Chyoi pra ai Wa e, an gaw langai sha rai nga ga ai zawn, ndai ni mung rai nga mu ga, nang ngai e jaw ai ni hpe, na a mying ningsang hta shagrin shangang da u”. (Yawhan 17:10-11)
Anhte gaw makam masham rum ai hpu nau ni hte kahkyin gumdin na matu hpan da hkrum saga ai. Myit hkrum kahkyin gumdin ai hpe jawm gaw gap ai shaloi tinggyeng akyu tam ai hte myit tsaw myit dap ai, ngu ai gyit hkang sumri hpe dan di lu ga ai. Anhte a myit mang ai hte tinggyeng myit hpe ap nawng kau ai shaloi, asak hpe n hpaw n-ya mu lu ga ai. Dai asak hpe gaw tinang a kyu hpe ap nawng kau ai kaw nna sha lu la mai nga ai. Ahkyak dik ai lam gaw, anhte a myit hkrum kahkyin gumdin ai hta Yesu gaw hpung shingkang hkam la nga ai; shagrau sha-a ai hkrum nga ai.
Yawhan 17:10-11 hta Yesu tsun ai,
“Ngai lu malu gaw na a rai nga ai; nang lu malu mung, nye a rai nga ai rai nna, nye a hpung shingkang shanhte hta dan hkung li ai. Ya kaw nna ngai gaw Mungkan ga e n nga nngai, ndai ni chyawm gaw, Mungkan ga e nga nga na rai ma ai: ngai gaw nang hpang de wa na rai nga nngai. Chyoi pra ai Wa e, an gaw langai sha rai nga ga ai zawn, ndai ni mung rai nga mu ga, nang ngai e jaw ai ni hpe, na a mying ningsang hta shagrin shangang da u”.
Masha marai lahkawng kahkyin gumdin lu na matu gaw Chyoi pra ai Wenyi a atsam hte sha mai byin ai.
Shinggyim masha ni sak hkrung shanu nga na hte kaja ai de galai shai na lam gaw, gara tsang madang hta raitim, Karai Kasang a chyeju hte n rai yang, ap nawng let sak hkrung na n mai byin ai. Anhte a kahkyin gumdin ai lam hta Yesu shagrau hkrum nga ai. Dai majaw, Hpung masha ni a lapran hta kahkyin gumdin na matu shakut ai gaw ahkyak dik rai nga ai.
Hpung masha shada dangrang hkat ai, sari jahpoi ahpyak hkat ai, kahkyin gumdin ai lam n nga ai rai yang, anhte gaw, mungkan masha ni hpe hpa lam ni hpe wa ndau ya nga ga ta? Lama ma hpe tsun shapau chye ai, masha hpe jeyang daw dan ai, tinang myit machyu ai Hkristan ni hta shanhte yu ra sharawng kasi hta la na lam hpa mi nga na rai ta?
Hkristu gaw, anhte hpe shi a lagaw lata ni tai na matu ga ndat jaw da sai. Masha ni hpe shi a sape ni shatai na matu aming jaw da sai. Anhte a magam bungli ni gaw, tsaw ra ai myit n lawm yang, kaman lila sha tai nga ai.
Anhte a myit tsaw, gumrawng ai hte tinggyeng akyu tam ai lam hpe shada kahkyin gumdin ai lam hta grau madung tawn ai rai yang, chyum mungga a tara lam ni hpe ading tawk tawt lai ga ai.
Ga-li ga-law ai hte gumrawng gumtawng ai hpe shakum nhpan zawn anhte a lapran e tawn ga ai rai yang, Hkristu anhte hpe shaga la ai lam a yaw shada lam hpe ahtu hkra nga ai.
Kahkyin gumdin ai lam a matu jawm shakut ra ga ai hpe chyum mungga hta asan sha tsun da nga ai. Masha ni gaw grai yak chye ai majaw n hkan tim n ra ai ngu nna hpaji jaw ai n rai. Ndai gaw Karai Kasang kaw na aming rai nga ai; ahkyak dik rai nga ai. Ehpesu 4:1-3 hta San Pawlu tsun da ai,
“Dai re ai majaw, nanhte hpe shaga la ai lam hta e, nanhte ging dan ai hte hkawm nga myit ga, dai Madu a jaw e bawng dung ai wa, ngai gaw, nanhte hpe shadut jahkat made ai. Lam shagu hta myit nem ai hte lam shagu hta myit gyip nna, myit galu kaba ai hte, a hkawm nga mu: Wenyi a myit hkrum ai lam hpe ngwi pyaw ai makyit sumri hte hkan shatup na, larau ladau rai nga mu”.
