Daini na Ja Chyum Mungga hpe hti sumru yu ai shaloi, dai ni gaw Chyoi pra ai Nu Maria Karai a kanu a poi n`htoi shani hku nna mung nawku hpung hku nna,masat da ya ai n`htoi shani nan mung re.
Dai hte maren, Karai Kasang gaw shi a kashu kasha ni rai nga ai anhte hpe dai yu bak mara kaw na hkye mawoi la na nga, shi a tsawra dik ai kasha Yesu hpe Mungkan ga de yu sa na matu, shinggyim masha sa tai la na, Nu Maria kaw sa pawpru shangai ya sai hpe, matsan mayan re ai, sagu rem ni kaw shawng shiga sa shana ya sai. Dai majaw, hkye la Madu Yesu hpe kaji kadun ai matsan jam jau ai ni ngu masha ni sawn la ai sagu rem ni shawng sa nawku lu ai rai nga ai.
Shingrai dai ni na ja chyum mungga hku nna, anhte hpe shadum ya nga ai gaw, anhte a sak hkrung hkawm sa ai prat hta, ndai shaning ting hta e mung, hkye la Madu a kanu Maria a mai kaja ai kasi kamang lai len ni hpe yu la nna, Karai Kasang a tara lam ni hpe hkan lang hkan sa let, Shi madu Karai Kasang a man hta e mung gingdan galu kaba ai ni byin tai nga na grai ahkyak la nga ai re. Dai rai nna, anhte a hkristan prat hkrun lam hta tara lam ni hpe hkan sa shakut let, kaja ai prat hta sak hkrung shakut sa nga ga law.
