Myitkyina Saradaw ginwang a lit hkam Saradaw tai wa na rai nga ai Wajau Kaba Msgr. John Mung Ngawn La Sam hte hkrum shaga lam galaw da ga ai.
Mogok Myo Bogong lawk kaw 1973 ning April 27 ya shani Slg. Petru Mung Ngawn Seng Du hte Jan Elizabeth Sinnan Pri Ja yan a kasha Kahpu Kanau marai 6 kaw na Ma La madaw re. Karai Kasang a yaw shada lam mau hpa re hpe mu mada ai, dang di ai made prat ting Karai magam gun na ngu daw dan na Karai Kasang a tsawra matsan dum ai myit hpe kam hpa let, Rosary hti shakut Nu Maria mung akyu hpyi garum ya na hpe kam na Karai Kasang a chyeju hte Hkawm sa na myit da ai. 1988 ning tsang (8) lung ten Mung masa npyaw ai majaw Jawng pat mat na Hpakan de Gumhpraw tam lung mat ten, Ramma amu magam hpe 9 ning gun hpai ai hpang manaw manang ni hte rau Holy Land, Sanpra ai Buga de sa hkawm na Lourdes mare na Nu Marai Lungpu shawng kaw akyu hpyi ai kaw na Karai Kasang a shaga al ai nsen hpe na nna Jau tai mayu wa ai. Dai hpang Hpakan kaw Gumhpraw tam ai hpe jahkring kau na Manmaw Nanhlaing mare kaw tsang (8) hpaji hpe matut sharin la ten asak (26) ning du sai majaw laika hti nmatsing hkraw tim Rosary hti shakut na Sam poi awng la lu ai. Tsang 9,10 hpe hpe Manmaw San Columban Boarder kaw nga na awng la lu sai. Bai matut na Myitkyina Shatapru Pri Major kaw Entrance hpe htai na matu English laika hpe (3) ning hkaja nga ten, Wa Saradaw Pawlu Zinghtung Grawng a matsun hte3 Missions of Faith wuhpung hta shang na English laika hkaja let, 2006 ning hta Entrance awng la na Myit Hpaji ngu ai, Philosophy hpe Pyin Oo Lwin kaw sharin hkaja ngut ai hpang 2009 ning hta Italy Mungdan kaw Karai hpaji Theology sharin awng la na, tinanag a Buga de bai wa nhtawm, 2016 ning hta Alam Udang Bum kaw Wa Saradaw Francis Daw Tang a lata hta htani htana Jau aya hpe hkam la lu sai. Dai hpang Myitkyina Aungnan Cathedral kaw (2) ning tup Ningtau Jau Ginwang lit magam gun hpai nga ten, (2017) ning Shadau Jau Ginwang Nnan hpaw ninghtan lu sai majaw dai kaw na Shadau Ginwang Up Jau magam hpe gun hpai nga ai.