Bai, Roma 12:16 hte 2Korinhtu 13:11 hta mung Kasa Pawlu tsun ai,
Langai hte langai shada da myit shara mu; arawng lam n tam ai sha, arawng n lu ai ni hte mazum hkau nga mu. Tinang hkum hpe hpaji rawng ai zawn, hkum nawn nga myit; Dai hta kaga hpu nau ni e, kabu gara nga mu; hkum hkum tsup tsup rai nga mu; shangwi shapyaw ai hkam la mu; myit mang langai sha rai nga mu; ngwipyaw ai lam hkan nna, tsaw ra myit rawng ai hte ngwi pyaw shangun ai Karai Kasang gaw nanhte hte rau nga nga na ra ai”.
Nanhte gaw “simsa lam hpe gun ai ni” tai na matu shaga la hkrum mit dai. Nanhte hta shanu nga ai Chyoi pra ai Wenyi gaw, nanhte hpe tinang a hpung masha manang ni hte rau – bai gaw sharawt ai, shalan shabran ya ai, myit hkrum myit ra ai hte sim sa ai lam ni hpe hkan tam ai ni tai na matu ra sharawng nga ai.
Shi gaw, nanhte hta tsaw ra ai, sari rawng ai, myit galu ai hte nanhte a lapran e shi tawn da ai hpung masha manang ni hpe hkungga la-ra chye ai chyeju ni hte jahhpring ya mayu ai.
Nanhte a lapran hta n hkrum n ra ai lam ni pru wa ai hpe dum jang, Karai Kasang hpe hkrit hkungga ai a marang ai tinang a hpu, nau, na ni hpe daw jau ai lam hpe mahtang lata mu. Kade yak ai raitim, sim sa lam hpe lu la hkra shakut mu. Dai hku galaw ai a marang e, nanhte gaw Madu Yesu a hpung shingkang hpe shadan shadawng ya nna, Madu Yesu jaw ya ai hkye hkrang la ai lam hku nna sha, mau hpa galai shai ai lam ni byin mai ai lam hpe Mungkan de ndau shabra lu na mit dai.
- Kam sham ai ni a Wuhpung hta Myit hkrum kahkyin gumdin ai lam ahkyak ai hpe sumru ga.
“Dai hta kaga hpu nau ni e, kabu gara nga mu; hkum hkum tsup tsup rai nga mu; shangwi shapyaw ai hkam la mu; myit mang langai sha rai nga mu; ngwipyaw ai lam hkan nna, tsaw ra myit rawng ai hte ngwi pyaw shangun ai Karai Ksang gaw nanhte hte rau nga nga na ra ai”.
- Na a makau na hpung masha hpunau ni hte myit hkrum kahkyin gumdin ai lam hta shakut ai shaloi dut dang ai lam gaw hpa rai ta.
Kaga Hkristan ni hpe tsawra ai lam hpe pat shingdang ai myit jasat hte mu-jut ni gaw hpa rai ta? Dai kahkyin gumdin ai lam hpe hkan tam ai lam hta daini, Chyoi pra ai Wenyi gaw nang hpe hpa galaw shangun mayu ai kun?
- Kahkyin gumdin lam hpe hkan tam ai shaloi, nang hpe pat shingdang nga ai gumrawng ai myit hte n kaja ai maga hku mu ai lam ni hpe tawn kau u.
Sim sa lam a matu shakut mayu ai nden ja ai myit hpe jaw ya na matu akyu hpyi u; tingkyeng akyu ara tam na hta grau nna ap nawng daw jau ai prat hpe lata u.
