Mtt 2:9-11 Dai hkawhkam a ga na la ngut jang shanhte pru sa wa ma ai rai nna yu mu sinpraw mung e mada mu ai shagan gaw ma kaji nga ai shara a ntsa e ang ang di rai kap mat hkra shanhte a shawng e asa wa nga ai. Dai shagan hpe mu ai shaloi shanhte nachying kabu gara nga ma ai. Dai nta hta e shang wa ma yang dai ma kaji hte shi a kanu Maria hpe shanhte mu mu ai rai nna lahput hput di let shi hpe nawku mu ai.Tinang a sut sumbu hpaw nhtawm shi hpe Aja Lawban hte Mura ngu ai kumhpa hpe sak mu ai.
Moi na sinpraw masha ni gaw mungkan ntsa e lak lai ai masha langai ngai hpung dagu hte hpring rai nna paw pru sana nga yang lamu ntsa hta lak lai ai lamik kumla dan leng ai hte shagan paw pru ai lam nga ai hpe hkap la da ai rai nga ai.Madu Yesu Hkristu gaw shi a shaprat kawa Yawsep hte Maria yan hte yerusalem mare de sa nawku dawjau ai ten hta simun a tau nau hkaw tsun tawn da ai myit htoi ga langai mi nga ai dai gaw lk 2: 32 hta yu yang Eph 3: 6 pawlu a tsun ai lam gaw lamu ntsa e paw pru ai shagan kaba a lam madun ai a majaw sin praw mung na hpaji rawng ai hkawhkam masum gaw sharawng shara rai myit kaba hte shanhte a mungdan ni kaw na shanhte a mungdan na hkap la kam sham ai myit hte manu shadan ai arai ni hpe kumhpa hku nna sa sak jaw na matu pru sa wa ai shaloi shagan kaba hte lam lapran e mu hkrum nna rau pawng hpawm ai hte pru hkawm sa wa ma ai rai nga ai.
Shagan kaba a nhtoi hpe hkam la lu tim Behtelehem de du maw ai shaloi shingra tara htan lai ai nhtoi ngu na hpe shanhte marai hkum ngau shagu a myit masin hta hkam sha lu dat nna moi shanhte shadu lai wa ai mungkan arawng aya ni hte shingkang shingwang kaba nga ai wa hte rau hkrum lu na re ngu shadu lai wa ai shanhte a myit ni gaw moi na zawn n rai sai sha dum su u shat wakang hta e matsan mayan rai matsan ai kun dinghku e shagrit shanem ai hte shangai chying hkai wa nna mungkan ga hpe hkye mawoi la na hkye la madu ma yesu hpe shagrit shanem ai hte dingyawm dagup nna sin praw mung na hpaji rawng ai hkawhkam masum gaw nawku hkungga shakawn let shanhte tingkyeng la sa wa ai kumhpa ni hpe sak jaw lai wa ai rai nga ai.Hpaji rawng ai masha masum a sak jaw ai kumhpa ni hpe yu dat yang shanhte mungdan na htunglai hpe manu shadan ai lam hpe mu mada lu nga ai.Hpaji ninghkring ni a sawn la ai lam gaw aja hpe la sa ai hkawhkam gaw pashan mungdan na re nga nna hkap la da ma ai.Gatspar pashan mung htunglai hte hakp la da ai lam gaw lamu ntsa e shagan kaba paw pru sai nga yang hkawhkam langai bai paw pru sai ngu ai kumla re nga nna hkap la da ai a majaw hkyak hkyak sak jaw lu na matu aja kumhpa hpe mahkawng hkyen lajang tawn da ai htunglai nga ai rai nga ai.Pashan mung hpaji rawng ai hkawhkam a aja kumhpa hte shanhte a hkam la da ai lam rai nga ai hkawhkam gaw Ma Yesu hta hpring zup nga ai..Mtt 2: 2
Mtt 27:17
Yawhan 19: 14.16
Kasa 17:7
Shingran laika..19:16
Madu Yesu gaw mungkan ting hpe hpan tawn da nna up hkang taw nga ai hkawhkam ni a hkawhkam shi rai nga ai..
