Lk 3: 21-22
Tsawra ai nu wa hpu nau ni
Jau ginwang ni hta magam gun lai wa ai Jau langai gaw shi a sasana hkrun lam prat hpe garan gachyan lai wa ai. Dai jau gaw lani mi na nhtoi hta asak 80 re ai aji dingla langai hpe kashin kamun jaw lai wa ai lam rai nga ai. Dai dingla wa mung kashin kamun hkam la ngut ai hpang makam masham grai grung ai wa zawn shi a stun shaga lai kyang ni gaw grai galai shai mat wa ai hpe masha shagu grai na mau ma ai rai nga ai. Lahkawng ning ram na ai hpang asak kaba n gun kya wa nna yup ra ntsa e shi a si wa na nhtoi hpe ala dingda let sha nga nga mat ai. Dai majaw shi hpang de shi a nta masha ni manaw manang gaw sa nna n gun jaw ga ni wa tsun lai wa ai . Dai hta na masha langai gaw aji asak kade ram rai sata ngu nna san ai ten aji wa i naw kaji shi ai law ngu nna bai htai ya ai. Dai ma gaw aji asak kaba wa nna ma tai ai hkrang n re hpe chye ai hpyi ni pi kyip sai le gara hku na naw kaji sana mi ngu nna bai tsun ai ten aji gaw lahkawng ning ma sha naw re. Hpa majaw nga yang nye a matu gaw kashin kamun hkam ai nhtoi shani kaw nna she Karai asak ngu na hpe nnan lu la ai rai nga ai, lai wa sai asak 80 hpe nye a jahpan hta n bang da sai gaw nga nna bai htan tsun lai wa ai lam rai nga ai.
Roma 5:12 masha langai mi a jaw e yubak gaw mungkan ga e shang wa nna yubak a majaw sihkrung sihtan shang nang wa ai hte maren yawng mayawng yubak kap
nga ma ai majaw masha nlang kaw e si hkrung si htan du bang wa sai ngu tsun da ai. Lana mi hta mung Madu Yesu hpang hparashe langai rai nga ai Nekodemus sa nna san ai lam hte Madu Yesu a htai ya dat ai lam hpe bai yu ga nga yang Yawhan 3: 4- 5 masha gaw prat kaba sayang kaning rai bai shangai lu na a ta kanu a hkritung debai shang nna shangai lu na a ni? ngu nna san yang, Yesu gaw ngai nang hpe teng teng tsun de ga hka hte wenyi e n shangai ai masha gaw Karai Kasang a mungdanhta shang lu na nrai ngu nna asan sha htai tsun dat ai lam mu lu nga ai.
Kashin kamun hpe hkam la ai a marang e hkam la lu na shaman chyeju ni gawkashin kamun hte seng ai chyeju ni hpe hkam la lu nna npawt mara hte nawngmara a htani htana dam ngu na ni yawng raw shaprai kau ya ai hkrum ai. Dingmanai chyeju ngu na Karai Kasang asak hpe jaw ya hkrum ai Karai a asak ngu na htashang lawm asak hkrung lu ai. Kawa Karai Kasang a kasha tai wa lu ai. Kasha Karai Kasang a mung sung lam hta e adaw ashan ni byin wa na ahkang jaw ya ai. Chyoipra Wenyi Karai Kasang shanu shingbyi na shara byin wa na ahkang hte lak lai aiakyu chyeju ni hpe hkam la lu shangun ai. Mara n kap ai Madu Yesu gaw hpa majaw myit malai ai lam hte seng ai kashin kamun hpe Yawhan Pabtister a lata hta hpa majaw hkam la a ta? Daini e san shara tai nga ai. Hpa majaw ta nga yang mahtai gaw lahkawng nga ai. Langai gaw ndai mungkan hta ahkyak dik shara hte seng ai bungli langai ngai hpe lit la galaw sananga yang kaba ai masha langai ngai a recommentdation ngu ai madi shadaw ya ai lam langai ngai ra nga ai. Madi shadaw ya ai madi shadaw laika zawn re ai n lawm ai hpe gara rung shara hta mung hkap la ai lam n nga ai.
