Daini na Ja Chyum Mungga hpe anhte hti sumru yu ai shaloi e, Karai Kasang a mungga gaw, kade ram atsam rawng nga ai ngu ai hpe, anhte sumru yu mai nga ga ai. Yesu Madu gaw, shi nan Karai Kasang rai nga timung, Kawa Karai Kasang a mungga hte maren, tut nawng hkan sa nga ai majaw, shi galaw sa ai lam ni mahkra hpe, myihtoi ni gaw mau mat ma ai lam ni chyum mungga hta anhte mu chye lu nga ai.
Hpa majaw nga yang e, Madu Yesu gaw shi tsun ai hte maren, shi galaw sa ai. Shi a n gup aga hku nna, teng man ai tara lam ni hpe shi tsun shaga ai. Bai mai kaja ai lam ni hpe mung kadai a man kaw raitim, tsun shaga galaw gwi ai. Dai re majaw, shi a n gup a ga hte tsun ai ga ni yawng gaw shingkang rawng ai ga ni rai nga ai.
Shingrai, anhte yawng mung, Madu Yesu hpe yu let, tinang tsun shaga ai hte maren, ta tut hta e mung, tup hkrak hkan lang hkan sa ai ni rai nga yang sha, yawng gaw tinang hpe sadi dung ai wa, kamhpa ging ai wa, shingkang shing wang rawng ai wa, ngu hkap la na teng sha rai nga ai. Dai re ai majaw, anhte shani shagu hkawm sa galaw tsun shaga ai lam hta e, Madu tsun shaga ai hte maren, ta tut hta e galaw sa ai magam lam ni hta e mung, bung pre hkra, galaw hkawm sa shakut nga ga law.