Lawban hpe kumhpa hku na la sa ai hpaji rawng ai hkawhkam wa gaw India mung Melkaw ngu ai shara na hkawhkam mai byin ai nga nna tsun da nga ai.India mung na htunglai hte hkap la da ai lam gaw lamu ntsa e shagan kaba paw praw sai nga yang Karai Kasang paw pru ai masat re nga nna kam sham hkap la da ma ai rai nga ai.Dai majaw India mung htunglai a madung gaw nawku dawjau ai nawku htunglai langai mi gaw lawban hpe nat shamawng nna manam pyaw sama ni hpe Karai Kasang hpe nawng jau ai lam rai nga ai.India mungdan e nga ai kun dinghku shagu ni a nta hta lawban nat shamawng ai lam gaw n nga n mai hku na ahkyak ai nawku hpung a nawku daw jau ai arung arai langai mi mung rai nga ai.Sak jaw nawng jau ai hte maren ma Yesu gaw Karai Kasang nan rai nga ai.Mtt 1: 23
Yawhan 1: 1
Phli 2: 6
Madu Yesu gaw hkristu Madu teng teng rai nga ai.Shangai kumhpa hpe la sa wa ai hpaji rawng hkawhkam gaw ,Betesar,ngu ai Egutu mung na hkawhkam mai byin ai nga nna tsun da ai hpe mu lu ai.Egutu mung na htunglai hte kam sham hkap la da ai lam gaw lamu ntsa e shagan kaba paw pru sai nga yang sari shadang hte hpring zup ai lak lai ai masha paw pru ai lamik kumla re nga nna kam sham hkap la ma ai re.Dai majaw Egutu mung a htunglai gaw mira kumhpa hpe nta kaw da nna si ai ni a matu lang ai arung arai langai mung rai nga ai.Shagrau hkrum ai ten hta e mungga jaw shadum ai hku na Mura hpe sak jaw kumhpa jaw jaw re ai rai nga ai.lachyum gaw, nang gaw si ai baw hpan rai ndai ngu nna sadi jaw ai htunglai hkrang rai nga ai.Sak jaw ya ai Mura kumhpa zawn sha madu yesu karai kasang nan rai nga tim masha hkum hkrang hpe sa dagraw hkam la ai a majaw madu yesu hta Karai ajet masha ajet ndai hpan lahkawng yang rawng nga ai Yawhan 1: 14
Tsawra ai nu wa hpu nau ni Madu Yesu gaw sin praw mung na hpaji rawng hkawhkam masum kaw na kumhpaw kumhpa hku na sak jaw wa ai arung arai ni hte lachyum shaleng da ai mungdan shagu na kam sham hkap la ai dai htunglai ni hte maren Madu Yesu gaw hkawhkam ajet Karai ajet hte masha ajet rai nga ai.Masha yawng hpe hkye mawoi la ai hkye la madu mung rai nga ai.Daini e sin praw mung na hpaji rawng ai hkawhkam masum gaw laklai ai chyeju a majaw shagrit shanem ai hte shanhte a prat hpe shagrit nna ma Yesu Karai Kasang hpe sa nawku lu ai mung rai nga ai.
Karai Kasang gaw maigan myu sha ni hpe myit sawn myit mang ai lam ni hte shingra tara hku na shi a mungga hpaw tsun shana dan ai zawn yuda masha ni hpe rai yang gaw myihtoi ga ni hku na shingran jaw madun dan lai wa ai rai nga ai.Jan shata shagan ni hpe hka ja nna hpaji sharin la nga ai.Hpaji rawng ai hkawhkam masum gaw daini e dai jan shata shagan ni hpe hpan tawn da ai hpan madu Karai Kasang Ma Yesu hpe nawku hkungga shakawn na ahkang lu la lai wa ai.
