Daini na Ja Chyum Mungga hpe hti sum ru yu ai shaloi, dai ni Dec 26 ya shani gaw, Madu Yesu a matu sat kau hkrum ai, san pra ai Stephen a poi n`htoi hpe e, nawku hpung kaw nna shagrau sha a ai, poi n`htoi hpe galaw nga ga ai. Shingrai san pra ai Stephen a mying hpe hkam la nga ai ni yawng hpe mung, ngwi pyaw ai poi n`htoi rai u ga ngu shakram dat lu ga ai. Ndai san pra ai Stephen gaw, chyoi ai Wenyi the hpring zup ai the, marai rawng ai wa, teng man ai hpe gwi gwi chyu sha tsun chye ai wa rai nga ai.
Karai Kasang a ra sharawng ai prat hte sak hkrung nga sa ai wa re. Teng man ai tara mungga ni hpe chyu sha hkaw tsun gat hkai ai wa mung re majaw, lak lai ai chyeju hkam la lu ai wa nan re. Ya Dai ni anhte hpe san Stephen gaw, hpa baw sadi jaw nga a ta nga yang e, hkristan masha kaja langai mi hku nna, madu Yesu the seng nna, kaning re ai ruyak jam jau lam ni hkrum katut wa ai raitim, madu a matu tinang a asak hpe ap nawng gwi ai ni tai ra ga ai. Dai majaw nu wa hpu nau ni, anhte a n kaja ai lai kyang ni namak lawhpa ai myit marin ai lam ni hpe tawn kau, galai kau let, gwi gwi hte madu Yesu a tara lam ni the bung hkra sak hkrung hkawm sa nga ga law.