Kaga masha ni hpe tsaw ra ai lam hta tinang hte hpang ra ai. Nang shanhte hpe shawng tsaw ra ai hpe rai n madun lu ai rai yang, shanhte galai shai wa na hpe hkum myit mada. Kahkyin gumdin ai lam hpe anhte hkum-nan rai n lu shakut yang, shanhte anhte hpang de sit sa na hpe n mai ala ga ai. Shanhte n gindan tim, shanhte hpe tsawra na matu, Madu ra sharawng nga ai; dai gaw shi Madu a “Aming” rai nga ai. Tsaw ra ai hpe daini jang lata u; kam sham ai ni a lapran na kahkyin gumdin ai lam a yaw shada lam hte dai kaw na lu la na nhpaw n-ya asak hpe mu tam hkra shakut ga.
Kanawn Mazum Ai Hta Myit Mada Ai
Yawhan 17:3
Yawhan 17:3 hta Madu Yesu gaw, shi a Hkyingjawng Agyi akyu hpyi ga yawng hta ahkyak dik hte dan-tawk re ai tengman ai lam ni hta na langai mi hpe tsun shapraw ai. Yesu tsun ai, “Htani htana asak ngu ai chyawm gaw, langai sha rai nga ai hte tengman re ai nang Karai Kasang hpe mung, nang shangun dat ai wa Yesu Hkristu hpe mung, shanhte chye chyang lu ai hpe, ngu ai rai nga ai”. Htani htana asak ngu ai gaw, Karai Kasang hpe grai ni htep ai hku chye ai lam rai nga ai – Karai Kasang a lam hpe sha chye ai n rai, Karai Kasang hpe chye ai ni hpe chye ai mung n rai, nang hkum-nan Karai Kasang hpe kaja wa hkrum lu, chye lu ai lam rai nga ai.
Asan sha tsun ga nga yang, Karai Kasang hte ding-yang, man man ading-tawk hkrum ai lam gaw, hkye hkrang la hkrum na matu n lu n mai ai lam n rai nga ai. Ngai ma prat kaw nna hkye hkrang la hkrum sai ngu ai hpe kaja wa tsun gwi nngai, raitim, Yesu hku nna Karai Kasang hte hku hkau ni htep lu na lam nga ai ngu ai hpe chye madat na matu shaning law law aten la ra ai. Ngai nawku jawng de sa ai, Karai Kasang a lam na la ai, shi hpe nawku daw jau ai, chyum mungga sharin ya ai tara lam ni hpe hkan ai, raitim, ngai ahkying aten law law nawku nga ai Karai Kasang hpe tatut kaja wa n chye la nngai. Shi ngai hpe tsaw ra ai hpe ngai kaja wa n hkam sha shi ai. Shi a simsa ai hte kabu gara ai, ni htep ai lam hpe n hkrum yu shi ai. Shi ngai hpe dan-tawk ga shaga nna lam madun nga ai hpe rai n hkam sha shi ai. Wa Karai hte shada hku hkau ni htep ai hku kanawn mazum ai kaw nna sha, pru wa lu ai nhpaw n-ya asak hpe rai n hkrum katut yu ai.
Teng ai hpe tsun ga nga yang, nang Shi hpe chye chyap na matu Karai Kasang myit ra nga ai. Nang sumsing lamu de du na matu chyu sha, Yesu si hkam ai n rai. Nang dinghta ga ntsa e naw nga yang kaw nna, kaja wa asak hkrung lu na matu Shi a asak hpe ap nawng kau ya sai. Nang gaw, nang hpe gyin shalat ai, hkye mawai la ai, bau sin makawp maga da ai Karai Kasang hpe htep lahti rai chye chyap hku hkau lu na matu hpan da hkrum nit dai. Shi a ni htep ai hte tsaw ra ai ngu ai tengman lam hte hkayawp da hkrum ai sha n rai yang, ngang grin ai sim sa lam hpe nang galoi mung mu tam na n re.
Shinggyim masha ni yawng a myit mada shara gaw, “Teng man re ai Karai Kasang hte shi shangun dat ai Yesu Hkristu” hta mahta nga ai. Asak hkrung ai Karai Kasang hpe nang kaja wa chye la ai aten n du dingsa, na prat hta hpa lam mung jaw ai de du na n rai, Hkristu si hkam ai lam a hpung shingkang hta lam ang na n rai nga ai; “Madu Hkridtu Yesu a chye chyang ai lam a chyahtum chyalai re ai majaw, yawng mayawng sum mat ai lam arai nga ai”Hpil 3:8 ngu nna nang n sawn la yang, nang hta kaja ai de galai shai wa ai lam, nang hpe shingrup da ai ra kadawn ai lam ni kaw na lawt lu ai hpe nang hkam la lu na n rai.