Madu Yesu a shinggyim hkum hkrang hpe sa dagraw hkam la nna shangai shaprat ai hpe hkam la ai ten hta e kaning re ai masha ni gaw sa nawku lu ma ai kun ngu yang. Ma Yesu hpe sa nawku lu ai masha hpan lahkawng gaw sagu rem ai ni hte hpaji rawng hkawhkam masum rai nga ai.Maga mi hku tsun ga nga yang yu maya myit sumnung ai ni hte.Hpaji rawng dik ni rai nga ai.Waw njau le njau rai lapran na masha madang ni gaw nawku ai lam n lu ma ai.Sinpraw mung na hkawhkam masum gaw Bethalehem mare makau du ai ten jahpawt daw du sai re majaw shagan kaba gaw mat mat ai dai ten hta e shanhte gaw ni sai ngu ai hpe chye lu dat ma ai.Shana nsin sin na hpe nlat sai sha Herod hkawhkam hpang de shang san ai shaloi gaw hpa byin wa a ta nga yang mtt 2:7-8
Daini e Herod hkawhkam a myit manaw ai kaw na hpaji la ga nga yang myit magaw ai masha gaw kalang kalang tinang a myit magaw ai lam ni hpe hpung lam hta shakut ai hkrang hku na makoi magap da chye nga ga ai.Hpaji la hpa langai bai rai yang gaw masha gaw Madu Yesu a lam hpe sawk sagawn hkaja ai ten hta e nawku na matu i shingnrai jam jau jaw na matu kun ndai lam yan hta na langai ngai a matu sawk sagawn ai lam rai nga ai.Hkum shan marin ai madang hte sha myit sawn dawdan chye ai ni zawn Herod hkawhkam gaw makam masham tara lam ni hpa mung n nga ai sha Madu Yesu hpe mungkan a hkawhkam.langai hku na sha shadu la da ai a majaw hkawhkam hkawseng kashun na wa re jahkrung n da mai ai nga na kadai gaw kadai wa re atsawm dawdan n chye ai a majaw lahkawng ning npu na ma ni yawng hpe sat mu ngu nna amying jahkrat let Bethelehen grupyin na lahkawng ning npu na la sha ma ni yawng hpe sat kau ai mung rai nga ai.
Matut nna hpaji la shara gaw jaw teng ai lam mung n nga myit kata na shadut wa ai lam hpe hpa zawn nnawn da ai wa a bawnu hta e nyan marai gaw manu ndan ai tinang a hpaji sharawng awng ai myit hte ta tut jaw teng ai hku hkrang shapraw wa yang she tinang a machye machyang gaw manu dan wa na rai nga ai.Mtt 2: 12
Hpaji rawng ai hkawhkam masum gaw lamu kasa a shadum jahprang ya ai lam a majaw sa wa ai hku bai n wa ai sha laga lam hku bai wa mat ai zawn myit kaja ai hte madu yesu hpe mu na matu shakut ai masha shagu gaw madu yesu hte mu lu sai nga yang hkrit tsang n ra ai mi sa wa ai lam hku bai wa mat ai lam n nga ai. lachyum gaw Madu Yesu hpe hkrum katut lu sai nga yang anhte ni mi na n kaja ai laikyang sat lawat hku na bai nhtang ai lam n nga sai.Myit masin nnan hte she anhte a shara majing de wa mat lu na rai nga ai.
Shinga madat nu wa hpu nau ni yawng mung anhte a hkumhkrang myit masin nyan marai atsam hte gawng kya ai lam ni hpe chye nna hpaji rawng ai hkawhkam masum ni zawn karai kasang hpe wanglu wanglang kabu gara ai hte sak jaw nawku dawjau lu ai ni rai myit ga yawng hpe akyu hpyi ya dat lu nngai.
Akyu hpyi saga oh hpan madu Karai Kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit nyan marai hte n gun atsam chyeju ni hpe mung jaw ya rit anhte a Madu Hkristu a marang e hpyi nem nga ga ai.