Dai zawn sha shaning 30 ning tup Nazareth mare hta e lak sama prat hku matsan mayan rai nga lai wa nna kalang lata nan ngai Karai Kasang a kasha re nga nna tara mungga ni hpe nnan hkaw tsun yang kadai mung hkap la lu na nre..hkap la na mung yak na re. Dai majaw Yawdan hka hta Yawhan a lata hta e kashin kamun hkam na matu du sa wa ai masha wunawng uwa a shawng hta sha Lk 3: 21-22 hta e tsun da ai hpe mu lu nga ai. Yesu mung Baptisma hkam nhtawm akyu hpyi nga yang lamu hpaw wa nna dai Chyoi Pra ai Wenyi gaw hkrang dan dan shi a ntsa e hkrudu zawn yu hkrat wa nna Nang gaw nye tsawra ai kasha rai nga nda, nang hta ngai sharawng awng nngai law nga nna lamu de na nsen du pru wa ai. dai gaw.lamu hpaw malang wa nna Kawa Karai Kasang hte Chyoi Pra ai Wenyi Karai Kasang a madi shadaw ya ai lam hpe lu lai wa ai lam rai nga ai.
Lahkawng hta gaw anhte yawng hpe tara mungga jaw na matu rai nga ai. Shi a matu n ra tim shi madu ya na zawn hkan shadik ya ai a marang e shi prat hpe kasi ningli hku nna masha wa hpe sasana galaw lu na matu shi ra ai tara lam hpe lata na matu n re ai sha kaji ai tara ni hpe mung hkan shadik ging nga ai ngu na mungga hpe jaw ya nga ai. Mt 3:14-15 Tsawra ai nu wa hpu nau ni ja lung seng sut mungkan ngu na de shang nna tsin lung seng a lam hpe hkaja dat na nga yang dai lung seng gaw nsam htoi asan re ai nlung lung seng rai nga ai. Tsin lung seng tawng hpe Egalish gasi C mali hte bung hkra nlung hpe garang nna htoi nsam pru hkra galaw yang she manu dan dik ai tsin lung seng byin wa na rai nga ai. Masat da ai lung seng shadang hpring ra ai. Dtsin lung hpe ret ga ai hpaji lam ngu na ra ai. Tsin lung seng nsam hpring galaw shatsawm chye ai hpaji ra ai. Asan re ai lam ni byin ra ai rai nga ai ndai lam mali hte hpring sai nga yang tsin lung seng gaw manu grai tsaw hte manu dan dik rai wa ai.
Anhte yawng mung lung seng gaw rai nna manu nau n nga ai nau ntsawm ai nlung lung seng hte bung nga ai kun. Daini e Madu Yesu gaw anhte yawng hpe jasan jaseng ya na matu ndai mungkan ga de du sa wa sai rai nga ai. Udang ntsa e asak si ai du hkra shi a hkum hpe sak jaw ap nawng lai wa ai. Roma 6:4 kashin kamun sacramentu ngu ai gaw hkristan prat hkrun lam hpe anhte a prat hta nnan npawt gaw de dat ya ai lam rai nga ai. Dai zawn npawt gaw dat ya ai hkristan prat gaw Madu Yesu hta hpring zup kung hpan kaba wa ai Madu Yesu hpe kam sham ai sak prat byin wa na matu ra nga ai. Manu dan ai nlung byin na matu mi tsun lai wa sai lam mali ra nga ai zawn anhte yawng mung ndai mungkan hta e jahkring mi sha sa nna hkrun lam hkawm nga ai kawn san pra ai masha ni zawn chyoi pra san seng ai prat hpe lu wa na matu ya lu tawn da ai makam masham hta e mi tsun ai lam mali hte bung ai ndai zawn lam ni mung ra nga ai. Dai gaw Madu Yesu hpe ra ai, nawku hpung ngu ai nga ra ai. Myit yawn myit malai ai lam nga ra ai. Tsawra matsan dum lama chye ai lam nga ra ai. Ndai lam mali rai nga ai.
Madu Yesu gaw Chyoi Pra ai Wenyi a marang e na um na sin nna chyoi pra ai Maria kawn shangai chying hkai wa ai Kawa Karai Kasang a kasha shingtai rai nga ai. Dai kasha ngu na gaw hpa ta? Mt 1:21, kasa 4:12 Masha hte Karai a lapran e mahkri shawn ya nga ai madu rai nga ai. Madu Yesu gaw Hkristan ni yawng a nnan hte jahtum, yawng a npawt madung mung rai nga ai. Madu Yesu gaw Chyoi Pra ai Wenyi Karai Kasang hpe jaw ai Madu Kawa Karai Kasang hpang de ningshawng woi ya ai madu rai nga ai. shi a si a kaw na bai hktung rawt ai lam hpe garan hkam sha lu shangun ai Madu mung shi rai nga ai. shi kanu Maria hpe mung yawng a kanu hku nna mungkan masha ni hpe ap jaw ya lai wa ai rai nga ai. Madu n lawm ai sha hpa mung ndang di lu nga ai, hpa mung n lu hpyi nga ai. Madu Yesu gaw anhte prat a matu n nga yang n mai Madu Yesu nan rai nga ai.