Sumsing lamu na na a Kawa hpe nang kade daram sung hkra chye nit ta? Shi gaw, na a prat hta kade daram sak hkrung shamu shamawt nga a ta? Madu Yesu hte ni htep hku hkau ai hku nna sha lu la mai ai myit dik myit pyaw lam hpe hpa lam ni hte naw galai bang taw nta? Na Kawa a man de sa du nna, na a lai sai ten, ya na ten, du na ra ai aten ni mahkra hpe ap da u. Nang hpe shi a kaja wa byin nga ai, ni htep ai hte tsaw ra ai de lam woi shading ya na matu hpyi u.
Yeremia 9:23-24 hta tsun ai, “Hpaji rawng ai wa gaw tinang a hpaji hta hkum gumrawng u ga; n-gun rawng ai wa gaw tinang a n-gun hta hkum gumrawng u ga; sut su ai wa gaw tinang a sutgan hta hkum gumrawng u ga;
gumrawng ai wa chyawm gaw, ga ntsa e n-gaw n wai ai myit, tara jeyang ai myit, dinghpring ai myit madun ai wa gaw, ngai Karai Kasang rai nga ai, nga nna nye a lam chye na lu ai hta she gumrawng nga u ga: dai lam hta ngai sharawng awng nga nngai,” nga nna Karai Kasang tsun ai.”
Nang akyu hpyi ai shaloi, na Karai Kasang “n-gaw n wai ai myit, tara jeyang ai myit, dinghpring ai myit madun ai” ngu ai lam ni hpe grau sung ai hku chye na lu hkra aten la u.
- Sumsing Lamu na, na Kawa hpe hku hkau chye chyap ai lam ahkyak nga ai hpe sumru u.
“Htani htana asak ngu ai chyawm gaw, langai sha rai nga ai hte tengman re ai nang Karai Kasang hpe mung, nang shangun dat ai wa Yesu Hkristu hpe mung, shanhte chye chyang lu ai hpe, ngu ai rai nga ai”. Yawhan 17:3
- Ndai aten hta Karai Kasang gaw, shi kaja wa nga nga ai lam, ni htep nga ai lam, nang hpe chye shangun na matu hpyi u.
“Myit masin mahkra hte ngai hpe hkan tam yang, nanhte ngai hpe mu na mit dai”. Yeremia 29:13
- Yesu “marai langai rai nga ai” lam hpe chye na matu aten la nna sumru u.
Shi a hkum hkrang hpe na myi hte n mu lu tim, shi hpe mu lu na matu na salum a myi hpe shi hpaw ya na ra ai. Nang shi hpe aten jaw ai rai yang, shi a ni htep ai hpe nang hpe chye shangun na ra ai.
“Shi nanhte hpe shaga la ai lam gaw, kade wa kaba ai myit mada shara re ai lam dai Nawku Hpung a chyoi pra ai Hpung masha ni hta, n taw n tsang ai hpung shingkang, Shi a sali wunli kaba nga ai”. Ehpesu 1:18
Makam masham hte sak hkrung lu na matu hka ja ra ga ai. Mungga a tengman ai hku nna, Shi gaw kaja wa nga ai, anhte hpe tsaw ra ai, shi si hkam nna anhte hpe jaw ai Hkristan makam masham hpe anhte hkam sha lu ga ai. Ni htep ai hku kanawn mazum ai lam n nga, n lawm ai sha akyu hpyi nawku ai lam gaw anhte hpe matsan mayan byin shangun ai. Anhte hpe tara upadi ni e gyit da hkrum ai kaw na shalawt dat na matu Yesu du sa ai. Hkan-sa tara ni hte ka-up da ai makam masham nawku hpung kaw na anhte hpe shalawt la nna, chyeju hte hpring ai, Karai Kasang hte ni htep hku hkau lu ai ga shaka ningnan de anhte hpe woi bang wa sai. Sumsing lamu na nanhte a Kawa hte shi e shangun dat ai Yesu hte hkau chyap ai lam hta lani hte lani galu kaba wa u ga.
