Daini na Ja Chyum Mungga hpe anhte hti sumru yu ai shaloi e, Mungkan ntsa hta manggang ana ngu ai kade hkrit tsang ra ai hpe anhte na chye sai rai nga ga ai. Dai ana zinli kap sai hpe chye ai hte rau, masha uhpung u hpawng hte tsan ai shara ni kaw nga ra ai. Madu hkum nan mung manggang ana kap ai masha re ai lam hpe, tsan ai shara kaw nna, tsun maraw ra ai. Hpa majaw nga yang e, ndai ana kap sai ni gaw, masha hte ni htep ai hku n mai nga ai.
Kaga masha ni kaw ana kap wa na tsang ra ai majaw re. Shingrai dai ni na Ja chyum mungga hta e, Manggang kap ai wa Karai Kasang kaw kam hpa let, shi a ana shamai ya na matu, hpyi nem ai lam hpe mu lu ga ai. Dai hte maren anhte mung, Karai Kasang kaw ra ai chyeju ni hpe hpyi la ai shaloi e, kamhpa ai myit kaba hte akroi anoi hpyi nem sit shang ai rai yang, Karai Kasang gaw ten sha chyeju jaw na, shamai shatsai ya na rai nga ai. Dai majaw, anhte yawng Karai Kasang kaw kam hpa manoi manat ai myit kaba hte matut shakut sa nga ga law.