Nawku hpung a baw ngu na gaw Madu Yesu rai nga ai zawn Madu Yesu a hkum hkrang mung sung lam gaw nawku hpung rai nga ai. Dai kanu nawku hpung gaw shi a kashu kasha ni anhte hpe chyoi pra hkum Sacramentu hte laga Sacramentu chyeju kumla ni hku nna Karai a mungga hku na mung kasa ni a prat ban kawn daini du hkra ding yang hkinhtawng dagraw yu hkrat wa ai hte lam woi awn ya ai hku na shapan shalat ya ai hte langai hku na sha kahkyin gumgin nga shangun ai rai nga ai. Myit yawn myit malai ai lam galaw nna galai shai ai lam nga ra ai. Kashin kamun hkam la ai ten lu la ai asak nnan gaw anhte mara bai galaw shut ai a majaw gawngkya n gun yawm wa nna jam jau ai gunglau ai lam ni hte yeng seng wa ra ai. Dai majaw Madu Yesu galoi mung saw shaga nga ai nsen gaw Mk 1:15 mara hte ka up da hkrum nga ai anhte a Wenyi gaw hpraw san tsawm hkra mara raw Sacramentu hpe jahkring hkring sha myit yawn myit malai ai hte kam sham ai myit kaba hte hkam la na ra nga ai. Tsawra myit gaw Karai Kasang hte ading tawk seng nga ai mai kaja lam langai rai nga ai.
Mt 22:37-39 mahkra dang chye ai Karai Kasang rai nga ai majaw shi hpan Madu hpe lam mahkra htan lai na shi hpe tsawra na matu masha shda da a lapran hta gaw Karai Kasang a myi man tau nna tinang hkum hte maren tsawra na matu ra nga ai. 1 Cor 13:7 Tsawra myit nlawm ai sha hpa hpe galaw law hpa akyu mung n lu nga ai. Tsawra myit n lawm yang hpung lam hta kade mi shakut kut kade mi alu bang tim, htawm hpang prat de du hkra nlawm mat nga ai. Jaw bang alu n awng ai sha Karai a man de mung n du mat ai majaw rai nga ai. Tsawra myit kaba wa sai nga yang gaw ndai mungkan hta pi ba dum ai lam ngu ai n nga wa ai, pi naw n law dum wa ai rai nga ai.
Anhte hkam la da sai kashin kamun gaw manu dan dik tsin lung seng hte bung nga ai. Bai nna kashin kamun a marang e wenyi lam hta shi a kasha ni zawn dazik dawk da hkrum sai majaw htani htana grin ai lam hpe kam sham ai lam mung rai nga ai. Jaw teng ai tara mungga mung rai nga ai. Kashin kamun a marang e hkam la lu sai shi a kasha ni hku nna galoi mung Karai Kasang a lam hpe shadan shadawn dan lu ai,arawng lu shangun ai kashu kasha ni tai nga lu myit ga.
Akyu hpyi saga Oh Hpan Madu Karai Kasang e chyeju mahakra matu chyeju dum ai hte nang wa hpe grau nna kam sham tsawra chye chyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit nyan marai hte n gun atsam chyeju ni hpe mung jaw ya rit anhte a Madu Hkristu a marang e hpyi nem nga ga ai.
Hkristu hta tsawra hkunggga ai kanu kawa tara hkaw sara ni hte nu wa hpu nau ni e ndai laban gaw Madu Yesu Kashin Kamun hkam ai poi nhtoi rai nga ai hti ang ai ja chyum mungga ni gaw chyum mungga daw langai ..Easia a laika 40: 1-5,9-11
.Chyum mungga daw lahkawng Titus a laika 2: 11-14, 3:4-7 kabu gara shiga Lk 3: 15-16,21-22
Ndai jachyum mungga ni hpe hti nna myit sumru yu let hpawt ni na nawku daw
jau lamang ni hpe woi nga ga law.
