Tsawra ai Nu Wa hpu nau ni, daini na Ja Chyum Mungga hpe hti sum ru yu ai shaloi, Madu Yesu shadum ya ai gaw, anhte ni shani shagu magam bungli ni hta chyu sha aten jaw na n mai nga nga ai. Tinang a wenyi lam a matu mung myit simsa ai the sum ru yu ra ga ai. Tinang a ra rawng gaw kya ai lam ni, rawt jat ai lam ni hpe mung sumru dinglik yu ra ga ai. Karai Kasang a mai kaja ai lam ni hpe ngai gade ram mu chye hkap la nga sai kun ngu ai lam ni hpe aten jaw let sumru yu ai lam ni n nga ai rai yang, madu a myit hta sim sa ai lam n lu la ai hta sha n ga, Karai Kasang a chye ju ni hpe mung mu mada lu na n rai nga ai.
Dai ni na ja chyum mungga hta, Zahkari gaw shata 9 tup Ga n mai shaga na nga nga ai ten ni hta e, shi gaw Karai Kasang a mai kaja ai lam ni, shi a Ga sadi ni hpe atsim sha nga nga let, sum ru ding lik yu ai majaw, shi bai Ga lu shaga wa ai shaloi e, Karai Kasang a chyeju ni hpe shakawn kungdawn chye ai. Karai Kasang hpe mung lani hte lani grau grau tsawra wa lu sai. Shingrai shiga madat nga ai ni anhte yawng mung, madu a kam bau magam lam ni hta chyu sha, kyin taw ai ni n byin u ga. Madu Karai a mau hpa atsam ni hpe shakawn kungdawn chye nga ga. Myit sim sa ai ten ni hpe tam la let, shi madu hpe aten jaw let, shi a mai kaja ai lam ni hpe sumru dinglik let, nga sa lu hkra matut shakut sa nga ga law.
