Madu Yesu gaw shi a aten du jang, sumsing mungdan a lam hpe hkaw tsun dan wu ai. Shingrai Siria mung dan ting hta e shi a mying gaw, kajai gumhkawng mat wa sai. Dai mungdan ting na ana ahkya amyu myu hte machyi makaw hkrum ai ni, Nat kap ai ni, lagaw lata katsing si ai ni law malaw gaw, Yesu kaw sa tsi shamai la masai re.
Shiga madat nu wa ni, machyi ai ni tsi sara kaw sa ai nga ai hte maren, anhte nang ngai mung ndai amyu masha ni zawn, hkum hkrang hte wenyi lam yan hta, laja lana rai machyi jamjau hkrum nga ai ni, tsi tsi hkam la ra ai ni rai nga na ga ai n hten. Grau nna wenyi lam yan ni hta e, Karai Kasang hte tsan gang mat wa ai lam ni, tinang hkan sa ra ai makam masham tara lam ni hpe tawt lai let, n htan shai ai hku nga sa chye ai anhte a sak hkrun lam hpe, lawan dik ai hku shi Madu Yesu kaw sit sa let tsi lajang la ai rai yang hkum hkrang hte myit masin wenyi ngwi pyaw hkamja let asak hkrung hkawm sa lu na teng sha rai nga ga ai law.
