“Ara rai sa, kaja ai hte sadi dung ai mayam e, arai loi sha hta nang kangka rai nit dai; dai rai nna arai law law a ntsa e ngai nang hpe san tawn da na de ai, na madu a kabu gara ai hta nang shang lawm u!”
Mt 25: 21
Hkristu hta tsawra ai hpung masha ni,
Masha law law gaw anhte a ndai mungkan sak prat gara hku she htum mat na kun? Ngai kaja wa akyu rawng ai hku sak hkrung nga sai kun? nga nna myit sumru, san yu chye ma ai. Dai ni “ngang grin ai mahtai hpe myit mada ai sak hkrung lam” hpe garan gachyan mayu ai.
Anhte a sak hkrung lam hte seng nna aten kachyi mi sha pi la nna ding lik yu sai kun? Ndai mungkan sak prat tawt lai mat ai hpang hpa ni ngam kau da na kun? Kaja ai lam ni ngam kau da lu hkra shakut sak hkrung sai kun? anhte ding lik yu sai kun?
Anhte yawng gaw anhte a sak prat hta awng dang ai lam lu la na hpe myit mada ai hkrai rai nga ai. Ginsup shakut taw nga ai ma langai mi gaw jawng ngut ai hte ginsup ning hkring kaba tai wa na hpe myit mada let ginsup shakut taw nga ai. Shingni hpe hkaja ai wa mung majoi dum shapyaw chyai na sha myit mada ai nrai nga ai. Tinang hpe n’gun jaw nga ai masha law law a man e shangwi shapyaw lu nna awng dang ai shingni ning hkring tai na hpe myit mada let shakut nga ai rai nga ai. Anhte yawng gaw mungkan pinra hta ngang grin ai awng dang lam hpe lu na myit mada ai hkrai rai nga ai. Anhte n-nga mat wa tim pi masha ni myit dum nga na kaja ai lam ni ngam kau da mayu ai hkrai rai nga ai.
Ndai zawn myit mada chye hkra mung Karai Kasang shi hkum nan anhte shinggyim masha ni hpe grai hpring zup hkra lajang hpan da nga ai. Anhte mahtang Karai Kasang a yaw shada ai lam hpe malap kau nna anhte ra ai de yawng mat wa chye nga ai. Awng dang wa ai ten rai dum mat wa chye nga ai. Awng dang wa ai lam hpe arawng sadang hte tinang a matu sha myit mat wa chye nga ai. Ngang grin ai mahtai hpe myit mada ai sak prat gaw dai hku nrai nga ai. Yawng a man e mying gum hkawng wa nna yawng a n-gup hta tsun kajai wa na matu myit mada ai n rai nga ai. Awng dang ai lam ngu ai gaw Karai Kasang jaw ya ai rai nna shi yaw shada ai lam hta sadi dung ngang kang ai hte hkan sa ai lam hku nna sha lu la mai nga ai hpe dum nga ga. Anhte a myit mada lam gaw mungkan a tsang madang hku shadawn ai n re sha Karai Kasang hta sadi dung hkan sa ai lam a apu asi sha rai nga ai.
Mahte laika 25: 21 hta “Ara rai sa, kaja ai hte sadi dung ai mayam e, arai loi sha hta nang kangka rai nit dai; dai rai nna arai law law a ntsa e ngai nang hpe san tawn da na de ai, na madu a kabu gara ai hta nang shang lawm u” nga nna Karai Kasang tsun ai mungga hta sadi dung ai lam she awng dang lam madung re hpe asan sha shadum ya nga ai. Dai re majaw anhte a ngang grin ai myit mada lam gaw Karai Kasang a ra sharawng ai hpe madat hkan sa ai sak prat she rai ra nga ai. Anhte myit ra ai htan Karai Kasang yaw shada ai hpe hkap la myit mada chye ra nga ai. Karai Kasang gaw anhte yawng a matu kaba la ai masing nga nga ai. Ndai masing hta shang lawm yang she mungkan ga na awng dang ai lam ni yawng hta ngang grin ai awng dang lam hpe lu la na rai nga ai. Anhte lu tawn da ai ndai mungkan ga a awng dang ai lam, arawng sadang ni yawng gaw lani mi hta hten run mat na sha rai nga ai. Anhte a Karai Kasang gaw hkaw hkam langai mi hku nna galoi mung uphkang nga na sha rai nga ai. Madu Yesu a shaman chyeju anhte hkam la lu na rai nna shi hte rau htani hta na ning ngai nga lu na rai nga ai.
Dai re majaw Nu Wa Hpu Nau ni, dai ni anhte htani htana ngang grin ai mahtai awng dang lam hpe myit mada chye na matu shakut sa wa ga. Karai Kasang hpe sadi dung ai hte tsawra chye wa hkra shakut ga. Tinang a htingbu wa hpe mung shagrit shanem ai hte tsawra matsan dum lama chye ai magam bungli ni hta mung shakut ga. Mahte Laika 6:19-20 hta shadum da ai hte maren manut e mung nsha, lagut e mung n-lagu kau lu ai sut gan mahkawng na ahkang lu nga ga ai hpe dum nga ga. Dai ni anhte myit lu ai hta grau kaba ngang kang ai mahtai myit mada let sak hkrung na ahkang Karai Kasang jaw ya nga hpe dum nga ga. Karai Kasang yaw shada ai hte maren anhte byin wa lu hkra Karai Kasang a lam woi la ai hpe hkam la ga.
Karai Kasang hta myit masin hkum hkrang mahkra manoi nga lu nna hpring zup ai, ngang kang ai kabu pyaw lam hpe hkam la lu mu ga kyu hpyi ya dat ai.