Tsawra ai nu wa hpu nau ni e ndai laban gaw Nazareth mare kaw nga lai wa ai Madu Yesu, Nu Maria, Yawsep ni a Chyoi pra ai htinggaw poi nhtoi rai nga mali ai.Ndai chyoi pra ai htinggaw poi nhtoi hpe galaw ai lam gaw mungkan ntsa e nga ai kun dinghku shagu grau nna hkristan kun dinghku shagu kun dinghku nawku hpung kaji ni byin tai na matu kasi ningli madun lu na matu kasi la lu na matu galaw ai lam mung rai nga ai.
Tsawra ai nu wa hpu nau ni kun dinghku ngu gaw nawku hpung law law hta na kaji dik uhpung mung rai nga ai.Nawku hpung kaba ni n-gun ja galu kaba na matu ngu ai gaw kaji ai uhpung ni n-gun ja na matu mung ra nga ai.
Ndai bat na mungga a matu shawng nnan e shadum sharin ya ai lam hku garan gachyan ya mayu ai.
Langai hta e kun dinghku shagu uhpung shagu a matu kasa ni hkaw tsun lai wa sai npawt nhpang tara ni gaw kawlose,3: 13 shada da hkam mana ai hte mara langai ngai nga yang gaw shada da raw dat hkat nga mu dai madu nanhte a mara hpe raw dat kau ya ai hte maren nanhte mung galaw nga mu.
Laga lam nrai sai madu Yesu a hkrang rai nga ai.Tsawra myit hpe npawt madung da u ngu ai tara rai nga ai.
Lahkawng hta gaw tsawra myit hpe npawt da ai madu yesu a masa lam gaw mtt 18: 22 shanit lang du hkra sha nrai sanit shi e sanit lang du hkra mai rai nga ai.Ngai nanhte hpe tsun de ai.
Masat da ai lam n nga ai galoi mung mara raw ya ra ai lam rai nga ai.Roma 5: 10 hta kaning rai nme law anhte hpyen ni naw rai nga ga yang shi a kasha a si hkam ai a majaw anhte Karai Kasang hte htinglu htinglai ai hkrum lu saga ai rai yang gaw htinglu htinglai hkamla ngut jang shi a asak sumdam hta e anhte a hkyehkrang la ai grau nna hkrum na ga ai.
Masum hta gaw anhte gaw kun dinghku shagu a ntsa e tsawra matsan dum chye ra nga ai.Kawlose 3:12 karai kasang a lata la ai ni hte chyoi pra nna tsawra hkrum ai ni zawn matsan dum ai sumnung ai mai kaja ai myit nem ai myit gyip ai hte myit galu kaba ai hpe dagraw nga mu.
Ndai lam ni hpe bu hpun ai masha shagu gaw masha wa kunghpan wa na matu jaw teng ai hpe jaw teng ai hku shakawn chye ai.Majoi hpa ai hku sha kanawn ai lam n re. Kanu kawa gaw kashu kasha ni a awng dang lam a matu arawng la chye ai zawn shut shai taw nga ai lam hpe mung hpaji chye ai ladat hte madi madun ya na ahkyak nga ai.
Mali hta gaw kawlose 3:14 dai nlang hte a ntsa e hkum tsup re ai makyit sumri ngu ai tsawra myit hpe kahtap hpun nga mu.
Roma 13:8-9 shada da tsawra ai hta kaga kadai hte mung hpa hka mung hkum kap mu masha kaga hpe tsawra ai wa gaw jep ai tara hpe shatup ngut nu ai.
Tinang hkum hpe tsawra ai zawn htingbu wa hpe mung tsawra ra ai lam rai nga ai.
Manga hta gaw kawlose 3:19 la ni e madu jan ni hpe tsawra nga nna shanhte hpe kajet kaje hkum rai nga myit
Eph 5:25-28
Kru hta gaw kashu kasha ni kanu kawa ni a ga madat mu ngu ai lam rai nga ai. Eph 6:1-2 hta ma ni e nanhte a kanu kawa yan hpe dai madu hta madat mara nga mu dai gaw ging dan ai lam rai nga ai.Nang ngamu ngamai ai hkrum nna na a nhtoi gaw dai mungdan hta galu kaba nga lit ga na nnu yan nwa hpe hkungga lara di mu ngu nna tsun da nga ai.
