai nga ai.
Dai majaw anhte a prat hta e kabu gara shiga hpe Nu Maria zawn madat hkam la nna hkan nang hkan shadik ai kam sham myit kaba ai ni byin tai lu nna Karai hpe lashum manat lu ai tara mungga lu ai ni rai nga myit ga.
Akyu hpyi saga oh hpan Madu Karai Kasang e chyeju mahkra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a Madu Hkristu a marang e hpyi nem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw du sa ladaw mali rai nga ai hti ang ai ja chyum mungga ni gaw chyum mungga daw langai ..Mika laika 5: 1-4 .chyum mungga daw lahkawng Hebre laika 10: 5-10 kabu gara shiga Lk 21: 25-28, 34-36
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law .
