Myitkyina Saradaw Sasana hta ra kadawn nga ai lit hkam Sagurem Saradaw nnan hpe Sarabyin Francis kawn lai wa sai ( 29 October 2024 ) ya shani Wajau Kaba John Mung Ngawn La Sam hpe lata tang dat ya sai rai nna Saradaw shatai poi hpe (12.1.2025) ya shani Myitkyina Muklum, Edin San Luka Chyum Collage Nawku Jawng wang hta galaw la lu sai rai nga ai.

Wa Saradaw John Mung Ngawn La Sam hpe Wa Saradaw kaba Cardinal Charles Bo  kawn  Saradaw aya hkam ya ai rai nna Lapai, Lahkra kaw Mandalay Saradaw Marku Tin Win hte Manmaw Saradaw Raymond Sumlut Gam yan kaw nna Saradaw aya hkam ya ai hta garum la sai.  

Saradaw shatai poi hte Tingyang ap poi hta Wa Sarabyin a Dakkasa Wa Msgr. Andrea Ferrente, Missionaries Of Faith ( MF ) wajau ni, Myanmar Mungdan ting na Wa Saradaw ni marai ( 23 ), Wa jau ni marai (120) jan, Wuhpung shagu na Mama ni (200) jan hte Nawku hpung masha marai mun lahkawng (20,000) jan sa du shang lawm lai wa sai.

Saradaw nnan  Wa saradaw John Mung Ngawn La Sam gaw Missionaries Of Faith ( MF ) jau wuhpung hta shawng nnan Saradaw tai wa ai rai nna Jinghpaw Wunpawng amyu sha ni hta na No ( 2 )  Missionaries Of Faith ( MF ) ngu ai Makam Masham Sasana Jau hpung hta jau tai wa ai mung rai nga ai.

Myitkyina Saradaw Sasana hta Wa Saradaw Francis Daw Tang hkringsa wa ai kaw nna, buga lit hkam Saradaw nlu ai shaning (4) ning na sai rai nga ai. Buga lit hkam Saradaw n lu ai ten Myanmar Mungdan na Saradaw kaba Cardinal Charles Bo kawn  Myitkyina Saradaw Ginwang hpe yu mada  na matu Wa Sarabyin lit jaw matsun da sai hte Cardinal Charles Bo hte ta gindun let Myitkyina Saradaw ginwang na Wajau kaba ni kawn woi awn taw  ai rai nga ai.

Myitkyina Saradaw Sasana hta ya ten Jau ginwang (33) nga nna Wa Jau ni marai ( 60 ) jan, Ga Sadi masum hkam da ai Religious Jau, Mama, Brother ni Sasana Uhpung  ( 13 ), Tara hkaw sara/ma ni marai  ( 748 ) magam gun nga ai  rai nna Saradaw ginwang ting hta nawku hpung masha marai ( 100000 ) mi jan nga ai Saradaw ginwang rai nga ai.

Myitkyina Saradaw ginwang a lit hkam Saradaw ningnan John Mung Ngawn La Sam a shawng ningnan na chyeju dum Missa Hkungga hpe St. Columban’s Cathedral Nawku htingnu hta Saradaw manang ni, wajau ni, nawku hpung masha ni law law shang lawm nna galaw la lu sai.

Wa Saradaw John Mung Ngawn La Sam gaw Wun Pawng Saradaw ni hta ( 6) ngu na Wa Saradaw rai nga ai.