Madu Yesu zawn kashu kasha ni gaw kanu kawa ni a ga hpe karai kasang a sharawng awng ai hte maren madat mara ai rai yang madu yesu zawn hpaji ningli hta nnga hkum hkrang lam hta nnga rawt jat galu kaba wa na re.
Ndai bat na mungga a daw lahkawng hku na nawku hpung a sharin achyin ya ai lam hpe tsun dan mayu ai nawku hpung hkrumra zup kaba ni a matsun ai lam.
Wa sarabyin a sharin achyin ai lam ni hpe tsun dan mungga jaw garan kachyan ya mayu ai.
Tsawra ai nu wa hpu nau ni hkye la madu gaw shi a hkye hkrang la ai magam hpe yu maya kun dinghku kaw na npawt hpang mayu ai gaw kaja wa rai nga ai.Lahkawng lang na Vaticant zup hpawng kaba hta lumgensium laika masat lahkawng hta e, kun dinghku hta e kanu kawa ni a tsun shaga ai laikyang ni gaw kashu kasha ni hpe makam masham lu na matu sharin ya ai shawng nnan na sara ni re nga nna tsun da nga ai.Wa sarabyin Yawhan Pawlu lahkawng kawn tsun lai wa ai lam mung kun dinghku nta masha ni rosary arau hti ai kun ayan na nrai ti pi kalang marang kashu kasha ni hte arau kun dinghku nawku hpung kaji hku na hpawng chaywm let akyu hpyi ai lam hpe gaw nga ai kun nga nna tsun lai wa ai.
lahkawng lang na vaticant zup hpawng hta lumen gensium laika masat 11 hta e madu yesu hta pawng hpawm nna kun dinghku shagu gaw madu yesu a mungsung lam hta e shang lawm wa ai re majaw dai zawn kun dinghku shagu hpe domestic church kun dinghku nawku hpung kaji ngu nna shamying tawn da ai rai nga ai.
Wa sarabyin pawl kru hku nna mung 1964 ning jan5, shani e jaw lai wa ai mungga hta e Nazareth mare na htinggaw gaw Madu yesu a sak hkrung lam gaw anhte a makam lam nnan chye na lu ai shara kabu gara shiga sharin la ai shara tai wa ai.
Shawnng nnan hku tara mungga la ra na lam gaw kasha Karai Kasang gaw shi hkum shagrit shanem ai hte nawku n law hkra sharawng shara rai kam sham myit kaba hte galaw lu na matu chye na hkra anhte shakut ra nga ga ai. Madu Yesu gaw shi hkum shi mungkan ga hpe madun ai hta e ga shadawn ni mu mada lu ai lam ni hte atsawm tsun dan nga ai re. Madu Yesu a matu lam magup gaw lachyum hte hpring nga ai yawng mayawng gaw Madu Yesu hpe madi madun ai lam ni chyu rai wa ai zawn anhte ni mung lam magup hta madu yesu hte shi a tara mungga ni hpe tsun madi madun dan lu na matu hkrak rai na matu mungga la chye ra ga ai.
Nazareth mare na kun dinghku gaw zim ai simsa ai hte nga ai lam mung masha shagu a matu kasi la hpa rai nga ai. Zim rai ai lam gaw myit masin a myit kup ai masa hpe madun dan nga ai makau grupyin a garu gachyi ai lam mawng gunglau ai lam ni a matu kachyi mung n shamawt myit kup ai hte nga lu na matu tara mungga hkam la na ahkyak nga ai.
Nazareth mare na chyoi pra ai htinggaw zawn myit simsa ai hku nga lu ai zawn jet ai karai kasang a sharin achyin ya ai lam ni.Chyoi pra ai wenyi a shadut ai shadum ai lam ni hpe atsawm rai hkam la nna hkawm sa yang she byin lu na rai nga ai.
Nazareth mare na hpunda hku nna kun dinghku kata na kashu kasha ni a hkan sa ra ai lit.Kanu Kawa lit ni hpe shinggyim lam hku hkan sa ra ai lam ni hpe mangan nga hkra hkan sa ai zawn kun dinghku shagu hta mung shingyim hpawng ni hta hkan sa ra ai lit hpe mangan nga hkra galaw let chyoi pra ai hting gaw a tsawra myit hta langai zawn kahkyin gumdin tsawm htap ai maka dingman ai lam a tsawm htap maka chyoi pra ai san seng ai prat a tsawm htap maka shingyim arawn alai ni hte hpring zup na mung ra nga ai.
Hpang jahtum daw hku nna matsun ai lam mali hte mungga jaw mayu ai.Tsawra ai nu wa hpu nau ni nta shagu a kun dinghku masha ni gaw Karai Ksang hpe shawng chye hkra shakut ra nga ga ai.Anhte a prat hkam sharang ai hku na anhte hte rau nga ai nta masha ni hpe myit dik myit pyaw lam lu hkra sak hkrung lu na matu galaw ra nga ai.Kun dinghku ngu ai gaw mai kaja lam hpe gaw gap ai tara jawng rai nga ai.Yu maya hku na karai ksang hte tara lam ni hpe mu mada ai tara jawng mung rai nga ai.
Myit galu hkam sharang tsawra ai lam ni hku na mai kaja lam ni hpe gaw gap la lu ai shara, shari shadang hpring ai shara hte Karai Kasang hpe mu tam na matu kaja dik shara mung rai nga ai.
Kun dinghku ngu ai gaw shinggyim lam ni hta ningtawn wa hkra gaw de ya ai shalat shara mung rai nga ai.Kanu Kawa kahpu kana ni hpe gara hku madat mara na kun dinghku kata gara hku myit shang sha ra na ngu ai ndai lam hpe shapan shalat ai shara mung rai nga ai. Lit la chye ai lam ma hkra sharin la ai shara mung rai nga ai.Shada da a lapran e pawn ba garum shingtau hkat ai lam ni hpe shawng nnan hku sharin lai ai shara rai nga ai.Kyang n bung ai lapran na rau lata gin dun let tsawra myit hte pawng hpawng chye ai lam ni hpe mung shapan shalat ya shara rai nga ai.
David well Calsam ngu ai wa gaw kanu kawa ni gaw myit su ai kashu kasha ni hpe n shangai shaprat ya ai raitim sadi dung ai hkam sharang lit la chye ai bungli shakut galaw ai kanu kawa ni sha tinang a kashu kasha ni a myit su myit gup ai hte lai kyang kaja na lam ni hpe makawp maga ya lu nga ai.Dai majaw kanu kawa kaja ai hte sha nhpring zup nga ai. Nga nna tsun lai wa ai.
Arau kyu hpyi ai kun dinghku nta gaw galoi mung hka bra ai lam n nga ai sha nga sa lu nga ai.Yuda masha ni a ga malai langai gaw nta kata e nga taw ai masha ni gaw sara ni chyu rai nga ai.Shangun ma langai mi mung n nga ai yawng gaw baw chyu rai nga ai.Ngu nna tsun da ai ga malai hpe mu lu nga ai.
nta a sari gaw maren mara bung pre ai lam rai nga ai.Nta a shimlum lam gaw sadi dung ai lam rai nga ai.Nta a kabu pyaw ai lam gaw tsawra ai lam rai nga ai.Nta a lusu ai lam gaw kashu kasha ni hta rai nga ai.Nta a tara gaw ap nawng dawjau ai lam rai nga ai.Dinghku a myit dik lam gaw hkap la hkam la chye ai lam rai nga ai.Dinghku hpe gaw de ai wa gaw ma hkra hpe hpan da ai Karai Kasang sha rai nga ai.
Shiga madat nu wa hpu nau ni yawng yesu maria yawsep htinggaw a shaman chyeju hkam la lu myit ga.Kun dinghku kata e du pru wa na hkrit tsang lam mahkra hkoi mat lu myit ga wa jau akyu hpyi ya dat lu nngai.
Akyu hpyi saga oh hpan madu Karai Kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw Chyoi pra ai htinggaw poi nhtoi rai nga ai hti ang ai ja chyum mungga ni gaw chyum mungga daw langai .Shirak a laika 3: 3-7, 14-17 .chyum mungga daw lahkawng kawlose laika 3: 12-21 kabu gara shiga Lk 2: 41-52
Ndai jachyum mungga ni hpe hti nna myit sumru yu let hpawt ni na nawku daw jau lamang ni hpe woi nga ga law.
